آلام کی صمصام ہے لٹکی ہوئی ہر دم
اے راحم و ارحم
درکار سہارا ہے مرے حال کے محرم
اے راحم و ارحم
عاصی ہوں مکمل مرا آلودہ ہے داماں
اے مطلعِ احساں
اے والیِ کل کر دو عطا روح کا مرہم
اے راحم و ارحم
اے والیِ لولاک مرے ہادیِ اوّل
اے کامل و اکمل
اے لمعِ الٰہی کے علمدارِ مکرّم
اے راحم و ارحم
اے مولا کرو رحم،گدا در سے لگا ہے
درکار دوا ہے
درکار رہائی ہے ہراک دکھ سے مسلّم
اے راحم و ارحم
گمراہی کا مارا ہوں ، سوالی ہوں ، گدا ہو
اور در سے لگا ہوں
اے ہادمِ سُو،کردو عطا رحم دمادم
اے راحم و ارحم
ہو رحم و کرم مولا وسائل کی کمی ہے
اور آس لگی ہے
ہو دُور ہر اک کھٹکا مرے والیِ عالم
اے راحم و ارحم
اے روحِ مہاں ، روحِ رواں،سدرہ کے راہی
اے امرِ الٰہی
سائلؔ کی رہے دہر دروں ساکھ دمادم
اے راحم و ارحم
ہوں اسرہء سرکارؐ کا سائل ارے لوگو
گھائل ارے لوگو
اک عمر کی ہے اعلیٰ کمائی مری مُحکم
اے راحم و ارحم
