عاجزی و انکساری کا منبع ۔ مولانا محمد ایوب دہلوی

نصیر سلیمی

7 اکتوبر, 2021

عاجزی و انکساری کا منبع: مولانا محمد ایوب دہلویؒ۔ تحریر: نصیر سلیمی

مذکورہ مضمون فروری 2016 میں اردو ڈائجسٹ میں شائع ہوا

مولانا محمد ایوب دہلوی رحمۃ اللہ علیہ ایک عظیم علمی شخصیت تھے۔ ایک ایسی شخصیت جو بیک وقت علومِ قرآنی اور تشریح حدیث میں جہاں اپنا ثانی نہیں رکھتے تھے وہاں درویشی اور بے نیازی ان کے ظاہر و باطن پر حاوی تھی۔ وعظ و تقریر ان کا مشرب علمی تھا، اس لیے تحریر کی جانب طبیعت مائل نہیں تھی۔ اپنے نطق و کلام سے علم کی گرہیں کھولتے رہتے تھے۔ اب ایسے افراد دیکھنے کو آنکھیں ترستی ہیں۔
بر صغیر پاک و ہند میں اسلام کی روشنی تو عرب تاجروں کے ساتھ آئی تھی، مگر اسلام کی دعوت سے اِس خطے میں بسنے والوں کے دلوں کو مسخر کرنے اور اس دعوت کو عام کرنے کے لیے علمائے کرام اور صوفیائے عظام کی ذاتی زندگیوں کے صاف ستھرے کردار نے کلیدی کردار ادا کیا تھا۔ اس خطے کی ایک ہزار سالہ تاریخ پر سرسری نظر ڈالنے سے یہ حقیقت منکشف ہو جاتی ہے کہ علماء و صوفیاء نے قرآن فہمی، احادیث مبارکہ اور سیرت رسول مقبول صلی اللہ علیہ و سلم کی جمع و تدوین، اسوۂ صحابہ اور علم الکلام کی نکتہ رسی میں جو اہم ترین خدمات انجام دیں، اس کی مثال دنیا کے کسی اور خطے میں شاذونادر ہی موجود ہو۔ اس مختصر مضمون میں اس تفصیل کی گنجائش نہیں ہے۔ تاہم ان میں سے کچھ اہم اور بڑے ناموں کے ذکر سے صرف نظر کر کے آگے بڑھنا بھی ممکن نہیں ہے۔ علامہ عبد الحق محدث دہلوی رحمۃ اللہ علیہ، حضرت مجدد الف ثانی رحمۃ اللہ علیہ، ملا عبد الحکیم سیالکوٹی رحمۃ اللہ علیہ، حضرت شاہ ولی اللہ محدث دہلوی رحمۃ اللہ علیہ، شاہ فضل امام خیر آبادی اور بحر العلوم کے نام سے شہرت پانے والے ملا عبد العلی فرنگی علی سے لے کر حضرت شاہ عبد العزیز محدث دہلوی رحمۃ اللہ علیہ، مولانا شاہ اسحٰق دہلوی رحمۃ اللہ علیہ، مولانا عبد الحکیم ٹھٹھوی رحمۃ اللہ علیہ، مولانا احمد علی محدث سہارن پوری رحمۃ اللہ علیہ، مولانا شاہ عبد القادر دہلوی رحمۃ اللہ علیہ، علامہ فضل حق خیر آبادی، مولانا محمد قاسم ناناتوی رحمۃ اللہ علیہ، مولانا ثناء اللہ امرتسری، مولانا احمد رضا خان بریلوی رحمۃ اللہ علیہ، مولانا اشرف علی تھانوی رحمۃ اللہ علیہ، مولانا عبد الحئی فرنگی محلی، مولانا عبد الحق حقانی رحمۃ اللہ علیہ، علامہ انور شاہ کشمیری رحمۃ اللہ علیہ، علامہ غلام دستگیر قصوری رحمۃ اللہ علیہ، مولانا احمد علی لاہوری رحمۃ اللہ علیہ، مولانا سید ابو الاعلیٰ مودودی رحمۃ اللہ علیہ، مولانا سید ابو الحسن علی ندوی رحمۃ اللہ علیہ، مولانا مسعود عالم ندوی رحمۃ اللہ علیہ اور بعد کے لاتعداد علماء کی خدمات ہمارے علوم اسلامی کی تاریخ کا سنہرا باب ہیں۔ بیسویں صدی کی اولین دہائیوں میں بھی ایسے دیدہ ور اور صاحب بصیرت علماء منظرِ عام پر آئے جنھوں نے جدید تقاضوں کے مطابق اسلامی موضوعات کی تفہیم و اشاعت کو اپنا مقصدِ حیات بنایا اور ایسے کارہائے نمایاں انجام دیے جو آج بھی ہمیں دین کے حوالہ سے ہر قسم کی گمراہی سے محفوظ رکھے ہوئے ہیں۔ ماضی قرب کے علماء میں سے ایک عالم دین مولانا محمد ایوب دہلوی رحمۃ اللہ علیہ تھے جو اپنے عہد کے جید اور با عمل بزرگ تھے۔ خدا نے ان کو بلا کا طبّاع ذہن دیا تھا۔ علومِ اسلامیہ کے تمام مضامین میں ان کو مہارتِ تامہ حاصل تھی۔ خصوصاً منطق اور فلسفہ و حکمت میں اور علم الکلام کی نکتہ رسی میں تو بلاشبہ وہ اپنے عہد کے رئیس المتکلمین تھے۔
معروف ادیب اور مولانا محمد ایوب کے معاصر ملا واحدی نے مولانا محمد ایوب دہلوی رحمۃ اللہ علیہ کے بارے میں لکھا ہے کہ ’’وہ تنہا شخص ہیں جنھوں نے اپنے استاد مولانا محمد اسحٰق رام پوری سے پورا فیض حاصل کیا اور ایک چیز تو ایسی حاصل کر لی کہ مولانا محمد اسحٰق پر بھی فوقیت لے گئے‘‘ یعنی مولانا محمد ایوب علمی اور دقیق مضامین ایسی عام فہم زبان میں بیان کرتے ہیں کہ بے پڑھے لکھے مسلمان اور اسلام سے ناواقف غیرمسلم بھی سمجھ لیتے تھے۔ مولانا نے قرآن فہمی کے متلاشی اہل علم کی تشنگی بھی دور کی اور کم علموں کو بھی سادہ اور سہل زبان میں قرآن پاک پڑھنے اور سمجھنے کی راہ دکھائی۔ مولانا کی فکر کی اساس، قرآن پاک اور حدیثِ نبوی صلی اللہ علیہ و سلم پر تھی۔ قرآن پاک کی قدیم و جدید کوئی ایسی تفسیر نہ تھی جو آپ کی نظر سے نہ گزری ہو اور جس کا حوالہ وہ اپنے بیان میں نہ دیتے ہوں۔ ان کی مجالس کی انفرادیت یہ تھی کہ وہاں ہر ایک سوال اٹھاتا اور تسلی بخش جواب پاتا تھا۔ مولانا کی مجلس میں سوال اٹھانا معیوب نہیں، مستحسن تھا۔
