میں بہت دیر سے اپنے وجود کو نوچ رہا ہوں ، چٹکیاں لے رہا ہوں ، چوٹ لگا رہا ہوں۔ میں جاننا چاہتا ہوں کہ کیا مجھ میں زندگی کی کوئی رمق باقی ہے ؟ میں بہت دیر سے اپنے دماغ کے خوابیدہ خلیوں کو جگانے میں مصروف ہوں ، اپنے دل کے ٹھاٹھیں مارتے ہوئے خون کی حالت دیکھنا چاہتا ہوں ، مگر شاید میرے وجود کی ساری حسیات زنگ آلود ہو چکی ہیں ، میرے دماغ کے تمام تر خلیے مر چکے ہیں ، ٹھاٹیں مارتا ہوا دل کا لہو برف میں بدل چکا ہے اور میری ذات کے اظہار کی تمام علامتیں مٹی میں مٹی ہو چکی ہیں۔ میرے وجود کی گواہی دینے والی تمام قدریں تباہ ہو چکی ہیں ، میرے جسم کو خوب صورتی اور رعنائی عطا کر نے والے تمام لباس وقت کی بے لحاظ و بے قدر ہواؤں کی نذر ہو چکے ہیں۔ ۔ ۔ اور میں اپنے شکستہ و برہنہ وجود کے ساتھ کھڑا ہوا ہوں۔ نہیں جانتا ہوں کہ دنیا کی نظریں ایسے انسان میں کیا تلاش کر رہی ہیں جو اپنے دماغ کے مردہ خلیوں اور اپنے دل کے سرد اور جمے ہوئے لہو کے ساتھ عریاں موجود ہے۔
آپریشن کاپہلا دن۔ ۔ ۔ دوسرا۔ ۔ ۔ تیسرا۔ ۔ ۔ چوتھا۔ ۔ ۔ اور پھر آخری دن بھی گزر گیا۔ میں ساکت و مبہوت ان تمام واقعات سے ایک طرف مٹی میں گڑا رہا۔
کتنی جانیں اپنے بھائیوں کے ہاتھوں جل کر خاکستر ہوئیں ، کتنے ارمان رزقِ خاک ہوئے ، کتنے جواں بدن گولیوں کی آگ پی گئے ، کتنی اَدھ کھلی کلیاں بے لحاظ بارُود سے جھلس گئیں ، کتنے تازہ کھلے پھول مٹی میں روند گئے۔ ۔ ۔ ؟ میں نہیں جانتا۔
باپوں نے اپنے بیٹوں کے زخموں کو کیسے چاٹا یا چاٹا ہی نہیں ، میں نہیں جانتا کہ ماؤں نے اپنی بیٹیوں کو اپنے سینے سے کیسے لگایا یا پھر لگایا ہی نہیں ، میں نہیں جانتا بھائیوں نے اپنی بہنوں کے سروں پر دستِ شفقت کیسے رکھایا پھر رکھا ہی نہیں ، میں نہیں جانتا بے تاب گودیں اپنے وجود کے حصوں کی حدت سے کیسے لذت آشنا ہوئیں یا پھر ہوئیں ہی نہیں۔ میں نہیں جانتا سہاگنوں کے سروں کے تاج کیسے سلامت لوٹے یا پھر لوٹے ہی نہیں۔ جلتی آگ اور کھولتی گولیوں کی بارش نے کتنے گھر اُجاڑے اور کتنے در توڑے ، میں کہاں جانتا ہوں۔ ۔ ۔ رسول مکر م صلی اللہ علیہ و الہٖ و سلم کے سینۂ پاک سے نکلی ہوئی کتاب کی حالت کیا ہوئی، منبر و محراب کی عظمتوں کا کیا بنا، حدیث و فقہ کے اظہاریے کیا ہوئے ؟ میں نہیں جانتا۔ ۔ ۔
وہ ایک شخص۔ ۔ ۔ ایک شخص، جسے ہٹ دھرم، انتہاپسند، خودغرض، ایجنسیوں کا گماشتہ، ریاکار، بڑ بولا، اغوا کار و منتشر دماغ کہا گیا۔ سیکڑوں بے گناہ جانوں کے ضیاع کا قصور وار ٹھہرایا گیا ، کیا ہوا؟ ۔ ۔ ۔ میں نہیں جانتا۔
