اشعر نجمی(تھانے)
سکوت شب کے ہاتھوں سونپ کر واپس بلاتا ہے
میری آوارگی کو میرا گھر واپس بلاتا ہے
میں جب بھی دائروں کو توڑ کر باہر نکلتا ہوں
ہوا کے ناتواں جھونکے کا ڈر واپس بلاتا ہے
اسی کے حکم پہ اس کو میں تنہا چھوڑ آیا تھا
خدا جانے مجھے وہ کیوں مگر واپس بلاتا ہے
اشارے کر رہا ہے دوریوں کا کھولتا ساگر
مجھے ہر شام اک اندھا سفر واپس بلاتا ہے
وہ جن کی ہجرتوں کے آج بھی کچھ داغ روشن ہیں
انھی بچھڑے پرندوں کو شجر واپس بلاتا ہے
۔۔۔۔۔۔۔۔۔۔۔۔۔۔۔۔۔۔۔۔۔۔
انکشاف ذات کے آگے دھواں ہے اور بس
ایک تو ہے ایک میں ہوں آسماں ہے اور بس
آئینہ خانوں میں رقصندہ رموز آگہی
اوس میں بھیگا ہوا میرا گماں ہے اور بس
کینوس پر ہے یہ کس کا پیکر حرف و صدا
اک نمود آرزو جو بے نشاں ہے اور بس
حیرتوں کی سب سے پہلی صف میں خود میں بھی تو ہوں
جانے کیوں ہر ایک منظر بے زباں ہے اور بس
اجنبی لمس بدن کی رینگتی ہیں چینٹیاں
کچھ نہیں ہے ساعت موج رواں ہے اور بس
۔۔۔۔۔۔۔۔۔۔۔۔۔۔۔۔۔۔۔
انکشاف ذات کے آگے دھواں ہے اور بس
ایک تو ہے ایک میں ہوں آسماں ہے اور بس
آئینہ خانوں میں رقصندہ رموز آگہی
اوس میں بھیگا ہوا میرا گماں ہے اور بس
کینوس پر ہے یہ کس کا پیکر حرف و صدا
اک نمود آرزو جو بے نشاں ہے اور بس
حیرتوں کی سب سے پہلی صف میں خود میں بھی تو ہوں
جانے کیوں ہر ایک منظر بے زباں ہے اور بس
اجنبی لمس بدن کی رینگتی ہیں چینٹیاں
کچھ نہیں ہے ساعت موج رواں ہے اور بس
۔۔۔۔۔۔۔۔۔۔۔۔۔۔۔۔۔۔۔۔۔۔۔
تیرے بدن کی دھوپ سے محروم کب ہوا
لیکن یہ استعارہ بھی منظوم کب ہوا
واقف کہاں تھے رات کی سرگوشیوں سے ہم
بستر کی سلوٹوں سے بھی معلوم کب ہوا
سنسان جنگلوں میں ہے موجودگی کی لَو
لیکن وہ ایک راستہ معدوم کب ہوا
شاخ بدن سے سارے پرندے تو اڑ گئے
سجدہ تیرے خیال کا مقسوم کب ہوا
نسبت کہاں رہی مجھے عصر زوال سے
میرا وجود سلطنت روم کب ہوا