مولانا ایوب دہلوی نے 1888ء میں دہلی میں تجارت پیشہ برادری کی پراچہ فیملی میں جناب عبد الرحمٰن کے گھر میں آنکھ کھولی۔ آپ کے والد محترم عبد الرحمٰن پراچہ دہلی میں کپڑے کی تجارت کرتے تھے۔ مولانا نے بھی تحصیل علم کے بعد تجارت ہی کو ذریعہ معاش بنایا۔ مولانا دہلی میں ساڑھیوں کی خرید و فروخت کرتے تھے۔ پھر کراچی آ کر پہلے کپڑے کی تجارت، بعد ازاں ایم اے جناح روڈ پر لائٹ ہاؤس کے قریب شرافت اینڈ کمپنی کے برابر کی دکان میں لیدر گڈس سوٹ کیس اور ہینڈ بیگ کی فروخت شروع کر دی تھی۔ کاروبار سے ان کی دلچسپی بس اتنی ہی تھی کہ اس سے سادگی اور کفایت شعاری کے ساتھ گھریلو اخراجات پورے ہو جائیں اور روز کی دال روٹی کا انتظام ہو جائے۔ اس سے زیادہ کاروبار کی ان کی زندگی میں کوئی اہمیت نہیں تھی۔ مولانا دکان دو چار گھنٹے کے لیے ہی کھولتے تھے۔ جیسے ہی روز کی ضروریات کے مطابق آمدنی ہو جاتی، دکان بند کر کے نکل پڑتے۔ عموماً ظہر کی نماز سے قبل دکان بند کر کے قریبی مسجد میں نماز ادا کرتے اور گھر جا کر کھانا کھاتے، بعد ازاں قرآن پاک کے مطالعہ میں مستغرق رہتے۔ مولانا کا معمول تھا کہ وہ اپنے کھانا اپنے گھر پر افرادِ خانہ کے ساتھ کھاتے۔ کسی نے ان کو گھر سے باہر کسی دوسرے کے دسترخوان پر کھاتے پیتے نہیں دیکھا۔ مولانا گھر کا سودا سلف خود خرید کر لاتے۔ پسند کا گوشت خریدنے کے لیے دو میل پیدل چل کر جاتے۔ مولانا کو اعلیٰ درجہ کا قورمہ پکانے پر کمال حاصل تھا۔ ایک بار دہلی میں ہمدرد دوا خانہ کے مالک حکیم عبد الحمید اور ملا واحدی کی درخواست پر قورمہ تو پکا دیا، مگر خود ان کے ساتھ نہیں کھایا۔ حکیم عبد الحمید اور ملا واحدی نے کھانے پر اصرار کیا تو جواب میں کہا کہ میرا معمول ہے کہ میں گھر والوں کے ساتھ کھانا کھاتا ہوں۔ آپ اصرار کر کے میرے معمولات میں فرق نہ ڈالیں۔
مولانا ایوب دہلوی رحمۃ اللہ علیہ نے ابتدائی تعلیم مروجہ رواج کے مطابق دہلی کی جامع مسجد میں حاصل کی۔ ابتدائی تعلیم اور حفظِ قرآن کے بعد اپنے عہد کے نہایت جید عالم مولانا محمد اسحٰق رام پوری سے قرآن و حدیث، تفسیر و فقہ و منطق و فلسفہ میں تحصیل علم کی۔ مولانا عبد السلام نیازی بھی مولانا اسحٰق کے شاگرد تھے۔
مولانا محمد اسحٰق رام پوری خیر آبادی مکتبہ فکر سے تعلق رکھتے تھے۔ مولانا محمد ایوب دہلوی رحمۃ اللہ علیہ کی فکر بھی خیرآبادی منطقی فکر کی نمائندہ تھی۔ آپ فقہ حنفی کی سختی سے پابندی کرتے تھے۔ چاروں فقہی مسالک کو درست سمجھتے اور کسی ایک کی پابندی کو ضروری مگر اندھی تقلید کے قائل نہ تھے۔ عظمتِ صحابہ (رضوان اللہ علیھم اجمعین) کے بارے میں ان کا قول تھا کہ بعد کے تمام علماء اور صوفیاء کا مرتبہ ایک ادنی صحابی (رضی اللہ عنہ) سے بھی کم ہے۔ ایک صاحب کے سوال کے جواب میں کہ ’مسلمانوں کے انحطاط کا باعث کیا ہے؟‘ مولانا نے فرمایا تھا کہ ’جب سے مسلمانوں نے تقلید پر اتفاق و اتحاد کیا اور تدبر فی القرآن سے ہٹ گئے، وہ ذہنی انتشار کا شکار ہو کر بکھر گئے‘۔ جس سے اندازہ لگایا جا سکتا ہے کہ وہ فقہ حنفی کے مقلد ہونے کے باوجود اندھی تقلید کو امتِ مسلمہ کے حق میں درست نہیں سمجھتے تھے۔ آپ رحمۃ اللہ علیہ اپنے اس قلق کا بڑے دکھ کے ساتھ اظہار کیا کرتے تھے کہ ’’میں نے زندگی بڑا حصہ دوسرے علوم کے حصول میں ضائع کیا۔ اگر میں کلام پاک ہی کا مطالعہ کرتا رہتا تو مجھے سارے علوم یہیں سے مل جاتے۔ یہ کتاب ساری کتابوں پر بھاری اور اس کا علم سارے علوم کا سرچشمہ ہے۔ اس کے مطالعہ سے دل روشن ہو جاتا ہے اور کائنات کے اسرار و رموز سامنے آ جاتے ہیں۔ وہ پردے جو خالق و مخلوق کے درمیان حائل ہیں، بصیرتِ قرآنی سے کھلنے لگتے ہیں‘‘۔ مولانا رحمۃ اللہ علیہ کے مواعظ اور تقاریر روایتی واعظوں کی طرح کی نہیں ہوتی تھیں بلکہ قرآن پاک کے حوالے سے غور و فکر کی طرف مائل کرنے والی ہوتی تھیں۔ اندازِ بیاں خالص علمی ہوتا اور طرزِ استدلال میں منطق، فلسفہ اور علم الکلام کی نکتہ آفرینی ہوتی تھی۔ زبان ایسی سہل اور سادہ استعمال کرتے جس سے عام آدمی بیان کا مقصد اور مفہوم بآسانی سمجھ لیتا تھا۔
ان کی مجالس اہل علم کے لیے ہوتی تھیں مگر مجھ جیسے افراد بھی کچھ نہ کچھ فکر کے موتی لے کر اٹھتے تھے۔ اس ناچیز کو لڑکپن میں یعنی پچاس کی دہائی میں پہلی بار مولانا کے دیدار کا شرف حاصل ہوا تھا اور ان کی مجلس میں بیٹھنے کی پہلی بار سعادت اوائل جوانی یعنی ساٹھ کے عشرے میں حاصل ہوئی تھی جس کا ذریعہ میرے دوست حافظ عزیز الرحمٰن بنے تھے۔ حافظ عزیز الرحمٰن کے والد حکیم لطف الرحمٰن بقائی اور پھوپھا حکیم حافظ محسن الدین بقائی کا مطب ’’سلیمانی دواخانہ“ ٹھٹھائی کمپاؤنڈ میں تھا۔ حکیم حافظ محسن الدین بقائی مولانا کے بچپن کے بے تکلف دوست تھے۔
مولانا کا معمول تھا صبح آ کر دکان کھولتے تھے۔ جتنی دیر میں روز کے اخراجات جتنی آمدنی ہو جاتی تو دکان بند کر کے چل پڑتے، بعض اوقات تو ایسا بھی ہوا ہے، ابھی مولانا دکان کھول ہی رہے ہیں کہ کوئی گاہک ایسا آ گیا جس سے اتنی رقم حاصل ہو گئی جس سے ان کے اخراجات پورے ہو جائیں تو مولانا دوبارہ دکان بند کر کے قریب ہی ٹھٹھائی کمپاؤنڈ میں اپنے دوست حافظ حکیم محسن الدین بقائی کے مطب پر چلے جاتے۔ مولانا کے پہنچتے ہی مطب میں مجلس جم جاتی تھی۔ ایسی ہی مجلس میں مجھے پہلی بار مولانا کی گفتگو سننے کی سعادت حاصل ہوئی تھی۔ گفتگو کا موضوع تھا، ’خدا پر بندے کو یقین کامل کی کیفیت کب نصیب ہوتی ہے؟‘ مولانا سے یہ سوال مجلس میں موجود حاجی بشیر احمد نے کیا تھا، جس پر مولانا نے گھنٹے بھر قرآن و حدیث، سیرت طیبہ اور صحابہ کی زندگی کے واقعات کی روشنی میں سادہ اور عام فہم زبان میں ایسی سیر حاصل گفتگو کی تھی جس کی تاثیر آج بھی روزِ اول کی طرح میرے دل پر نقش ہے۔
