آ میڈا جانی اِک گل کراں ہا

دِل مجنوں روز نماشاں آکھے مدہوش تھیواں میخانے جُل
رُوح کافر تے من میلے دَا ہر دَاغ دُوھاں میخانے جُل
پچھوں نیت کے سوہنڑیں ساقی دے جھٹ قیام کراں میخانے جُل
متاں صابرؔ چھیکڑی رات ہووے ساری رات پئیواں میخانے جُل

آ میڈا جانی اِک گل کراں ہا نالے جیوں ہاں تے نالے مراں ہا

اِیتھے پیار والاں دا ویری زمانہ اِیتھے کیں نئیوں ساڈا دُکھڑا ونڈانا
زمانے توں پاسے کتھے ٹُر ونجاں ہا نالے جیوں ہاں تے نالے مراں ہا
آ میڈا جانی اِک گل کراں ہا

مُک جان ہا ساڈے جہیڑے تے رولے دُنیا توں پاسے بہوں دور اولے
کسے اُوکھے تھل وچ لتنڑاں پانواں ہا نالے جیوں ہاں تے نالے مراں ہا
آ میڈا جانی اِک گل کراں ہا

ڈوہیں رَل کے فصلاں دی راکھی کریندے ٹانڈے بھیندے تے چڑیاں اُڈیندے
توتاں دی چھاں تلے سُکھ دے سواں ہا نالے جیوں ہاں تے نالے مراں ہا
آ میڈا جانی اِک گل کراں ہا

فاروقؔ سچی اِے رَب دِی خدائی محبت دے کیتے دُنیا بنڑائی
اِنہاں مورکھاں نوں ایہو گل دَساں ہا نالے جیوں ہاں تے نالے مراں ہا
آ میڈا جانی اِک گل کراں ہا