احمد حسین مجاہد(ایبٹ آباد)
ہُوں کہ جب تک ہے کسی نے معتبر رکھا ہوا
ورنہ وُہ ہے باندھ کر رختِ سفر رکھا ہوا
مجھ کو میرے سب شہیدوں کے تقدس کی قسم
ایک طعنہ ہے مجھے شانوں پہ سر رکھا ہوا
میرے بوجھل پاؤں گھنگھرو باندھ کر ہلکے ہُوئے
سوچنے سے کیا نکلتا دل میں ڈر رکھا ہوا
اک نئی منزل کی دُھن میں دفعتاً سرکا لیا
اُس نے اپنا پاؤں میرے پاؤں پر رکھا ہوا
تُو ہی دنیا کو سمجھ پروردۂ دنیا ہے تُو
میں یونہی اچھا ہُوں سب سے بے خبر رکھا ہوا
۔۔۔۔۔۔۔۔۔۔۔۔۔۔۔۔۔۔۔۔۔۔
گزر رہی ہے جو مجھ پر بتا کے لے آئے
کوئی نہیں ہے جو اُس کو منا کے لے آئے
گزارنی تھی کڑی شب سو اُس گلی سے ہم
چراغِ نقشِ کفِ پا اٹھا کے لے آئے
مگر یہ ہم تھے کہ لائے تھے اُس الاؤ سے آگ
وہاں سے راکھ تو اب کوئی جا کے لے آئے
وُہ اپنی کار گزاری کی داد چاہتے ہیں
جو عاجزی میں قرینے ریا کے لے آئے
بس اک دیے کے سوا گھر میں کچھ نہ تھا احمد
اُسے بھی سامنے ہم خود ہَوا کے لے آئے
۔۔۔۔۔۔۔۔۔۔۔۔۔۔۔۔۔۔۔۔
پہاڑ پر مجھے رستہ دکھائی دیتا ہے
کئی دنوں سے وُہ تنہا دکھائی دیتا ہے
اتارتا ہوں میں تصویر اُس کی لفظوں میں
مجھے خیال کا چہرہ دکھائی دیتا ہے
فرازِ کوہ سے جب دیکھتا ہُوں بستی کو
تو اُس کا گھر بھی قفس سا دکھائی دیتا ہے
زباں سمجھتا ہوں میں ٹوٹتے ستاروں کی
یہ شہر مجھ کو اجڑتا دکھائی دیتا ہے
برہنہ پیڑ کی شاخوں پہ چاند اترا ہے
مجھے یہ وقت دعا کا دکھائی دیتا ہے
یہ کس دیار کی مٹی مرے خمیر میں ہے
کہ جسم روح سے ہلکا دکھائی دیتا ہے
۔۔۔۔۔۔۔۔۔۔۔۔۔۔۔۔۔۔۔۔۔
سرِ آئینۂ ہر ذرۂ صحرا چمکتا ہے
تری پلکوں کا سایہ سا سراب آسا چمکتا ہے
جھٹک کر ڈالتی ہے جب وُہ بھیگے بال شانے پر
تو نیچے دُور وادی میں کہیں دریا چمکتا ہے
کسی نے آگ میں گوندھا ہے برسوں میری مٹی کو
بدن کے ریشے ریشے میں اک آئینہ چمکتا ہے
یہاں سے کوئی گزرا ہے یقیناً مجھ سے پہلے بھی
درِ امکاں پہ اب بھی شبنمی بوسہ چمکتا ہے
جب آنکھیں خاک ہو جاتی ہیں احمد تب کہیں جا کر
بس اک پل موجۂ خوشبو کا نقشِ پا چمکتا ہے
۔۔۔۔۔۔۔۔۔۔۔۔۔۔۔۔۔۔۔۔۔۔
اپنی تخلیق سے کچھ داد تَو پائی ہوتی
صفحۂ خاک پہ تصویر بنائی ہوتی
میں مسافر تھا طلب کرتا اگر آبِ حیات
اوک میں بھر کے مجھے آگ پلائی ہوتی
چار سُو بکھری یہ آیات تلاوت کرتا
دشت و کہسار کے مکتب میں پڑھائی ہوتی
لے گیا کوئی رسالت، کوئی اعجازِ ہنر
میں نے اے کاش اگر آگ ہی لائی ہوتی