لوگ جلتے رہے ، پھول گرتے رہے ، کلیاں مسلتی رہیں ، سہاگ لٹتے رہے ، کوکھیں اُجڑتی رہیں ، بیبیاں بے پردہ ہوتی رہیں ، بیٹیاں درد سے بلکتی رہیں ، بھائی زخموں سے کراہتے رہے۔ ۔ ۔ اور۔ ۔ ۔ اور میں ایک طرف زمین میں گڑا رہا۔
کتنے لوگ معبد خانہ میں بھوک اور پیاس سے نڈھال و بدحال رہے ؛ میں نہیں جانتا۔ کون پتے کھا کر اور بارش کے پانی کی بوندیں پی کر زندگی سے جنگ لڑتا رہا اور کون دھوئیں کی آندھیوں سے نبرد آزما رہا، میں نہیں جانتا ہوں۔
آپریشن کا پہلا دن۔ ۔ ۔ دوسرا۔ ۔ ۔ تیسرا۔ ۔ ۔ چوتھا۔ ۔ ۔ اور پھر آخری دن بھی گزر گیا۔ میں زمین میں گڑا ہوا تھا، گڑا ہوا ہوں۔ وہ جگہ جہاں سر و سینہ خالق کے سامنے جھکتے تھے۔ ۔ ۔ خون سے لال تھی۔ ۔ ۔ گولیوں کی آواز مدھم ہوئی تو اس کی جگہ بوٹوں کی آواز نے لے لی۔ میرے بھائی اپنی ’’فتح‘‘ پر بکتر بند گاڑیوں سے سر نکالے ’’وکٹری‘‘ کا نشان بنائے گزرتے رہے ، میرے بھائی اپنی فتح کی داستانیں مسلسل سناتے رہے۔
لوگ چلتے رہے ، جیتے رہے اور میں مرتا رہا۔ ۔ ۔ مرتا رہا۔ اور دُور بیٹھے ہوئے لوگ ہمارا تماشا دیکھتے رہے۔ ہمارا تماشا! کہ ہم نے اپنے ہی ہاتھوں اپنے جسموں کو چھلنی کیا ، اپنی ہی زبانوں سے خود پر زہر اُگلا اور اپنے ہی غلبہ سے خود کو مغلوب کیا۔
اور اب۔ ۔ ۔ اب میں ’’زندہ‘‘ ہوا ہوں تو مجھے اس ظلم کا احساس ہوا ہے ، جو آپریشن کی صورت ظاہر ہوا تھا۔ اب میں احتجاج کروں گا۔ ۔ ۔ پُر امن احتجاج۔ ۔ ۔ غیر مسلح احتجاج۔ ۔ ۔ اور پھر آنے والے دنوں میں ، نئے موقعوں سے مستفید ہوں گا۔ ۔ ۔
یہ احتجاج، دکھ، غم تو چند گھڑی کے ہیں یا پھر دکھلاوے کے۔ ۔ ۔
حیف ، صد حیف! دماغ کے مردہ خلیوں اور سینے کے ٹھنڈے لہو کے باوجود میں خود کو زندہ سمجھتا ہوں ، سمجھتا رہا، سمجھتا رہوں گا۔ ۔ ۔ گولیاں چلتی رہیں گے ، معبدیں پامال ہوتی رہیں گی، سینۂپاک صلی اللہ علیہ و الہٖ وسلم سے نکلی ہوئی باتیں بے قدروں کا نشانہ بنتی رہیں گی ، بوٹوں کی آواز سنائی دیتی رہے گی اور وکٹری کا نشان بنائے ہاتھ اُٹھتے رہیں گے۔
ہم اپنے زخموں کو چاٹتے رہے ہیں ، چاٹتے رہیں گے۔ ۔ ۔
الاماں و الحفیظ! بہروپوں ، خود غرضوں ، مکاروں اور بے ترسوں میں گھری ہوئی یہ قوم اپنے دماغ کے مردہ خلیوں کے باوجود خود کو زندہ سمجھتی ہے ، اپنی نسوں میں جمے ہوئے خون کو زندگی کی علامت تصور کرتی ہے۔ اور آسماں بھی خاموش ہے ، نہ ہی ٹوٹ کر گرا۔ ۔ ۔ اور نہ ہی زمین پھٹی۔ ۔ ۔ مگر میں زندہ ہوں