اللہ نے قناعت کی زندگی دے کر نفسِ مطمئنہ سے سرفراز کیا تھا، جس نے انھیں زندگی بھر حبِ مال اور حبِ جاہ سے محفوظ رکھا۔ جن افراد نے انھیں دیکھا ہے اور ان کی مجلسوں میں شرکت کی ہے، وہ گواہی دیں گے کہ ان کی زندگی میں دنیا اور اہل دنیا سے اجتناب تھا۔ وہ خلقِ خدا سے تو بے پناہ محبت اور انسیت رکھتے تھے اور کسی حاجت مند کی حاجت پوری کرنے کے لیے کسی دوست سے قرض لے کر ضروریات بھی اس انداز سے پوری کیا کرتے تھے کہ سائل کی عزتِ نفس کو مجروح نہ ہونے دیتے تھے۔ مگر اپنی ذات کے لیے کسی سے کبھی کوئی قرض لیتے اور نہ کوئی مدد قبول کرتے تھے۔ حالانکہ ان کی مجلس میں شرکت کرنے والوں میں صنعت و حرفت سے تعلق رکھنے والے کئی بڑے نام بھی ہوا کرتے تھے جن کی خواہش اور کوشش ہوتی تھی کہ وہ مولانا کی کوئی مالی خدمت کر سکیں مگر مولانا نے کبھی کوئی پیشکش قبول نہیں کی۔ شیخ فضل حسن نے جن کے گھر مولانا اتوار کو درس دیا کرتے تھے۔ ایک بار مولانا کی خدمت میں کلفٹن میں نو تعمیر شدہ ایک گھر کی چابیاں کاغذ میں لپیٹ کر پیش کرتے ہوئے کہا کہ مولانا یہ آپ کے گھر کی چابیاں ہیں، مولانا نے حیرت کے ساتھ چابیاں لینے سے انکار کرتے ہوئے کہا کہ میاں میرے تو گھر میں تالا ہی نہیں ہے، میں وہ چیز کیوں لوں جس کی مجھے حاجت ہی نہیں ہے۔ حالانکہ ضعیف العمری کی وجہ سے آخری دنوں میں مولانا کی صحت اچھی نہیں رہتی تھی۔ پیروں پر ورم بھی آ گیا تھا۔ مگر پھر بھی وہ اسی فلیٹ میں رہے جو ایک کئی منزلہ بلڈنگ کی آخری منزل پر تھا۔ مولانا کی زبان سے تو کسی نے یہ بات نہیں سنی، مگر ان کے قریبی ذرائع سے یہ روایت آتی ہے کہ مولانا فلیٹ تو کیا، اپنے بستر کی جگہ بھی تبدیل نہیں کرنے دیتے تھے اور اصرار کرتے تھے کہ میرا بستر اسی جگہ رہنے دیا جائے۔ وجہ اس کی یہ بتائی گئی کہ اس جگہ انھیں خواب میں رسالت مآب صلی اللہ علیہ و سلم کی زیارت کا شرف حاصل ہوا تھا۔ مولانا کی زندگی اور فکر پر حضرت شاہ عبد العزیز محدث دہلوی رحمۃ اللہ علیہ کا بڑا گہرا اثر تھا۔ وہ اپنے مواعظ اور تقریروں میں اور تفسیر بیان کرتے وقت بھی حضرت شاہ عبد العزیز محدث دہلوی (رح) کی رائے کو ترجیح دیا کرتے تھے۔
مولانا عبد العزیز محدث دہلوی رحمۃ اللہ علیہ سب سے بڑے عالم تھے اور ان کی ذات پر بریلوی، دیوبندی، خیرآبادی اور اہل حدیث کہلوانے والے غیر مقلدین کا بھی اتفاق و اتحاد تھا۔ مولانا کو اللہ نے مختصر اور مفصل گفتگو کرنے پر ملکہ دیا تھا۔ زبان و بیان پر تو قدرت تھی ہی، موضوع اور موقع و محل کے اعتبار سے گفتگو کرتے تھے، وقت کم ہوتا تو پندرہ بیس منٹ میں بھی مدلل بات کر کے رخصت ہو جاتے۔ تفسیر قرآن بیان کرتے تو ایک ایک آیت کی تفسیر میں کئی کئی گھنٹے لگاتے۔ حافظ قرآن تھے اور حافظہ بلا کا تھا۔ قرآن پاک کی آیت کی تفسیر میں پہلے حدیث، سیرت طیبہ صلی اللہ علیہ و سلم اور اسوۂ صحابہ پیش کرنے کے بعد قدیم و جدید مفسرین کی آراء کا ذکر کر کے کسی مفسر کی رائے سے اتفاق اور کسی سے اختلاف کرتے تھے۔ اختلاف میں حفظِ مراتب کا پورا پورا خیال رکھتے تھے۔ ویسے وہ بیک وقت جلالی اور جمالی صفت رکھنے والے بزرگ تھے۔ صبر و تحمل بھی بڑا اور عجز و انکسار بھی تھا، ان کے درس میں ہر مکتبہ فکر کے لوگ موجود ہوتے تھے۔ اور جدید علوم کے وہ ماہرین بھی جو اپنے اپنے شعبوں میں ممتاز مقام رکھتے تھے، ان ماہرین میں ڈاکٹر اشتیاق حسین قریشی، ملا واحدی، چودھری محمد علی (سابق وزیر اعظم پاکستان) ڈاکٹر محمود حسین، پروفیسر ایم ایم احمد، حکیم محمد سعید، حکیم احسن عباسی، اے کے بروہی، ماہر القادری، پروفیسر حسن ریاض، جسٹس عبادت یار خان، جسٹس ظہور الحق، فضل احمد کریم فضلی، مہدی علی صدیقی (سیشن جج)، ڈاکٹر غلام مصطفیٰ خان، نواب صولت علی خان، ذاکر علی خان، مشاق احمد یوسفی، مولانا حسن مثنیٰ ندوی، ڈاکٹر امیر حسین صدیقی، نصراللہ خان، مولانا حکیم قاری احمد پیلی بھیتی (معروف محقق دانش وار خواجہ رضی حیدر کے والد محترم)، علماء کے حلقے میں مولانا حکیم قاری احمد سے مولانا کے بہت قریبی مراسم تھے اور خود مولانا انھیں بہت عزیز رکھتے تھے۔ سلیم احمد، احمد اسحٰق، ڈاکٹر ایوب قادری، سید محمود احمد مدنی، حکیم محسن الدین بقائی، اسماعیل احمد مینائی، اے کے سوما، شیخ فضل حسن، غلام احمد اسماعیل، حافظ محمد سعید سوت والے، سید گوہر علی شاہ گیلانی، حکیم محمود احمد برکاتی، حاجی مولا بخش سومرو، خان بہادر حبیب الرحمٰن، شوکت علی دہلوی، حاجی محمد صالح دہلوی، اسلم ملتانی، محمود احمد خان، حاجی محمد صدیق، حکیم محمد عبد اللہ، مراد خان جمالی، یوسف سیٹھی اور عبد الرحمٰن چھاپرا وغیرہ۔ سابق الیکشن کمشنر سندھ محمود احمد خاں نے تو مولانا کی ’’ختم نبوت“ کے موضوع پر تقریر کا انگریزی زبان میں ترجمہ کیا تھا۔
