دل سے ہر بار تری یاد کے غم ابھرے ہیں

دل سے ہر بار تری یاد کے غم ابھرے ہیں
پھر بھی طوفان بلا خیز میں ہم ابھرے ہیں
معجزہ ہے کہ ابھی تک ہیں سلامت ورنہ
“تیری آنکھوں میں جو ڈوبے ہیں وہ کم ابھرے ہیں”
اب کسی طور زمانے سے نہیں ہاریں گے
زیست کے جور و ستم سہہ کے بھی ہم ابھرے ہیں
اب کسی مے کی نہ حاجت کسی پیمانے کی
میرے اشعار میں اب ساغر جم ابھرے ہیں
ایک مدت سے تو خاموش تھا دل، دیکھ لیا
ساز کو چھیڑا ہے تو سوز و الم ابھرے ہیں
اے زمانے تجھے تا دیر نہ آئیں گے نظر
چند ساعت کے ہیں مہماں،کوئی دم ابھرے ہیں
۔۔۔۔۔۔۔۔۔۔۔۔۔۔۔۔۔۔۔۔۔۔