(Last Updated On: )
اردو ادب کی شان تھے منشی پریم چند
اہل نظر کی جان تھے منشی پریم چند
اردو میں روح عصر ہیں ان کی نگارشات
خوش فکرو خوش بیان تھے منشی پریم چند
اجداد ان کے گرچہ قدامت پسند تھے
پر فکر سے جوان تھے منشی پریم چند
کرداروں کے وسیلے سے ان کی زبان میں
لوگوں کے ترجمان تھے منشی پریم چند
٫گودان ٫ہو ٫ غبن ٫ ہو کہ ٫ بازار حسن ہو
فنکار اک مہان تھے منشی پریم چند
بیحد عزیز تھی انھیں انسان دوستی
انسان مہربان تھے منشی پریم چند
سینے میں جن کے برقی تھا اک دردمند دل
وہ حامی کسان تھے منشی پریم چند
