اپنا ہی خریدار
اسے اس بات کی ہمیشہ خوش فہمی رہی کہ اس کی کتاب گرم کیک کی طرح بک جاتی ہے۔وہ اپنی تحریروں میں اکثر اس بات کا بکھان بھی کرتا رہتا تھا۔
لیکن اس کے پبلشر نے بتایا کہ آدھی کتابیں وہ خود بڑی رقم دے کر خرید لیتا ہے اور آدھی کتابیں ردی میں بک جاتی ہیں۔۔۔۔۔۔۔۔۔۔
گھر کانہ گھاٹ کا
آج برسوں کے بعد جب وہ اپنے گاؤں آیا تو اسے سرکاری گیسٹ ہاؤس میں قیام کرنا پڑا۔اور اس کے بعد مقامی ادیبوں اور شاعروں کوفون کرکے اس نے اپنے پاس بلا لیا۔
دوسرے دن اخبار میں سُرخی لگی کہ فلاں اعزاز یافتہ ادیب جب برسوں کے بعد اپنے گاؤں پہنچا تو اس کے استقبال کے لیے سارا گاؤں دوڑ پڑا۔
یہ خبر بھی اس نے خود بنائی تھی۔۔۔۔۔۔۔۔۔۔
نتیجہ
وہ اردو کا افسانہ نگار تھا۔کہتے ہیں اس نے تین سو سے زیادہ افسانے لکھ کر اردو کے معتبر افسانہ نگاروں کی فہرست میں شامل ہونے کے لیے شعوری کوشش کی۔لیکن جب اردو کے مستنداور معتبرافسانہ نگاروں کا تذکرہ شائع ہواتو اس کا نام تک اس میں شامل نہیں تھا۔جس سے اس بات کا اندازہ لگایا گیا کہ ’’مقبول ترین‘‘ہونا ایک الگ چیز ہے اور معتبر و مستند ہونا دوسری بات ہے۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
