ادبی تخلیق دراصل انسانی ذہن کی ہمہ جہت کیفیات کے منضبط اظہار کا نام ہے۔ تخلیق کار اپنے کھوئے ہوئے خوابوں کو تخلیق میں سمو دیتا ہے۔ یہی وہ خواب ہیں جو انسانی ذہن کو ہمیشہ متحرک اور فعال بنائے رکھتے ہیں۔ اور ناول وہ صنف ادب ہے جس میں زندگی متحرک اور فعال نظر آتی ہے۔ لمحہ بہ لمحہ تغیر پذیر زندگی کی عکاسی کے لئے ناول سے بہتر اور کوئی وسیلہ نہیں۔ اس کی وجہ یہ ہے کہ ناول نگار اپنا ناطہ اس عہد اور اس سماج سے نہیں توڑ سکتا۔ جس میں وہ نہتا ہے اور ساتھ ہی اس کا اہنا نظریۂ حیات بھی اس کی تخلیق کے اندار ایک زیریں لیر کی طرح رواں دواں نظر آتا ہے۔ ناول نگار کی یہ خوبی ہے کہ وہ اپنے معاشرے کو زندہ اور متحرک حالت میں پیش کرنے پر قادر ہوتا ہے۔ وہ اپنے عہد کے سیاسی، سماجی، معاشی، تہذیبی، نفسیاتی، اخلاقی اور معاشرتی مسائل کا تجزیہ کرتے ہوئے اگر حل نہیں پیش کر سکتا تو کم از کم ان کے گھناؤنے پن ہی کو پیش کر کے اپنے فرض سے سبک دوش ہونے کی کوشش کرتا ہے۔ اس کا انحصار اس بات پر ہے کہ ناول نگار کا مشاہدہ کس حد تک پختہ ہے۔ اگر ناول نگار کے مشاہدے میں پختگی نہ ہو گی تو حیات کی حقیقتوں کی صحیح عکاسی ممکن نہ ہو سکے گی۔ کیونکہ تفریح، دلچسپی اور تحیر سے حظ و نشاط کی کیفیتوں کو پیدا کرنے کے ساتھ ساتھ یہ بھی ضروری ہوتا ہے کہ ناول نگار زندگی کے گوں ناگوں مسائل کا اپنے مخصوص انداز سے تجزیہ کرے۔ سچ بات تو یہ ہے کہ زندگی کے مسائل ہی ناول میں دلچسپی اور تحیر کا سبب بنتے ہیں اگر انہیں صحیح انداز میں پیش کیا جائے۔
جہاں تک اردو میں ناول نگاری کا تعلق ہے۔ ڈپٹی نذیر احمد کو پہلا ناول نگار قرار دیا جاتا ہے اور مرأۃ العروس کو پہلا ناول ……. جو ۱۸۶۹ء میں لکھا گیا۔ اس کے اٹھائیس سال بعد حیدر آباد میں مہاراجہ سرکشن پرشاد نے ’’مطلع خورشید‘‘ تحریر کیا جس کو دکن میں لکھا گیا پہلا ناول کہا جا سکتا ہے۔ یہ ناول ۱۳۱۵ھ یعنی ۱۸۹۷ء میں لکھا گیا۔ اس ناول کی تکمیل پر داغ نے قطعہ تاریخ لکھا تھا۔ کہتے ہیں
اے مہاراجہ بہادر شاد
شاد آباد تجھ کو رکھے خدا
خوب ناول نیا کہا دلچسپ
ایسے کہنے کا واہ کیا کہنا
نام اس کا ہے ’’مطلع خورشید‘‘
اس کی تاریخ تھی یہی زیبا
داغ نے یہ کہا ہے مصرع سال
آفتاب سخن بھی اب نکلا
اس ناول میں ایک شریف گھرانے کی لڑکی خورشید آرا کا ذکر ہے جو اتفاق سے مرزا مخمور کو دیکھ کر اس کے عشق میں مبتلا ہو جاتی ہے۔ اس ناول میں شاد نے عورتوں اور خصوصاً گھروں میں کام کرنے والی عورتوں کی زبان، محاورے اور روزمرہ کو بڑی خوبی سے پیش کیا ہے۔ اس دور کے ناولوں کے پلاٹ اور مرکزی خیال کو ملحوظ رکھتے ہوئے ’’مطلع خورشید‘‘ کو کسی اعتبار سے بھی کمتر نہیں کہا جا سکتا۔ ویسے خود مہاراجہ کشن پرشاد اپنی فطری انکساری کی وجہ سے اس ناول بہت معمولی سمجھتے ہیں۔ ایک خط میں لکھتے ہیں۔