کراچی میں مولانا محمد ایوب دہلوی رحمۃ اللہ علیہ کے درس کا سلسلہ ملا واحدی، محمد لطیف، اسد ملتانی، حکیم محمد سعید، شیخ فضل حسن، حافظ حکیم محسن الدین بقائی کے مطب سلیمانی دواخانہ اور لسبیلہ چوک پر صدیقی ٹرسٹ میں جاری رہا۔
مولانا محمد ایوب دہلوی رحمۃ اللہ علیہ کا انتقال 13 دسمبر 1969ء کو کراچی میں ہوا اور تدفین میوہ شاہ قبرستان سے متصل جمعیت پنجابی سوداگران دہلی کے نجی قبرستان یوسف پورہ میں ہوئی تھی۔ مولانا نے نصف صدی سے زیادہ اپنی زندگی قرآن فہمی کو عام کرنے میں صرف کی۔ چھبیس ستائیس سال دہلی میں ہمدرد دواخانہ میں، ملا واحدی کے گھر حکیم علی رضا خان اور نواب فیض احمد خاں کے دیوان خانے میں وعظ کی مجالس سے خطاب کیا، بلکہ ملا واحدی کے گھر تو وہ روزانہ بیان کی محفل جماتے تھے۔ ملا واحدی نے لکھا ہے کہ 1947ء تک دہلی میں ان کی تقریروں کی تعداد چھ سات ہزار ہو گئی تھی۔ کراچی میں درس دیتے ہوئے ان کی تقریروں کا بڑا ذخیرہ ہمدرد فاؤنڈیشن کراچی میں اور شیخ فضل حسن کے ہاں کافی تعداد میں موجود تھا۔ کاش مولانا تقریر کی طرح تحریر کی طرف بھی توجہ دیتے تو آج ان کی تصانیف کا بہت بڑا ذخیرہ موجود ہوتا۔ انھوں نے اپنی زندگی میں اپنی تقریریں کسی کو تاجرانہ بنیاد پر شائع کرنے کی اجازت نہیں دی اور نہ ہی اس کام کے لیے کسی کو چندہ کرنے کی اجازت دی۔ مولانا کی جتنی بھی تقریریں کتابی شکل میں موجود ہیں وہ مولانا کے عقیدت مندوں نے اپنے ذاتی خرچ پر مفت تقسیم کے لیے شائع کی تھیں۔ مولانا کی تقریریں مکتبہ رازی اور صدیقی ٹرسٹ سے شائع ہوتی تھیں۔
صدیقی ٹرسٹ نے مولانا کی تقاریر شائع کیں ان پر یہ عبارت بھی واضح طور پر تحریر تھی کہ صدیقی ٹرسٹ اس کتاب کے لیے کسی سے چندہ وصول نہیں کرتا ہے۔ مولانا کی تقریروں کا ایک مجموعہ تین جلدوں پر ’مقالاتِ ایوبی‘ کے نام سے شائع ہوا تھا، جس میں مسئلہ ختمِ نبوت، عورت نبیہ کیوں نہیں ہو سکتی، فتنہ انکارِ حدیث، مسئلہ جبر و قدر پر تقاریر ٹیپ سے ٹرانسکرپٹ کر کے مدوّن کی گئی تھیں۔ رسالت مآب صلی اللہ علیہ و سلم کی بعثت کے حوالے سے تقریر ’مقصودِ کائنات‘ کے عنوان سے شائع ہو چکی ہے۔ اس پر ڈاکٹر اشتیاق حسین قریشی نے بڑا پر مغز پیش لفظ لکھا تھا۔ تفسیر قرآن کی دود جلدیں تفسیر ایوبی کے نام سے شائع ہوئیں تھیں، جلد اول میں اعوذ باللہ، بسم اللہ اور سورۂ فاتحہ کی تفسیر ہے، جب کہ دوسری جلد سورۃ بقرہ کے پہلے رکوع کی تفسیر ہے، تفسیر ایوبی چار سو صفحات کی ہے، اب یہ ساری مطبوعات نایاب ہیں۔ اطلاع ہے کہ اب جناب احمد جاوید کی نگرانی میں ان کے احباب اس علمی ذخیرہ کو شائع کرنے کا انتظام کر رہے ہیں۔ مولانا کی ساری تقریروں کا ذخیرہ چھپ جائے تو یہ آنے والی نسلوں کو قرآن فہمی کی طرف راغب کرنے میں مؤثر کردار ادا کرے گا۔
مولانا کے علمی کارناموں اور اس کے اثرات کے حوالہ سے کسی مبسوط کام کی ضرورت ہے۔ مولانا کے حالاتِ زندگی پر بھی کوئی زیادہ تفصیل سے نہیں لکھا گیا ہے، کچھ معلومات جناب ملا واحدی کی کتاب ’میرے زمانے کی دلی‘ میں ملتی ہیں، یا ڈاکٹر ناصر الدین صدیقی کی کتاب ’بزرگانِ کراچی‘ میں۔ مولانا کے حالات کے بارے میں کچھ زیادہ تفصیل سے سید محمود زین العابدین شاہ راشدی نے اپنی کتاب ’انوارِ علمائے اہل سنت سندھ‘ میں لکھا ہے۔ اب شاید مولانا محمد ایوب (رح) کی اولاد میں سے کوئی زندہ نہیں ہے۔ جب کہ ایک صاحب نے اطلاع دی ہے کہ ان کی ایک صاحب زادی حیات ہیں۔ راقم کی مولانا کے ایک داماد محمد فرید صاحب مالک فریسکو سوئٹ بزنس روڈ کراچی سے راہ و رسم تھی۔ وہ بھی اللہ کو پیارے ہو چکے ہیں۔ محمد فرید کے بیٹے اور پوتے حیات ہیں، وہی اس وقت فریسکو کے مالک ہیں، ان کے پوتے سے ملاقات ہوتی ہے مگر ان کو کچھ زیادہ معلومات نہیں ہیں۔ صدرِ مملکت شیخ ممنون حسین کی بیگم، مولانا کے داماد محمد فرید پراچہ کی سگی بھتیجی ہیں۔ ممکن ہے کہ ان کے پاس مولانا کے بارے میں کچھ مزید خاندانی معلومات ہوں۔
مولانا کی ایک بڑی انفرادیت یہ تھی کہ وہ دوسروں کے کام آتے تھے اور کسی پر یہ راز افشا نہیں ہونے دیتے تھے۔ میرے ایک نہایت عزیز دوست جناب غلام احمد اسماعیل نے مجھے بتایا کہ مولانا نے کسی سے کبھی اپنی ذات کے لیے قرض نہیں لیا، جب بھی لیا کسی ضرورت مند کی ضرورت پوری کرنے کے لیے۔ ان کے منہ سے ایک ہی جملہ نکلتا تھا کہ ’’میاں ہمیں تم سے کچھ ’’ناوے“ کی ضرورت پڑ گئی ہے، ان شاء اللہ تعالیٰ اتنے دنوں میں رب العزت اس کی ادائیگی کا اسی وقت انتظام فرما دیں گے‘‘۔ مجال ہے کہ کبھی ایسا ہوا ہو کہ مولانا کی زبان سے نکلی ہوئی تاریخ اور وقت پر مولانا رقم واپس کرنے نہ آئے ہوں۔ وعدہ ایفا کرنے میں مولانا ایک دن اور ایک گھنٹے کی تاخیر بھی کبھی نہیں ہونے دیتے تھے۔ مولانا کا طریقہ یہ تھا کہ جس کے لیے قرض لیتے تھے، اس سے دریافت کر لیا کرتے تھے کہ ادائیگی کتنے میں ہو سکے گی۔ وہ جتنے دن بتاتا، مولانا واپسی کا کچھ وقت زیادہ کر دیتے، اگر اس نے اپنے وقت پر ادائیگی کر دی تو مولانا اسی دن واپس کر دیتے، اگر دیر کر دی تو مولانا قرض کی واپسی اسی تاریخ کو ضرور کرتے جس کا مولانا نے وعدہ کیا تھا۔ خواہ اس کے لیے کسی دوسرے سے ہی قرض لینا پڑتا۔ میرے دوست نے ایک بار مولانا سے درخواست کی کہ کسی خدمت کا موقع دیں تو جواب دیا کہ اپنے اردگرد دیکھیں اور جس ضرورت مند کی ضرورت پوری کر سکتے ہوں، کر دیں۔
