(Last Updated On: )
آپ نوں پھبدی اے واہ واہ امامت دی پگ
مقتدی بن کے کھلی ویکھ نبوت دی پگ
دل نوں صدیق بنھائی چا محبت دی پگ
آپ دے پیریں دھری آن کے دولت دی پگ
آپ دے خُلق دا دس کون کرے اندازہ
عمر ورگے نوں بنھا دین عدالت دی پگ
ویکھ عثمان دے سر بنھ کے حیا دی پگ نوں
آپ حیدر نوں عطا کردے شجاعت دی پگ
رات معراج دی عرشاں تے بلا کے رب نیں
آپ دی اکھ نوں عطا کیتی زیارت دی پگ
اک نظر ویکھ کے لجپال بناں دے بگڑی
لبھ پوے فیر کھڑی آپ دی امت دی پگ
نعت خواں ہو کے وی اعجازؔ سٹراں دوزخ وچ
میرے سرکار پنوسن بھلا رحمت دی پگ