جز ترے اور کو میں دل میں جو آنے دیتا
اُس نے اِس دشت میں دیوار اٹھائی ہوتی
میں کسی گم شدہ دریا پہ کھڑا ہوں احمد
موج ورنہ مرے سر تک کوئی آئی ہوتی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
کوئی خواب میرے وجود میں کہیں ریزہ ریزہ بکھر گیا
مرے ہاتھ کچھ نہ لگا مگر، مرے سر سے بوجھ اتر گیا
وہی پاؤں چومے تھے جو کبھی ،میں نے اضطرابِ وصال میں
وہی پاؤں جاتے ہوئے کوئی،مرے دل پہ رکھ کے گزر گیا
مجھے لینا دینا تو کچھ نہ تھا ، مری بے کلی یونہی رات کو
مجھے اُس گلی میں جو لے گئی ،میں گلی سے ہو کے گزر گیا
۔۔۔۔۔۔۔۔۔۔۔۔۔۔۔۔۔۔۔
بندھی ہے گردشِ افلاک میرے سانسوں سے
یہاں میں اپنے کسی کام سے نہیں آیا
۔۔۔۔۔۔۔۔۔۔۔۔۔۔۔۔۔۔۔۔۔۔۔
دشت تھا ، دھوپ تھی،وُہ یاد بھی آیا ہُوا تھا
ایسی وحشت تھی کہ میں انت مچایا ہُوا تھا
خواب، مٹی کا دیا، نام ،مقام اور کلام
اُس کے قدموں میں رکھا جو بھی کمایا ہُوا تھا
میری ناکام محبت تھی وُہ لیکن اُس نے
مجھ کو مرنے سے بہر حال بچایا ہُوا تھا
چُپ لگی ایسی کہ پوچھا بھی تَو بولا نہ گیا
ابتدا میں تَو بہت شور مچایا ہُوا تھا
کچھ تَو اظہارِ محبت بھی مرا سرسری تھا
کچھ وُہ بے درد بھی انکار پہ آیا ہُوا تھا
اُس نے کچھ ایسی نگاہوں سے مجھے دیکھا تھا
میرا سایہ بھی پسینے میں نہایا ہُوا تھا
مجھ سے لپٹا تو مری پشت سے احمد اُس نے
میرے دشمن کی طرف ہاتھ بڑھایا ہُوا تھا
۔۔۔۔۔۔۔۔۔۔۔۔۔۔۔۔۔۔۔۔۔۔
خود رو تھا دلوں میں کھل گیا تھا
میرا بھی عجیب سلسلہ تھا
کھڑکی پہ جھکی ہُوئی تھیں بیلیں
کمرے میں کوئی معاملہ تھا
پتھر میں دراڑ آ رہی تھی
یا مجھ سے کسی نے کچھ کہا تھا
تُو اور کہیں سے آ رہی تھی
میں اور کہیں گیا ہُوا تھا
۔۔۔۔۔۔۔۔۔۔۔۔۔۔۔۔۔۔۔۔
آسمانوں سے فرشتہ تو نہیں اترے گا
شعر اتریں گے،صحیفہ تو نہیں اترے گا
پار جانا ہے تو دریا میں اترنا ہو گا
سوچتے رہنے سے دریا تو نہیں اترے گا
بات بے بات نہ یاد آئے خدوخال سمیت
وُہ مرے دل سے کچھ ایسا تَو نہیں اترے گا
مکتبِ عشق سے تحصیلِ جنوں کرتا ہُوں
میرے شانے سے یہ بستہ تَو نہیں اترے گا
ہو گئے صبح کے آثار ہویدا بھی تو کیا
اس قفس میں کوئی زینہ تو نہیں اترے گا
غم کے اظہار میں کیا چیز ہے مانع احمد
سر ہی اترے گا، یہ نشہ تَو نہیں اترے گا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
میں گھر سے دُور تھا ، تنہا تھا، بے سہارا تھا
مجھے کسی نے بہت دُور سے پکارا تھا
