بازِیچۂ اطفال ھے دُنیا مِرے آگے

بازِیچۂ اطفال ھے دُنیا مِرے آگے
ھوتا ھے شب و روز تماشا مِرے آگے
اِک کھیل ھے اورنگِ سلیماں مِرے نزدیک
اِک بات ھے اِعجازِ مسیحا مِرے آگے
جُز نام نہیں صُورتِ عالم مُجھے منظُور
جُز وھـم نہیں ھستیِ اشیا مِرے آگے
ھوتا ھے نِہاں گرد میں صحرا مِرے ھوتے
گِھستا ھے جبیں خاک پہ دریا مِرے آگے
مت پُوچھ کہ کیا حال ھے میرا تِرے پیچھے
تُو دیکھ کہ کیا رنگ ھے تیرا مِرے آگے
سچ کہتے ھو خود بین و خود آرا ھُوں نہ کیوں ھوں
بیٹھا ھے بُتِ آئنۂ سِیما مِرے آگے
پِھر دیکھیے اندازِ گُل افشانیِ گُفتار
رکھ دے کوئی پیمانۂ صہبا مِرے آگے
نفرت کا گُماں گُزرے ھے مَیں رشک سے گُزرا
کیونکر کہُوں لو نام نہ اُن کا مِرے آگے
اِیماں مُجھے روکے ھے جو کھینچے ھے مُجھے کُفر
کعبہ مرے پیچھے ھے کلیسا مِرے آگے
عاشق ھُوں پہ معشوق فریبی ھے مِرا کام
مجنُوں کـو بُرا کہتی ھے لیلیٰ مِرے آگے
خوش ھوتے ھیں پر وصل میں یوں مر نہیں جاتے
آئی شبِ ھِجراں کی تمنّا مِرے آگے
ھے موجزن اِک قُلزُمِ خُوں کاش یہی ھو
آتا ھے ابھی دیکھیے کیا کیا مِرے آگے
گو ہاتھ کو جُنبِش نہیں آنکھوں میں تو دم ھے
رھنے دو ابھی ساغر و مِینا مِرے آگے
ھم پیشہ و ھم مشرب و ھم راز ھے میرا
غالبؔ کو بُرا کیوں کہو اچھّا مِرے آگے