میں یہاں چند اقتباسات جناب ملا واحدی، جناب مشتاق احمد یوسفی اور نصراللہ خان کے مولانا پر لکھے گئے مضامین اور جناب احمد جاوید کے ایک انٹرویو سے نقل کر رہا ہوں۔ جناب ملا واحدی نے اپنی کتاب ’میرے زمانے کی دلی‘ میں لکھا ہے کہ:
نوٹ: زیر نظر سطور ملا واحدی کی کتاب ’’میرے زمانے کی دہلی“ سے مستعار ہیں۔
مولانا محمد ایوب مولانا محمد اسحاق رام پوری کے شاگرد ہیں۔ مولانا محمد اسحاق نے ساٹھ برس لوگوں کو پڑھایا۔ مدرسہ نذیریہ کے طلباء نے ممکن ہے اُن سے کچھ سیکھا ہو۔ لیکن مولانا اسحاق کے تمام گھریلو شاگرد میری طرح کورے ہی رہے۔ میں بھی مولانا محمد اسحاق کا شاگرد ہوں اور مولانا محمد ایوب سے پہلے کا شاگرد ہوں۔
مولانا محمد ایوب تنہا شخص ہیں جنھوں نے مولانا محمد اسحاق سے پورا فیض پایا اور ایک چیز تو ایسی حاصل کر لی کہ اُس میں مولانا محمد اسحاق پر فوقیت لے گئے۔ مولانا محمد اسحاق قرآن، حدیث، فقہ سب علوم میں یکتائے روزگار تھے۔ لیکن منطق اور فلسفہ و حکمت اُن کا خاص مضمون تھا۔ منطق اور فلسفہ و حکمت کا اُنھیں اسپیشلسٹ specialist)) کہنا چاہیے۔ مولانا محمد ایوب نے بھی منطق اور فلسفہ و حکمت میں کمال پیدا کیا ہے۔
منطقیوں کا دماغ عموماً مذہب کے خلاف جایا کرتا ہے۔ لیکن مولانا محمد اسحٰق منطق سے اسلام کی تائید کا کام لیتے تھے۔ مولانا محمد ایوب کی بھی یہی روش ہے اور اس روش پر چلنے کے مولانا محمد ایوب کو مولانا اسحٰق سے زیادہ مواقع ملے ہیں۔
مولانا محمد ایوب تئیس (23) سال کے تھے جب پہلی دفعہ حکیم علی رضا خاں کی تلاش کرتے میرے ہاں پہنچے۔ حکیم صاحب کسی مریض کو دیکھنے آئے ہوئے تھے۔ اُس دن سے 1947ء تک دِلّی میں چھبیس ستائیس برس مسلسل مولانا محمد ایوب مجھ پر کرم فرماتے رہے۔
مولانا محمد ایوب جب بولتے ہیں تو گھنٹوں بولتے ہیں۔ اب ساٹھ سال سے اوپر عمر ہے۔ قریباً چالیس سال سے بول رہے ہیں اور چالیس سال میں بلا مبالغہ چھ سات ہزار تقریریں کر چکے ہیں۔ مشق کا کوئی ٹھکانہ ہے۔
علمی اور دقیق مضامین ایسی عام فہم زبان میں بیان کرتے ہیں کہ بے پڑھے لکھے مسلمان اور اسلام سے ناواقف غیرمسلم سمجھ لیتے ہیں۔ دِلّی میں ایک ہندو صوفی ہیں۔ پنڈت تیلو رام۔ اس کتاب کے ابتدائی صفحات میں اُن کا ذکر کر چکا ہوں۔ پنڈت جی بھی مولانا محمد ایوب کی تقریریں سننے آتے تھے۔ یکایک آنا بند کر دیا۔ میں نے سبب پوچھا۔ ایمان سرکنے لگا تھا اور اس کے لیے دل تیار نہیں تھا۔
مولانا کی تقریریں سننے سے اسلام کے متعلق کوئی شک شبہ باقی نہیں رہ سکتا۔ بولنے کی طرح لکھنے کا چسکہ نہیں ہے (نوٹ از مصنف: اب لکھنا بھی شروع کر دیا ہے)۔ ورنہ اللہ تعالیٰ نے امام غزالی رحمۃ اللہ علیہ کا سا دماغ عطا کیا تھا۔ کسی کو اپنی عقل پر گھمنڈ ہوتا تو وہ مولانا محمد ایوب کی تقریریں سُن لے، اُسے اپنی عقل کی بے بضاعتی کا پتہ لگ جائے گا۔ مولانا محمد ایوب کی عقل کی دست رس ہر مدّعی عقل کی دست رس سے آگے ہے۔ مولانا عقل و عرفان کے سمندر میں اُس تہہ تک پہنچ جاتے ہیں جہاں بڑے بڑے مدعیان عقل نہیں پہنچ سکتے۔
مجھے مولانا محمد ایوب کی تقریروں سے بے حد فائدہ پہنچا ہے۔ میں اُن کے اِس احسان کو کبھی نہیں بھول سکتا۔ خواجہ حسن نظامی کے ذریعہ اللہ نے مذہب کی طرف متوجہ فرمایا تھا، مولانا محمد ایوب کی تقریریں سنوا کر ایمان مستحکم کر دیا۔ مولانا محمد ایوب مجھ سے دس برس چھوٹے ہیں، لیکن میں انھیں اپنا بزرگ سمجھتا ہوں۔ میری تحریر میں تھوڑی بہت کوئی بات ہے تو وہ خواجہ حسن نظامی کی پچاس سالہ ہم نشینی کا نتیجہ ہے اور کسی قدر غور و فکر کرنا مجھے آیا ہے تو مولانا محمد ایوب کی چالیس سالہ صحبت سے آیا ہے۔
مولانا محمد ایوب نے مولویت کو پیشہ نہیں بنایا ہے۔ دِلّی میں پرانی ساڑھیوں کی تجارت کرتے تھے۔ کراچی میں بھی کپڑے کی دوکان ہے۔
(1) دِلّی میں میرے علاوہ حکیم علی رضا خاں اور نواب فیض احمد خاں کے دیوان خانے میں تقریریں کیا کرتے تھے۔
(2) کراچی میں ایک اتوار بیچ جناب اسد ملتانی کے ہاں تقریریں ہوتی ہیں۔ الحمد للہ میں چالیس سال سے مسلسل یہ تقریریں سن رہا ہو۔
