(Last Updated On: )
آئے نبی کمال دی معراج ہوگئی
پل ، دن ، مہینے ، سال دی معراج ہوگئی
سرکار مسکرا کے تے انگلی ہلائی اے
چن آکھدا دھمال دی معراج ہوگئی
آقا جدوں سوال توں پہلے نوازیا
سائل دی تے سوال دی معراج ہوگئی
میں ذکر چھیڑیا جدوں اُس بے مثال دا
دنیا دی ہر مثال دی معراج ہوگئی
میں نعت جد پڑھی تے مہک آئی مدینیوں
پھر قال دی تے حال دی معراج ہوگئی
کاغذ ، قلم ، دوات ، سخن کہن وجد وچ
آ نعت وچ خیال دی معراج ہوگئی
اعجاز ویکھ ویکھ ’’محمدﷺ‘‘ دے ’’اسم‘‘ دے
م ، ح ، تے ، م ، د ، دی معراج ہوگئی