بہت بھلی تھی وُہ شاخوں سے پھوٹتی ہوئی لَو
شجر کی اوٹ میں شاید کوئی ستارا تھا
زمیں پہ اترا جب انسان تو مرے رب نے
کتاب بعد میں پہلے دیا اتارا تھا
یہ خشک چشمہ ،یہ ٹوٹے مکاں،یہ اجڑا دیار
اسی جگہ پہ کبھی گھونسلہ ہمارا تھا
نمازِ عصر پڑھی تھی مکاں کے ملبے پر
تلاوتِ غمِ انساں میں دن گزارا تھا
۔۔۔۔۔۔۔۔۔۔۔۔۔۔۔۔۔۔۔۔۔۔۔
تجھ حسن سے معاملہ کس آن میں ہُوا
میں تَو جواں ہی میر کے دیوان میں ہُوا
میری متاعِ اول و آخر ہے میرا عشق
وُہ عشق جو کہ عشق کے امکان میں ہُوا
سر پر بنا لیا ہے پرندے نے گھونسلہ
غافل میں خود سے ایسا ترے دھیان میں ہُوا
اُس کو طرح ملی مرے فکر و شعور سے
جو فیصلہ بھی وقت کے ایوان میں ہُوا
میں دکھ تھا کائنات کا جب حد سے بڑھ گیا
میرا ظہور صورتِ انسان میں ہُوا
۔۔۔۔۔۔۔۔۔۔۔۔۔۔۔۔۔۔۔۔۔
وقت کی رفتار ہو جاؤں گا میں
اتنا پر اَسرار ہو جاؤں گا میں
جیسے میرا خواب ہے یہ زندگی
جیسے اب بیدار ہو جاؤں گا میں
بے نیازانہ گزر جائے گا تو
گاؤں کا بازار ہو جاؤں گا میں
دیر سے چشمِ شفق آسا میں تھا
اب سرِ رخسار ہو جاؤں گا میں
دیکھنا ڈھونڈے گی جب منزل مجھے
راہ کی دیوار ہَو جاؤں گا میں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
CHILD LABOUR
مرے بابا نہیں ہیں ناں۔۔!
میں تپتی دوپہر میں
شہر کی سڑکوں پہ اپنے جسم کا
ایندھن جلاتا ہُوں
تَو گھر میں چولہا جلتا ہے
مرے ہاتھوں میں چھالے پڑ گئے ہیں
پاؤں سے چپکی ہُوئی یہ تار کولی ریت
میرے ساتھ روزانہ مرے بستر میں جاتی ہے
مجھے اپنے بدن سے
شہر کی روندی ہُوئی سڑکوں کی
میلی باس آتی ہے
مرے بابا نہیں ہیں ناں۔۔۔!
۔۔۔۔۔۔۔۔۔۔۔
خدا نہیں آرہا
پھر اک دن
اِس غبار آلود رستے سے؍کوئی درویش آئے گا
وُہ بستی کے کناروں پر کھڑی
خلقِ خدا کو گودڑی میں بھر کے
بستی کے چوراہے میں انڈیلے گا
دلوں کو چیرتا بے نُور سناٹا
پھٹی آنکھوں سے اُس کی سمت دیکھے گا
فضا میں جا چکے اُن قافلوں کی گرد ہَو گی
جن کا کارِ منصبی ایسے گئے گزرے علاقوں میں
کہیں خیمے ، کہیں گندم،کہیں کمبل
کہیں بے حوصلوں میں حوصلہ تقسیم کرنا ہے
مگر کب تک ؟؍کہ اب خلقِ خدااک بار پھر
اپنے خدا کی منتظر ہے
دوسرے دیسوں سے آئے قافلے
کب تک برو ئے کار آئیں گے؟
چٹختی پسلیوں کے روزنوں سے
بھوک باہر جھانکتی ہَو گی؍کئی اک ڈولتے پنجر
سرک کر گودڑی کے سائے میں
درویش کے پیروں سے لگ کر پوچھتے ہَوں گے
خدا کب آئے گا؟