’’مطلع خورشید آپ کے پاس بھیجتا ہوں چپ چاپ نظر ے گوش گزرے۔ بائے بسم اللہ سے تائے تمت تک دیکھ جاؤ مگر کہیں اعتراض نہ جڑ دینا۔ مجھے خود ہنسی آتی ہے کہ میں ٹوٹے پھوٹے قصے کو ناول کہہ کر ناول نویسوں کے زمرے میں گویا لہو لگا کر شہیدوں میں داخل ہوتا ہوں۔ یا یوں کہو کہ اس فنِ ناول نویسی کو دھبہ لگاتا ہوں۔ الغرض جو کچھ ہو مگر بک تو دیا ہے ……..‘‘
(رقعات شاد بحوالہ ڈاکٹر حبیب ضیائی)
اسی انکسار نے شاد پر یہ الزام عاید کرنے میں مدد کی کہ شاد خود نہیں لکھتے بلکہ سرشار سے لکھواتے ہیں۔ شاد کے دوسرے ناول ’’چنچل نار‘‘ کے بارے میں تو یہ باتیں بڑے شدومد سے کہی گئیں اور شاد کی زندگی ہی میں ان پر الزام عائد کیا گیا۔ اس کی وجہ شاید یہ تھی کہ شاد طبقہ امرا سے تعلق رکھتے تھے اور امرا کے بارے میں یہ شہرت رہی ہے کہ وہ فن اور علم خریدتے ہیں۔ چنانچہ عبدالماجد دریابادی اور ڈاکٹر حکم چند نیر نے اس کی تردید کی اور ڈاکٹر حبیب ضیاء نے بھی تفصیلی بحث کر کے اس خیال کو غلط بتایا۔ اور انداز بیان میں لکھنوی لہجہ کی وجہ سرشار کے اسلوب کا تتبع قرار دیا۔
شاد کا تیسرا ناول بزم خیال ہے۔ جس میں مشرقی و مغربی تہذیب کا ٹکراؤ بھی ہے اور مذاہب کی اصل پر بحث بھی ! ساتھ ہی شاد نے اس بات کی بھی کوشش کی ہے کہ تہذیب و تمدن اور معاشرت کا نقشہ کھینچنے میں کوئی کمی نہ رہ جائے چنانچہ ہولی، عید، تہوار، شادی بیاہ، جشن وغیرہ کی مختلف رسومات کو اس ناول میں محفوظ کر دیا گیا ہے۔ علاوہ ازیں اس عہد کی ایک اہم تحریک ترقیِ نسواں کا پرتو بھی اس ناول میں نظر آتا ہے اور شاد نے عورت کی اہمیت ثابت کرتے ہوئے تعلیم نسواں پر زور دیا ہے۔ اس ناول میں منظر نگاری اپنے عروج پر ہے۔ منظر نگاری کا یہ انداز شرر کے یہاں بھی ملتا ہے۔ تخیل کی رنگ آمیزی اور بیان کا پر شکوہ انداز جو شرر کے یہاں ہے وہی شاد کے ہاں بھی نظر آتا ہے۔ غنیمت یہ ہے کہ ناقدان ادب نے محض اس وجہ سے یہ نتیجہ اخذ نہیں کیا کہ بزمِ خیال شرر کی تصنیف ہے۔ شاد کے بعد حیدر آباد کی ناول نگاری میں سناٹا نظر آتا ہے۔ البتہ سرشار اور رسوا کے ناول دنیائے ادب میں مہرِ تاباں کی طرح چمکتے نظر آتے ہیں۔ لیکن چوں کہ دونوں کا تعلق حیدر آباد سے نہیں رہا بلکہ یہ صرف ملازمت کے لئے حیدر آباد میں رہے تھے اس لئے ان کے ذکر سے گریز کیا جا رہا ہے۔
