بہت بہہ گئے جو بچائے تھے آنسو

بہت بہہ گئے جو بچائے تھے آنسو
ملے تم تو اب کام آئے ہیں آنسو
حرارت سے اشکوں کی پگھلا نہ پتھر
محبت میں یونہی گنوائے ہیں آنسو
کیا ہے اندھیرے میں جشنِ چراغاں
کہ پلکوں پہ جب جھلملائے ہیں آنسو
ہوا دردِ دل اور بھی جان لیوا
کبھی جب نہ آنکھوں میں آئے ہیں آنسو
غمِ ہجر میں جب بھریں میں نے آہیں
مِرے حال پر مسکرائے ہیں آنسو
کسی درد میں بھی نہ سوکھا یہ دریا
خوشی میں بھی ہم نے لٹائے ہیں آنسو
کسی بے وفا کی محبت میں ساجدؔ
فنا کر کے خود کو کمائے ہیں آنسو
۔۔۔۔۔۔۔۔۔۔۔۔۔۔۔۔۔۔۔۔