ازل سے ابد، انتظار، دکھ کی فصلیں

ارشد خالد(اسلام آباد)

ازل سے ابد

ازل سے ابد

دونوں اک ساتھ تھے

دونوں چلتے گئے

حدِ امکان سے بھی پرے۔۔۔

کہ روش پھر زمانے کی تبدیل ہونے لگی

پھول کھلنے لگے ، ساری سمتیں مہکنے لگیں

کھنکھناتی ہوئی۔۔۔ گیلی مٹِی

عجب ایک پیکرِ میں ڈھلنے لگی

پھر ملائک ۔۔۔۔

سبھی سجدہ ریز تھے

لیکن اک کے سوا

تب ازل سے ابد وہیں رخصت ہوا

پھر سے ملنے کی امید رکھے ہوئے

حدِ امکان سے۔۔۔

اک طرف اک گیا

اک طرف دوسرا!

۔۔۔۔۔۔۔۔۔۔۔۔

انتظار

جبر کا موسم

جب گزرے گا

تب سوچیں گے

شاخِ تمنا کے اُگنے میں

کتنی صدیاں لگتی ہیں

۔۔۔۔۔۔۔۔۔۔۔۔۔

دکھ کی فصلیں

شہرِ تمنا

اب تو ساری

راہیں بھی مسدود ہوئی ہیں

دکھ کی ساری فصلیں اب تو

اُگ آئیں ہیں چہروں پر