دعا سے ہاتھ خالی، دل تمنائوں سے خالی ہے

دعا سے ہاتھ خالی، دل تمنائوں سے خالی ہے
عجب سے وسوسوں میں گھر گیا تیرا سوالی ہے
تجھے تشبیہ دوں کس سے ، کروں میں استعارہ کیا
تصور تیرا مشکل ہے، تری صورت خیالی ہے
بہت چاہا کہ کترا کر گذر جائوں ، مگر سوچو
ذرا سا مختلف ہے وہ، طبیعت کچھ نرالی ہے
ابھی سے کیوں اندھیرے کاتصور تم کو ڈستا ہے
ابھی سورج نہیں ڈ و با، ا بھی پچھم میں لالی ہے
ہمیںاس حق پرستی کا صلہ ملتا بھی کیا اس سے
کبھی تو سر زنش کردی، کبھی کچھ گو شمالی ہے
چمن زاروں سے پوچھو کس پہ اب افتاد آنی ہے
بہت بشاش ہیں غنچے، ہری اک ایک ڈالی ہے
ترے بازار میں یوسف کی قیمت ہم ادا کرتے
مگر صورت ہے لاثانی نہ سیرت ہی مثالی ہے
۔۔۔۔۔۔۔۔۔۔۔۔۔۔۔۔۔۔۔۔