عجیب رنگ میں تحریر کر لیا ہے مجھے

عجیب رنگ میں تحریر کر لیا ہے مجھے
کسی کے خواب میں تعبیر کر لیا ہے مجھے
اب آئینہ مِری حیرت کا مان رکھتا ہے
ستارہ ساز نے تنویر کر لیا ہے مجھے
رواں ہوئی ہے کوئی موجِ دلنشیں مجھ میں
کہ موسموں نے ہمہ گیر کر لیا ہے مجھے
یہ راستے مِرے پاؤں کو ریگ جانتے ہیں
ہوائے دشت نے زنجیر کر لیا ہے مجھے
مِری بلا سے کوئی خواب زیرِ آب آئے
اور اس پہ شاملِ تقصیر کر لیا ہے مجھے
میں اس لئے تمہیں ہر جا دکھائی دیتی ہوں
تمہاری آنکھ نے تصویر کر لیا ہے مجھے
یہاں پہ کوئی مکیں خوش ہے نہ مکاں سیمابؔ
یہ کیسے شہر میں تعمیر کر لیا ہے مجھے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