بیاد رئیس

مرے عزیز مرے ہم وطن رئیس فروغ
سخن کے دیس میں حُسنِ سخن رئیس فروغ
جواں خیال جواں فکر صاحبِ ایثار
حیات کوہ تھی اور کو ہ کن رئیس فروغ
جیا تو بارِ غمِ دوجہاں اٹھا کے جیا
بہت عظیم تھا نازک بدن رئیس فروغ
ہزار گردشِ دوراں نے کروٹیں بدلیں
روش پہ اپنی رہا گامزن رئیس فروغ
نئے ادب میں صحافت میں شعر گوئی میں
جھلک رہا ہے ترا بانکپن رئیس فروغ
نہ مندمل کبھی ہوں گے تری جدائی کے زخم
سجی رہے گی تری انجمن رئیس فروغ
کھِلے رہیں گے ہمیشہ ترے سخن کے گلاب
رہے گا تا بہ ابد خندہ زن رئیس فروغ
بھُلا سکیں گے نہ تیرے ادب نواز رفیق
ترے خلوص و وفا کا چلن رئیس فروغ
ترے نصیب کا تارا ابھی تو چمکا تھا
ملا شباب میں تجھ کو کفن رئیس فروغ
(اگست ۱۹۸۲ء میں مراد آباد (بھارت) میں پڑھی گئی)
٭٭٭