(Last Updated On: )
آقا تیری یاد وچالے اکھیاں دے
کون بھلا ہن کھولے تالے اکھیاں دے
دل دی سیج وچھائی تیرے بیٹھن لئی
نعلین لئی نیں سوہنیا آلے اکھیاں دے
ڈُلھ نہ جاوے دھوون نوری پیراں دا
ٹھلی بیٹھاں میں پرنالے اکھیاں دے
پُتلی نہیں ، ہے جلوہ کالی کملی دا
دِسدے جہڑے تھاں نیں کالے اکھیاں دے
سوہنے جہنوں ڈِٹھا جان لٹائی اوہنے
نقش خدا نیں انجدے ڈھالے اکھیاں دے
ایر کھلے نیں مکھ دی وستی وچ آقا
ٹرگیاں نیں اکھیاں نالے اکھیاں دے
طیبہ وچ اعجاز کدی دفنِی جاواں
لہہ جاون مڑ سارے پالے اکھیاں دے