صدیوں سے ہَم اپنے خدا کی ؍راہ تکتے ہیں
تَو پھر درویش لاٹھی کے سہارے؍اُٹھ کھڑا ہَو گا
کہے گا
’’میں تمہارے نام اک پیغام لایا ہُوں خدا کا
خالقِ کون و مکاں یہ کہہ رہا ہے
چھوڑ دَو یہ سہل اَنگاری
اٹھاؤ ہَل ، کدالیں، بیلچے اپنے
سنو۔۔۔!افلاک سے کوئی نہ اترے گا۔‘‘
۔۔۔۔۔۔۔۔۔۔۔۔۔۔۔۔۔۔۔
GUILTY LOVE
دعا کو ہاتھ اٹھاؤں تَو دل لرزتا ہے
رگوں میں دوڑتی وحشت بھی کانپ اٹھتی ہے
یہ مرحلہ جو محبت میں ہے مجھے درپیش
اک ابتلا ہے اور اِس کا بیان سہل نہیں
بس اک خدا ہی مرا چارہ ساز ہے لیکن
خدا سے کیسے کہوں بات ہی کچھ ایسی ہے
وُہ حسن جس کے تقدس سے شرمسار تھا عشق
اب اُس کی آنچ مرے دل کو گُد گُداتی ہے
بدن سے آتی ہے بوئے گناہِ نا کردہ
اک آگ سی مرے سینے میں لہلہاتی ہے
مجھے خود اپنے خیالوں سے خوف آتا ہے
خود اپنے ڈر سے مری سانس پھول جاتی ہے
بس ایک بار دھڑکتا ہے بے طرح مرا دل
اور اس کے بعد مری نبض ڈوب جاتی ہے
گناہ کر نہیں سکتا، گناہ سوچتا ہُوں
میں کیا کروں مری اوقات ہی کچھ ایسی ہے
دعا کو ہاتھ اٹھاؤں تَو دل لرزتا ہے
خدا سے کیسے کہوں ،بات ہی کچھ ایسی ہے
۔۔۔۔۔۔۔۔۔۔
ٹوٹی چوڑیاں
بہت کہتا ہُوں
آئندہ کبھی ایسا نہیں ہو گا
مگر پھر بھی
کوئی ٹوٹی ہُوئی چوڑی
کہیں سے مل ہی جاتی ہے
کبھی تکیے کے نیچے سے
کبھی بک شیلف سے
جیبوں سے
البم سے
تَو پھر وُہ پوچھتی ہے
تم سے ملنے کون آیا تھا
یہ کس کی چوڑیوں سے تم
مرے جیون کو گھائل کر رہے ہو
کون ہے وُہ؟
میں اسے کہتا ہُوں
آئندہ کبھی ایسا نہیں ہَو گا
مگر ٹوٹی ہُوئی یہ چوڑیاں۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔
ناجنس کا لمس
وُہ چلتی
تو اس کے دوپٹے پہ
کاڑھے ہوئے پھول
اک ایک کر کے
فضا میں بکھرتے
نئی کونپلیں پھوٹتیں
پھول کھلتے
فضا میں بکھرتے
کوئی پھول جب اپنے ناجنس کا لمس پاتا
تَو شعلہ بھڑکتا
کہیں آئینوں سے
کہیں پانیوں سے
مچلتی ہُوئی راکھ اڑتی
تماشائی سب دیکھتے
دیکھتے اور رستہ بدلتے
مگر میں۔۔۔۔!
مجھے ان پراسرار پھولوں کی
مانوس خوشبو نے
کچھ ایسا پاگل کیا
میں فضاؤں میں اڑتے ہوئے پھول چننے لگا
پھول چنتا رہا
مجھ سے کیا پوچھتے ہو کہانی مری
یہ مرے ہاتھ دیکھو۔۔۔!
مرے ہاتھ ایسے نہیں تھے۔۔۔!!
۔۔۔۔۔۔۔۔۔۔۔۔
آٹھ اکتوبر ۲۰۰۵
پانی تھا میسر ،نہ کفن تھا، نہ دعائیں
بے طور ہر اک پیر و جواں دفن کیا تھا
ملبے سے نکالے تھے کئی پھول، کئی خواب
اب یاد نہیں کس کو کہاں دفن کیا تھا