(از مصنف) نواب فیض احمد خاں کا دیوان خانہ حکیم اجمل خاں کے دیوان خانے کے بعد میرے زمانے کی دلّی کا سب سے اہم دیوان خانہ تھا۔ اس میں مولانا محمد ایوب کی تقریریں ہی نہیں ہوتی تھیں، مسلمانوں کی تقدیر کے فیصلے بھی ہوتے تھے۔ نواب صاحب کے دیوان خانے کے علاوہ میں نے حکیم اجمل خاں، حکیم رضی الدین خاں، ہز ہائی نس نواب سر امیر الدین احمد خاں والی لوہارو، نواب احمد سعید خاں طالب، ڈپٹی اکرام اللہ خاں، ڈپٹی ہادی حسین خاں اور نواب سلطان مرزا کے دیوان خانے دیکھے ہیں۔ حکیم واصل خاں کا دیوان خانہ بھی دیکھا ہے۔ حکیم عبد المجید کا دیوان خانہ بھی خواب سا یاد ہے۔ اور حکیم محمد احمد خاں اور حکیم غلام کبریا خاں عرف بھورے میاں کے دیوان خانے تو کل کی بات ہے۔
ہاں ایک دیوان خانہ اور تھا۔ محلہ مٹیا محل میں منشی کرم اللہ خاں عرف ننھے خاں کا دیوان خانہ۔ مولانا الطاف حسین حالی اِس دیوان خانے میں پابندی سے آتے تھے۔
تقریریں مولانا محمد ایوب میرے ہاں نواب فیض احمد خاں کے ہاں سے زیادہ کیا کرتے تھے۔ ایک عرصے تکا انھوں نے میرے ہاں مسلسل روزانہ تقریریں کی ہیں۔ لیکن میں اپنے ہاں کے اجتماع کو یا خواجہ محمد شفیع کے ہاں کی اردو مجلس والے اجتماع کو دیوان خانے کی نشست نہیں کہہ سکتا۔ میرے ہاں کا اجتماع اور اُردو مجلس کا اجتماع اپنے اپنے رنگ کے بے مثل اجتماع تھے۔ مگر دیوان خانے کی نشست نہیں تھے۔ 2۔ جناب اسد ملتانی بحیثیت شاعر اور ماہر اقبالیات کسی تعارف کے محتاج نہیں ہے۔ قدرے غیر معروف حوالہ یہ ہے کہ وہ معروف جاسوسی ناول نگار مظہر کلیم ایم اے کے خالو اور سُسر تھے۔ راقم الحروف کے سوال پہ مظہر کلیم صاحب نے کہا کہ انھوں نے اپنی ساس اور بیگم دونوں سے مولانا محمد ایوب دہلوی رحمۃ اللہ علیہ کے بارے میں سن رکھا ہے۔ افسوس کہ زیادہ تفصیل حاصل نہیں ہو پائی۔ از مرتب
’مولانا محمد ایوب رحمۃ اللہ علیہ، مولانا محمد اسحاق رام پوری کے شاگرد ہیں۔ مولانا محمد اسحاق نے ساٹھ برس لوگوں کو پڑھایا، مدرسہ نذیریہ کے طلبہ نے ممکن ہے ان سے کچھ سیکھا ہو، لیکن مولانا کے تمام گھریلو شاگرد میری طرح کورے رہے۔ میں بھی مولانا محمد اسحاق کا شاگرد ہوں اور مولانا محمد ایوب سے پہلے کا شاگرد ہوں۔ مولانا محمد ایوب تنہا شخص ہیں جنھوں نے مولانا محمد اسحاق سے پورا فیض حاصل کیا۔ مولانا محمد اسحاق قرآن، حدیث، فقہ سب علوم میں یکتائے روزگار تھے، لیکن منطق اور فلسفہ و حکمت ان کا خاص مضمون تھا۔ منطق اور فلسفہ و حکمت کا انھیں اسپیشلسٹ کہنا چاہیے، مولانا محمد ایوب نے بھی منطق اور فلسفہ و حکمت میں کمال پیدا کیا تھا۔ منطقیوں کا دماغ عموماً مذہب کے خلاف جایا کرتا ہے، لیکن مولانا محمد اسحاق منطق سے اسلام کی تائید کا کام لیتے تھے۔ مولانا محمد ایوب کی بھی یہی روش ہے اور اس روش پر چلنے کے مولانا محمد ایوب کو مولانا محمد اسحاق سے زیادہ مواقع ملے ہیں۔
مولانا کی تقریریں سننے سے اسلام کے متعلق کوئی شبہ باقی نہیں رہ سکتا۔ مولانا کو بولنے کی طرح لکھنے کا چسکا نہیں ہے۔ ورنہ اللہ نے امام غزالی کا سا دماغ عطا کیا تھا۔ کسی کو اپنی عقل پر گھمنڈ ہو تو وہ مولانا محمد ایوب کی تقریریں سن لے، اسے اپنی عقل کی بے بضاعتی کا پتا لگ جائے گا۔ مولانا عقل و عمران کے سمندر میں اس تہ تک پہنچ جاتے جہاں بڑے بڑے مدعیان عقل نہیں پہنچ سکتے۔ مجھے مولانا محمد ایوب کی تقریروں سے بے حد فائدہ پہنچا ہے۔ میں ان کے اس احسان کو کبھی نہیں بھول سکتا۔ خواجہ حسن نظامی کے ذریعہ اللہ نے مذہب کی طرف متوجہ فرمایا تھا۔ مولانا محمد ایوب کی تقریریں سنوا کر ایمان مستحکم کیا۔ مولانا محمد ایوب مجھ سے دس برس چھوٹے ہیں لیکن میں انھیں اپنا بزرگ سمجھتا ہوں۔ میری تحریر میں تھوڑی بہت کوئی بات ہے تو وہ خواجہ حسن نظامی کی پچاس سالہ ہم نشینی کا نتیجہ ہے اور کسی قدر غور و فکر کرنا آیا ہے، تو مولانا محمد ایوب رحمۃ اللہ علیہ کی چالیس سالہ صحبت سے آیا ہے۔ مولانا محمد ایوب رحمۃ اللہ علیہ نے مولویت کو پیشہ نہیں بنایا، الحمد اللہ میں چالیس سال سے مسلسل یہ تقریریں سن رہا ہوں۔
جناب مشاق احمد یوسفی نے مولانا پر اپنے مضمون ’’ایک اوکھا انوکھا دکاندار‘‘ میں تحریر کیا ہے کہ: ۔
زیرِنظر سطور مشتاق احمد یوسفی صاحب کی کتاب شام شعر یاراں سے مستعار ہیں۔
’فقر و استغناء کا تذکرہ مولانا محمد ایوب دہلوی رحمۃ اللہ علیہ کے ذکر کے بغیر ادھورا رہے گا۔ میں نے مولانا کو اپنے عزیز دوست میاں فضل حسین کے ہاں دیکھا اور گھنٹوں بڑے شوق و ادب سے سنا۔ وہ ان کے ہاں اتوار کے اتوار تشریف لاتے تھے، فضل صاحب ان کے فرمودات بڑی عقیدت اور باقاعدگی سے ریکارڈ کرتے۔ حکیم محمد سعید کے پاس بھی ان کی باتیں بیسیوں کیسٹوں میں محفوظ تھیں جن کے کچھ حصے چھپ چکے ہیں۔ دور ہو یا قریب کہیں بھی جانا ہو، میں نے مولانا کو پیدل ہی آتے جاتے اور دسمبر اور جنوری میں بھی صرف ململ ہی کے کرتے میں دیکھا۔ دقیق سے دقیق نکتے کو باتوں ہی باتوں میں بہت سہل اور سجل پیرائے میں بیان کر دیتے۔ جتنی آسانی سے وہ سمجھاتے اتنی ہی آسانی سے بات سمجھ میں آ جاتی۔ جس موضوع پر گفتگو کرتے، اس کے اختتام پر فوراً اٹھ کھڑے ہوتے۔ چائے، مشروبات، کھانے اور کسی بھی قسم کی تواضع سے پہلے ہی بہ عجلت رخصت ہو جاتے ‘۔