میں زندہ ہوں ، تبھی تو اس گونجتی آواز
’’تو کیا کوئی معجزہ نہ ہو گا؟
ہمارے سب خواب وقت کی بے لحاظ آندھیوں میں جل بجھیں گے
دونیم دریا و چاہِ تاریک و آتشِ سرد جاں نوازی کے سلسلے ختم ہو گئے کیا؟
تو کیا کوئی معجزہ نہ ہو گا؟
خدائے زندہ! تیری سجدہ گزار بستی کے سب مکینوں کی التجا ہے
کوئی ایسی سبیل نکلے کہ تجھ سے منسوب گل زمینوں کی عظمتیں پھر سے لوٹ آئیں
وہ عفو کی، درگزر کی، مہر و وفا کی بھولی روایتیں پھر سے لوٹ آئیں
وہ چاہتیں ، وہ رفاقتیں ، وہ محبتیں پھر سے لوٹ آئیں۔ ۔ ۔ ‘‘
کو میں نے سنا اور اس کا ہم نوا ہوا۔ ۔ ۔ مگر کیا محض لفظوں ، خواہشوں سے یہ سب ممکن ہوا ہے ؟ اگر ممکن ہوتا تو سانحۂ لال مسجد رونما نہ ہوتا۔ اپنے جسے ایجنسیوں کا آلہ کار کہتے رہے ؛ پیوندِ خاک نہ ہوتا۔
اب خدا جانے کون سرخ رو ہوا؟ ۔ ۔ ۔ اگرچہ ہر ایک خود کو دانا و حق پرست سمجھتا ہے ، میں سوچتا ہوں ، اپنی بات پر جم جانے والوں اور وعدوں کو توڑ کر فخر کر نے والوں میں کتنا فرق ہوتا ہے ؟
بادشاہِ وقت کو للکارنے والے اس شخص کا جرم۔ ۔ ۔ ؟
مسجدوں کی شہادت کا گلہ اور نفاذ شریعت کا مطالبہ سبھی نے کیا۔ ۔ ۔ مگر مجرم ایک وہ۔ ۔ ۔ ؟ آنٹی
کا قضیہ۔ ۔ ۔ مساج سینٹر کی روداد ، ویڈیو سینٹرز کا جلاؤ گھیراؤ۔ ۔ ۔ جرم ہی نہیں بہت بڑے جرائم ہیں۔ ۔ ۔ کراچی میں گرنے والی اڑتا لیس بے گناہ لاشوں سے بھی بڑے۔
بات کچھ اور تھی ، بات کچھ اور ہے۔ جسے ہر ایک جانتا ہے ، مگر زبان پر لانے کی قدرت نہیں رکھتا کہ جان ہر ایک کو عزیز ہے۔
جہاں بولنے والوں کا انجام ’’اس‘‘ کی طرح ہو، وہاں بولنے کی جرأت کون کر ے ؟ جلتی آگ میں کون کو دے کہ، جب یہ ایمان ہی نہ ہو کہ نار گلزار ہو بھی سکتی ہے۔ گھاٹے کا سودا کون کر ے ؟ مگر اُس نے کیا، جان گنوا دی، الزام سر لیے اور لیتا رہے گا۔
اب رونے ، کر لانے والوں کو خبر ہو کہ ، جو سفر بادشاہ نے شروع کیا تھا۔ ۔ ۔ وہ جاری ہے اور رونے والوں کی زندگیوں تک جاری رہے گا۔
بادشاہ کی ڈھیل۔ ۔ ۔ ؟ مذاکرات۔ ۔ ۔ ؟ مذاکرات میں ناکامی۔ ۔ ۔ ؟ وقت پرست عالموں کی خاموشی۔ ۔ ۔ ؟ بادشاہ کے دنیاوی بادشاہ کی خوشی اور بادشاہ کے دوست کی ناراضگی۔ ۔ ۔ ؟ حقیقت کیا ہے ؟ سب جانتا ہوں ، سب جانتے ہیں ، مگر۔ ۔ ۔ !
وقت کے بے ہنگم شور میں اس کی آواز بھی دب گئی تھی۔ ۔ ۔ تو میری آواز کون سنے ؟ چیختا ہوں تو اپنے ہی کانوں کے پردے پھٹتے ہیں۔ ۔ ۔ اور آواز۔ ۔ ۔ آواز تو مردہ چیخوں میں دب بھی چکی۔ ۔ ۔ مر بھی چکی۔
٭٭٭