(Last Updated On: )
توں جے نظرکرم نہ کردا ، گلیاں دے ککھ چُن دا
سب تیری رَحمت دا صدقہ ، میں ساں کیہڑے کُن دا
میری ذات دے اَندر بھریا کوٹ دا اِک اِک ذرّہ
تیرا کرم سی توںگل لایا میں ساں کہیڑے کَم دا
کینویں شکر گزاراں تیرا کچھ پتہ نہیں لگدا
تیری ثنا ء میں کینویں لکھاں مینوں حرف نہ لبھدا
توں خالق توں مالک میرا ، تیریاں سب تعریفاں
اَزل اَبد تیرے مولا کیہہ آکھاں کیہہ لکھاں
ہر اِک پل ہر لمحہ لمحہ تیرے دَر دَا منگتا
تیرا دَر چھڈ کتھے جاواں ہَور نہیں کجھ دسدا
جھولی خالی لے کے آیاں اینویں نہ ہُن موڑیں
ٹُٹیاں آساں لے کے آیاں ہَور نہ دل نوں توڑیں
سارے مان تے نخرے میرے توں ہی رَکھن والا
تیرے بناں بیتابؔ ایتھے ہے کیہڑا پُچھن والا
****
بشیر بیتابؔ (صادق آباد )
****
بشیر بیتابؔ (صادق آباد )