بندر روڈ کے آخری سرے پر میری ویدر ٹاور کے نزدیک مولانا کی لیدر گڈس (چمڑے کے سامان) بالخصوص سوٹ کیسوں کی دکان تھی۔ وہ صبح گیارہ بجے خود دکان کھولتے اور فروختنی اشیاءکو ڈسٹر سے جھاڑ پھونک کر ترتیب سے سجاتے۔ جیسے ہی اتنی بکری (فروخت) ہو جاتی کہ دن کا خرچ نکل آئے، وہ فوراً تالا لگا کے اپنی (beat معمول کا گشت) پر نکل جاتے۔ کبھی ایسا بھی ہوتا کہ پوری طرح دکان کھلنے سے پیشتر ہی بوہنی دن کی دال روٹی جو گے ہو جاتی تو وہ ڈسٹر پھینک پھانک کر دکان کا شٹر گرا دیتے! اکثر و بیشتر دو تین گھنٹے ضرور لگ جاتے۔ آج اور صرف آج کی حاجت و ضروریات سے زیادہ بکری و منافع کے وہ طالب تھے نہ قائل۔ فقر و قناعت کی اس کٹھن روش پر درجۂ کمال تک قائم رہنا اسی حالت میں ممکن ہے کہ وہ بندے کو خیر الرازقین کی حکمت رزاقی پر کامل یقین ہو۔ ان کی عظمت و برگزیدگی کے تو سب ہی قائل تھے لیکن ان کے اہل خانہ اور لواحقین کے توکل اور نہفتہ عظمت پر شاید و باید ہی کسی کی نظر گئی ہو! سلام ہو ان پر۔
مولانا کو جب اور جہاں بھی دیکھا، ایسا ہی لگا کہ بہت جلدی میں ہیں۔ جس عاجلانہ و فقیرانہ شان سے آئے ہیں، اسی طور کہیں اور جانے کی جلدی ہے۔ مولانا نے ساری زندگی اسی وضع و نہج پر گزاری اور پایان عمر بھری بزم کو حسن سماعت میں گم چھوڑ کر جہاں جانا تھا، اسی طور شتابی چلے گئے۔
اپنے عہد کے منفرد کالم نگار اور صحافی نصراللہ خان (مرحوم) نے مولانا پر اپنے تعزیتی کالم میں لکھا تھا کہ: ۔
’’اگرچہ مولوی محمد ایوب رحمۃ اللہ علیہ تابعین اور تبع تابعین کے وقت کے بہت بعد پیدا ہوئے، لیکن ان قدسی صفات بزرگوں کے حالات، کتابوں میں پڑھ کر اور مولوی صاحب کو دیکھ کر یوں لگتا ہے، جیسے مولوی صاحب انھی میں سے ہیں۔ وہی صبر و تحمل، وہی عاجزی و انکساری، وہی شان قلندری، وہی جلال، وہی جمال، وہی سادہ زندگی اور حصول اکل حلال، وہی خود تکلیفیں اٹھانا، دوسروں کا بھلا چاہنا اور ضرورت مندوں کی ضرورتیں پوری کرنا، کلام پاک کے مطالعہ سے کچھ لوگوں پر شریعت کی راہیں روشن ہوتی ہیں اور کچھ لوگوں پر طریقت کی۔ بہت کم لوگ ایسے ہیں جن پر یہ دونوں راستے بیک وقت روشن ہو جاتے ہیں، مولوی صاحب ان قدسی صفات بزرگوں میں سے تھے جن پر دونوں راستے روشن تھے‘‘۔
معروف ادیب، شاعر، دانشور اور مذہبی سکالر جناب احمد جاوید صاحب نے فرائیڈے اسپیشل کو ایک انٹرویو دیتے ہوئے مولانا محمد ایوب دہلوی رحمۃ اللہ علیہ سے متعلق ایک سوال کے جواب میں کہا کہ:
’رہی بات مولانا ایوب دہلوی رحمۃ اللہ علیہ کی، تو بلا خوف تردید کہا جا سکتا ہے کہ وہ ہماری روایت کے آخری متکلم تھے۔ ان کے زیادہ تر موضوعات کلامی تھے، معقولی تھے۔ اگر کبھی متکلم کی حیثیت سے ان کا جائزہ لیا گیا، تو وہ ہماری علم الکلام کی روایت میں سب سے آگے کے لوگوں میں شمار کیے جائیں گے۔ مذہبی فکر کے جو مسائل لاینحل چلے آ رہے تھے ان میں ایک مسئلہ جبرو قدر تھا۔ اس طرح کے مسائل کو مولانا ایوب دہلوی رحمۃ اللہ علیہ نے اس طرح حل کیا کہ ان کی دشواری پڑھنے یا سننے والوں کی نظر سے غائب ہو گئی۔ عقل اپنے آپ کو پورے کا پورا ایمان کے تابع رکھنے کا ارادہ رکھنے کے باوجود اس ارادے کو عملی جامہ پہنانے سے عاجز رہ جائے، تو جو شخص عقل کی اس نارسائی کو دور کرے گا وہ اصل میں متکلم ہو گا۔ متکلم کہتے ہی اسے ہیں جو عقل کے ایمانی کردار کو اس کے دیگر وظیفوں پر غالب رکھ کر دکھا دے۔ مولانا ایوب دہلوی رحمۃ اللہ علیہ گذشتہ سو، دو برس کی روایت میں شاید سب سے بڑا مذہبی ذہن ہیں جنھوں نے عقل کی نارسائی کا ازالہ کیا اور عقل کو ایمانی بننے کے لیے جن دلائل کی ضرورت تھی، وہ دلائل فراہم کیے۔ لیکن افسوس، چونکہ بڑے موضوعات سے ہماری مناسبت ختم ہو چکی ہے اور مولانا کے مخاطبین معمولی لوگ تھے اور اس کے بعد اس معمولی پن میں اضافہ ہوتا چلا گیا، تو اب تو نہ کسی کو جبر و قدر مشکل محسوس ہوتا ہے اور نہ آسان۔ کیونکہ وہ اس سے واقف ہی نہیں ہے۔ اس کا یہ مسئلہ ہی نہیں ہے۔ اس وجہ سے ان کی تعریف و توصیف سامنے نہیں آ سکی۔ مولانا پر مجھے یہ اعتماد رہا ہے اور ہے کہ ایمانیات میں، عقل کی ہر مشکل میں، اسے قائل کرنے کی جیسی صلاحیت ان میں تھی وہ میں نے کسی کی تحریر میں دیکھی نہ تقریر میں۔ یہ ان کا امتیاز تھا۔ شخصیت کے اعتبار سے وہ بہت بڑے آدمی تھے، یعنی بلند کردار اور عمیق علم کو اگر ایک شخص میں جمع دیکھنا ہے، تو آپ مولانا ایوب دہلوی رحمۃ اللہ علیہ کو دیکھیں، یہ تھے مولانا ایوب دہلوی رحمۃ اللہ علیہ‘۔
