چاہا تو بہت لیکن اتنا بھی نہیں ہم نے

چاہا تو بہت لیکن اتنا بھی نہیں ہم نے
اک حد سے گزرنے کا سوچا بھی نہیں ہم نے

اک پھول کو جب دیکھا ، کیا جانیے کیا دیکھا
اس پھول کو ڈالی سے توڑا بھی نہیں ہم نے

اس پھول کو چاہا بھی ، اس پھول کو پوجا بھی
پوجا کے بہانے سے چوما بھی نہیں ہم نے

کچھ پھول میں لرزش تھی ، کچھ لہر تھی ڈالی میں
اس لہر کی مستی کو لوٹا بھی نہیں ہم نے

وہ لہر ہوا کی تھی یا موج تھی دریا کی
کب اس نے ہمیں گھیرا ، جانا بھی نہیں ہم نے

جاویدؔ جنوں تھا یا جادو کا اثر کوئی
کیا آپ کے اوپر تھا ، سمجھا بھی نہیں ہم نے