۱۹۲۵ء اور ۱۹۳۰ء کے درمیان حیدر آباد کی ایک خاتون طیبہ بیگم نے ’’حشمت النسا‘‘ اور ’’انوری بیگم‘‘ نام سے دو ناول لکھے۔ یہ وہ زمانہ تھا جب ترقیِ نسواں کی تحریک حیدر آباد میں ایک لہر کی طرح ذہن و دل کو متاثر کر رہی تھی اور عورت کے حقوق کے لئے دنیا بھر میں احتجاج کیا جا رہا تھا۔ طیبہ بیگم نے اپنے ان ناولوں میں عورت کے گھریلو مسائل اور تعلیم کے فقدان کی وجہ سے درپیش مسائل کو پیش کرنے کے ساتھ ساتھ حیدر آباد کی مخصوص تہذیب و معاشرت کا بھی کامیاب نقشہ کھینچا ہے۔ طیبہ بیگم کے بعد جو نام سامنے آتا ہے وہ بیگم صغریٰ ہمایوں مرزا کا …… جن کے ناول زہرا یا مشیرِ نسواں میں عورت کا یک نیا روپ پیش کیا گیا۔ صغریٰ ہمایوں مرزا کے اس ناول میں عورت نئے زمانے اور نئی تہذیب کی آنکھ بند کر کے تقلید نہیں کرنا چاہتی بلکہ انہیں پرکھنے کی کوشش کرتی ہے۔ اور مشرقی و مغربی تہذیب کے تمام اچھے اصولوں کو اپنے اندر جذب کر کے ایک مثالی معاشرے کی تشکیل چاہتی ہے۔ وہ یہ چاہتی ہے کہ مغربی تہذیب کی خوبیوں کو اس طرح اپنایا جائے کہ مشرقی تہذیب کی تمام اعلیٰ قدریں باقی رہیں۔ صغریٰ ہمایوں مرزا کا یہ متوازن رویہ ان کے دوسرے ناول ’’سرگزشتِ ہاجرہ‘‘ میں بھی نظر آتا ہے۔ جس کے نسوانی کردار مشرقی تہذیب کا نمونہ بھی ہیں اور مغربی تہذیب سے آراستہ بھی۔
پرسی لیوبک کہتا ہے
’’ناول کے بارے میں کوئی کارآمد بات نہیں کہی جا سکتی جب تک کہ ہم نے اس کی تعمیرو تنظیم کے سوال پر غور اور فکر نہ کی ہو۔ اور کسی خاص مقصد سے کسی نتیجہ پر پہنچنے کے لئے اس کی چھان بین نہ کی ہو ………..ناول کے اس خاص پہلو سے عدم واقفیت کی بنا پر جسے ہم میکا نکی پہلو اور نتیجتاً وہ پہلو کہہ سکتے ہیں جس کا سامنا اور محاکمہ ناگزیر ہے ، ناولوں کے بارے میں ہمارے گفتگو ادھوری رہ جاتی ہے۔‘‘
(شب خون فروری ۶۸)
اور چارلس نیومن کا خیال ہے کہ
’’ناول کے علاوہ کوئی ایسی صنف سخن نہیں ہے جس سے ایسے رد عمل برآمد ہوتے ہیں جو عام طور پر انسانی رشتوں سے متعلق ہوں۔ اور کوئی ایسی صنف سخن نہیں ہے جو اپنے جمالیاتی وجود کے بارے میں اس قدر بے اطمینانی اور بے یقینی کا اظہار کرتی ہو………‘‘
(شب خون اپریل مئی ۸۱ء)
ان دو مفکروں کی آرا کی روشنی میں اگر اردو ناول نگاری کا جائزہ لیا جائے تو حیدر آباد کے ایک اہم ناول نگار عزیز احمد کا نام سامنے آتا ہے جس کا پہلا ناول ہوس ۱۹۳۲ء میں سامنے آیا اور جس نے دنیائے ادب کو اپنی طرف متوجہ کر لیا۔ دلچسپ بات یہ ہے کہ عزیز احمد اس زمانے میں ابھی طالب علم تھے۔ ۳۲ء ہی میں ان کا دوسرا ناول مرمر اور خون منظر عام پر آیا۔ ۴۲ء میں گریز، ۴۶ء میں آگ، ۴۷ء میں ایسی بلندی ایسی پستی اور ۴۹ء میں شبنم لکھی گئیں۔ ہوس چونکہ ابتدائی عہد کی پیدا وار ہے اس لئے اس میں فنی اور فکری گہرائی نظر نہیں آتی۔ اور اس کی تلاش بھی نہیں کرنی چاہئے۔ پھر بھی اس ناول کی اہمیت اس لئے بڑھ جاتی ہے کہ بابائے اردو مولوی عبدالحق نے اس کا دیباچہ لکھا تھا۔ عزیز احمد کا دوسرا ناول مرمر اور خون ہے جس کے بارے میں خود عزیز احمد کا خیال ہے کہ وہ ان کا بدترین ناول ہے۔ عزیز احمد کا سب سے معرکۃ الآرا ناول گریز ہے جس کا مرکزی کردار نعیم، زندگی اور اس کی تلخ حقیقتوں سے گریز کرتا ہے اور اس گریز سے شرمندہ بھی ہے۔ یہ کردار اپنے عہد کا ایک نمائندہ کردار ہے جس میں عصری آگہی بھی ہے اور زندگی کے بارے میں ایک بھرپور رویہ بھی۔ اس ناول میں صیغہ واحد متکلم استعمال ہوا ہے جس کی وجہ سے نعیم کی باطنی کیفیات کی بہتر عکاسی ممکن ہو سکی۔ اور اس کی داخلی کیفیات، ذہنی انتشار اور نفسیاتی الجھنوں کو کھل کر سامنے لایا جا سکا۔ عزیز احمد پر یہ الزام عائد کیا جاتا ہے کہ انہوں نے جنس کو اپنے ناولوں میں اس لئے برتا کہ سستی شہرت حاصل کی جا سکے۔ لیکن بہ نظر غائر جائزہ لیا جائے تو محسوس ہو گا کہ جنس ہماری زندگی کا ایک اہم جزو ہے اور ہم چاہیں یا نہ چاہیں اس سے فرار حاصل نہیں کر سکتے۔ اس سے گریز گویا زندگی سے گریز ہے۔
عزیز احمد کے دوسرے ناولوں ’’ایسی بلندی ایسی پستی‘‘ اور ’’شبنم‘‘ میں بھی حقیقت نگاری ہے لیکن گریز کے مقابلے میں کم۔ ان ناولوں میں عزیز احمد نے قدرے احتیاط سے کام لیا۔ اسلم آزاد کے مطابق عزیز احمد جنسی اور ذہنی طور پر مریض نہیں ہیں اس لئے ان کے یہاں عریانی تو ہے لیکن فحش نگاری نہیں۔ اور پروفیسر یوسف سرمست کے خیال میں عزیز احمد کی ناول نگاری کو صرف جنس کی کسوٹی پر کس کر رد کر دینا صحیح نہیں۔ وہ کہتے ہیں کہ
’’جدید نفسیاتی علم نے انسانی زندگی کی حقیقت شعارانہ عکاسی کے لئے جنسی کیفیات کے اظہار کو لازمی اور ضروری قرار دیا تھا۔ اس لئے عریاں نگاری اور جنس سے دلچسپی پورے جدید عالمی ادب کی امتیازی نشانی بن گئی تھی……… ‘‘
ویسے بھی نئے زمانے کی آہٹ نہ سننا بصیرت کے فقدان کی علامت ہے یہی وجہ ہے کہ مولوی عبدالحق نے عزیز احمد کے پہلے ناول پر دیباچہ لکھ کر اس نوجوان مصنف کی ہمت افزائی کی تھی۔ اور نئے زمانے نئے ادب اور نئے رجحانات کی پذیرائی کی تھی۔ آزادی سے قبل کا اور اہم ناول ابراہیم جلیس کا چور بازار ہے جو ۴۶ء میں منظر عام پر آیا۔ اس ناول میں جلیس نے تعلیم یافتہ مگر بے روزگار نوجوانوں کے مسائل، اس کی ذہنی کیفیات اس کی الجھنیں اور اس کی نفسیات کو پیش کرتے ہوئے ہندوستان کے نچلے متوسط طبقے کی معاشی مسائل کا احاطہ کیا ہے۔ اس ناول کے کردار مہندر، ظفر، نوح اور جلیل خوابوں کی دنیا میں رہتے ہیں۔ تعلیم مکمل کرتے ہی زندگی کی ساری آسائشوں کو اپنے دامن میں سمیٹ لینے کی تمنا لئے جب وہ عملی زندگی میں داخل ہوتے ہیں تو بے روزگاری کا عفریت ان کے سارے خواب بکھیر دیتا ہے۔ ان کرداروں میں صرف نوح ایسا ہے جو ایک سفارش سے ملازم ہو جاتا ہے لیکن باقی کرداروں میں مہندر مرد طوائف بننے پر مجبور ہو جاتا ہے ظفر کی بہن پیشہ کرنے لگتی ہے اور وہ خود تنگ آگر خودکشی کر لیتا ہے۔ جلیل نوح کے گھر رہتا ہے لیکن اس کی بیوی جلیل کو برداشت نہیں کر سکتی۔ نتیجہ میں وہ گاؤں چلا جاتا ہے پھر فوج میں ملازمت اختیار کر لیتا ہے۔ چار دوستوں کی اس دردناک سرگذشت کو کرشن چندر نے بیسویں صدی کا قصۂ چہار درویش قرار دیا تھا۔
آزادی کے بعد ناول نگاروں میں عفت موہانی، واجدہ تبسم، جیلانی بانو، آمنہ ابوالحسن اور رفیعہ منظورالامین اہم ہیں۔ عفت موہانی نے زندگی کے مسائل کا گھریلو انداز میں جائزہ لیا ہے۔ ان کے ناولوں میں معاشرت کو اہمیت دی گئی ہے اور چھوٹے چھوٹے مسائل سے ناول کا ڈھانچہ تیار کیا گیا ہے۔ آمنہ ابوالحسن کا ناول سیاہ سرخ اور سفید ایک اہم ناول ہے۔ جس کا موضوع جنسی نفسیات ہے اور نا آسودگی کے نتیجے میں پیش آنے والی صورت حال کا تجزیہ کیا گیا ہے ……..واجدہ تبسم نے حیدر آباد کے نوابی معاشرے کو پس منظر کے طور پر استعمال کرتے ہوئے جو ناول لکھے وہ کچھ لوگوں کو برے ضرور لگتے ہیں۔ لیکن ان تلخ حقائق سے انکار بھی ممکن نہیں۔ واجدہ تبسم کے قلم میں بے پناہ قوت ہے اور وہ چٹخارے دار زبان میں جنسی معاملات کو پیش کرتے ہوئے اچانک نشتر چبھو دیتی ہیں تو جنس پس منظر میں چلی جاتی ہے اور قاری ایک کسک میں مبتلا ہو جاتا ہے۔ یہی ان کا کمال ہے۔
جیلانی بانو کا ایوان غزل ایک اہم ناول ہے جسے اردو ناول نگاری کا ایک سنگ میل کہنا چاہئے۔ اس ناول میں تین نسلوں کی الجھنیں پیش کی گئی ہیں۔ جیلانی بانو کی خوبی یہ ہے کہ وہ جیتے جاگتے انسانوں کو کردار کی شکل دے دیتی ہیں اور ایک عام آدمی کے عمل اور رد عمل کو بڑی خوبی سے اپنے ناولوں میں سمو دیتی ہیں۔ اس لئے ان کی تحریر میں وہ خواب آلود کیفیت نہیں ملتی جو قرۃ العین کی خصوصیت ہے۔ جیلانی بانو حقائق کو ان کے اصلی روپ میں پیش کرتی ہیں۔ دکن میں ناول نگاری کے اس مختصر تجزیہ سے یہ بات واضح ہوتی ہے کہ اگر چہ دکن میں ناولوں پر زیادہ توجہ نہیں دی گئی لیکن جن لوگوں نے اس فن کو اپنایا انہوں نے اپنا خون جگر جلا کر نئی راہیں بنائیں۔ دکن کی ناول نگاری کی ایک اور اہم خصوصیت یہ ہے کہ یہاں روایت بنائی گئی۔ روایت کی اندھا دھند تقلید نہیں کی گئی ……. اس سلسلے کا آخری نام مظہر الزماں کا ہے جس کا صرف ایک ناول سامنے آیا ہے۔ اور مستقبل میں اس نوجوان سے توقع وابستہ کی جا سکتی ہے کہ وہ نئے ناول کی را ہوں کا نقیب ہو گا۔
***