(Last Updated On: )
بھرم سارا میرا ثنا دا صلہ اے
خدا دی قسم مصطفی دا صلہ اے
کدی وی تجلی دی رم جھم نہ مکسی
مدینے چوں آئی گھٹا دا صلہ اے
خدائی دے دل تیرے نیناں دی مُٹھ وچ
پلک جو جھمکدی ادا دا صلہ اے
شرم توں ہو پتھر گئے پانی پانی
فقط مصطفی دی حیا دا صلہ اے
مِرے دل مدینے دا موسم سہانا
نبی دے قدم دی عطا دا صلہ اے
جفا دے نگر وی وفاواں دا دیوا
ہے جگدا نبی دی وفا دا صلہ اے
خیالاں دی شاہی ہے اعجاز ناویں
سخن جھُمدا رہندا ثنا دا صلہ اے