افسوس۔ یہ تمام باتیں مولانا ایوب دہلوی رحمۃ اللہ علیہ کے ساتھ ختم ہو گئیں، جب کہ قیام پاکستان سے پہلے بھی اور بعد میں بھی کراچی مذہب و ادب کے حوالے سے منفرد تھا۔ یہ شہر صوفیاء، علماء، بزرگان دین اور ادباو شعرا ء کا مسکن تھا۔ جگہ جگہ علمی، فکری اور دینی مجالس کا انعقاد ہوا کرتا تھا اور لوگ بلا تفریق مسلک و مذہب ان میں شریک ہوا کرتے تھے۔ یہ صورت حال ستر کی دہائی تک برقرار رہی۔ مذہبی اور غیر مذہبی انتہا پسندی بالکل نہیں تھی۔ برداشت، تحمل اور درگزر جیسے رویے عام تھے، لوگ ان رویوں سے اخلاص کے ساتھ وابستہ تھے اور انھی روایتوں کی بنا پر شہر میں امن و مان کی صورت حال قائم تھی۔ بعد میں یہ صورت حال مضمحل ہوتی گئی اور رفتہ رفتہ انتہا پسندی کا عفریت ہر طرف ناچنے لگا اور اب ایسا محسوس ہوتا ہے جیسے امن و امان ہی نہیں بلکہ اس شہر سے علم بھی اٹھ گیا ہے۔ اہل علم معدوم ہو گئے ہیں۔ ہر طرف ایک خوف اور بے کیفی عود کر آئی ہے۔ اے اللہ تو ہمارے شہر اور ہمارے ملک کو اپنی اصل کی طرف لوٹا دے تاکہ ہماری آئندہ نسلیں علم و اخلاق سے آراستہ ہو سکیں۔ (آمین)
٭٭
عزیز ابن الحسن

مولانا ایوب دہلوی رحمۃ اللہ علیہ کی ایک نادر و نایاب تقریر جو لطف اللہ خان کے آواز خزانے سے محترم ڈاکٹر محمد خورشید عبد اللہ کی تلاش و سعی کے نتیجے پہلی مرتبہ منظر عام پر آئی ہے۔ مولانا ایک نابغۂ روزگار شخصیت تھے انہیں جاننے والے منطق و کلام میں انہیں غزالئ عصر قرار دیتے ہیں۔ راقم اس قابل نہیں کہ وہ مولانا ایوب رحمۃ اللہ علیہ کے تعارف کے لئے بھی کچھ کہہ سکے، جنہیں ان کے بارے میں کچھ مزید جاننے کا شوق ہو وہ ان کے بارے میں جناب احمد جاوید کی یوٹیوب پر دو تین گھنٹے کی گفتگو سُن سکتے ہیں۔ میں تو بس ان سے تقریبِ تعارف اور ان کے بارے میں چند تاثراتی کلمات ہی عرض کر سکتا ہوں۔ جو ان کی کچھ تحریروں اور زیرِ سماعت اس تقریر سے میں نے اخذ کیے۔
میں مولانا سے سراج منیر اور احمد جاوید کے توسط سے ۱۹۸۷ء میں مولانا کے رسالے ’جبر و قدر‘ کے ذریعے واقف ہوا تھا۔ رسالہ سمجھ میں تو کیا آتا البتہ دو ایک نکتے وہاں ایسے ملے جو آج تک کفایت کرتے ہیں ؛ ایک یہ کہ جو مسئلہ (جیسے تقدیر) جس حال state کا ہو اسے اس حال سے باہر اگر سمجھنے کی کوشش کی جائے گی تو کبھی سمجھ نہیں آئے گا، تمثیل میں انہوں نے جیومیٹری کی کچھ مثالیں دیں ہیں۔ دوسرے یہ کہ اللہ کے ہاں انسان کے مواخذے کا مدار اس کے اختیارِ تمیزی کی صلاحیت پر ہے اور یہی حسِ تمیز ہی اس کی آزادی کی دلیل ہے۔ علاوہ ازیں ان کی مختلف تحریروں میں مجھے جس شے نے متاثر کیا وہ عقل کے استرداد کے بجائے اس کی محدودیت اور اس کے کسی خارجی ہدایت کے محتاج ہونے کے تصور کو بدلائل مبرہن کرنے کی انتھک توضیح ہے۔
زیرِ نظر تقریر

میں بھی یہی عقل کی بحث ہے۔ عام تصور کے برعکس مولانا بارِ امانت اسی عقل کو قرار دیتے ہیں۔ انہوں نے یہ بات بھی بہت مزے کی کہی ہے کہ انسان نے اگر دنیاوی زندگی ہی گزارنی ہو تو پھر یہ ایک اعتبار سے جانوروں کے مماثل ہے اور دوسرے اعتبار سے ان سے بدتر ٹھہرتا ہے۔ کیونکہ اس دنیا میں جو کام جانور ہلکے پھلکے رہ کر(یعنی عقل کا اضافی بوجھ اٹھائے بغیر) با آسانی کر رہے ہیں انسان کو یہی کام کرنے کے لیے عقل کا اضافی بوجھ بھی اُٹھانا پڑ رہا ہے۔ اس بات سے مولانا عقل کے لیے کوئی ایسا وظیفہ ثابت کر رہے ہیں جو محض دنیاوی زندگی گزارنے سے زائد کسی برتر مقصد کے لیے ضروری ہے۔ ان کا کہنا ہے کہ عقل حُسن و قبح میں تمیز کر سکتی ہے تمیز کر کے انہیں ترک یا قبول کر سکتی ہے، مگر وہ اس بات کا فیصلہ نہیں کر سکتی کہ حُسن کیا ہے، قُبح کیا ہے؟ اس کے لیے وہ ہمیشہ کسی خارجی حکم کی محتاج رہتی ہے۔ عقل کی یہ ضرورت صرف وحی سے پوری ہو سکتی ہے۔ وحی کی روشنی میں متحقق ہو چکے حُسن و قبح کو رد کرنے یا اسے قبول کرنے میں عقل پوری طرح با اختیار ہے اور اسی اختیارِ تمیزی، بارِ امانت پر اللہ کے ہاں انسان کا مواخذہ ہو گا۔ اس پوری گفتگو میں مولانا نے ایک اور اہم نکتہ اللہ تعالیٰ کے ارادے اور اس کے امر کے مابین فرق کا بیان کیا ہے۔ کہا کہ اللہ جب کسی کام کا ارادہ کر لیتا ہے تو پھر وہ ہو کر رہتا ہے، اس کے آگے کوئی رکاوٹ نہیں بن سکتا۔ لیکن اللہ کے امر اور حکم کو ماننے یا نہ ماننے کا اختیار انسان کو دیا گیا ہے، اور یہ اختیار بواسطۂ عقل عمل میں آتا ہے۔
ایک آخری بات مولانا ایوب رحمۃ اللہ علیہ کے طرزِ تکلم اور لذتِ تقریر کے بارے میں۔ اب تک مولانا کے اکثر خیالات لوگوں کے سامنے تحریر(جو اصلاً ان کی تقریریں ہی ہیں) میں ہی آئے تھے۔ تحریر میں یہ باتیں قدرے مشکل اور خشک سی لگتی ہیں، مگر ان کی یہ تقریر سُن کر یکسر مختلف تاثر ملتا ہے۔ میرا گمان تھا کہ وہ شاید بہت ٹھہر ٹھہر کر قدرت سپاٹ سے بے تاثیر لہجے میں گفتگو کرتے ہوں گے، مگر یہاں تو ایک ہموار روانی اور بہتے پانی کا سا سماں ہے، تس پہ ان کا خوش آہنگ شستہ اور دھُلا نکھرا لب و لہجہ۔۔ ۔
وہی باتیں جو تحریر میں مشکل نظر آتی تھیں ان کی تقریر کی لذت نے انہیں شیریں تر بنا دیا ہے۔ میرا گمان ہے کہ مولانا کہ یہ تقریر کچھ نہیں تو چالیس پنتالیس برس بعد منظر عام پر آئی ہے۔ آپ تقریر سُنیے اور ڈاکٹر خورشید عبد اللہ کو دعائیں دیجیے، جو ہیں تو میڈیکل ڈاکٹر مگر اس شعر کے مصداق ہیں: ۔ شفق دھنک، مہتاب گھٹائیں تارے، نغمے، بجلی، پھول
اس دامن میں کیا کیا کچھ ہے دامن ہاتھ میں آئے تو؎
بشکریہ: عزیز ابن الحسن
٭٭