اردو زبان کے ممتاز دانش ور اور صاحب طرز شاعر بسمل شمسی 17/ جنوری 2017ء کو دائمی مفارقت دے گئے تھے ۔تخلیقی ادب کا وہ آفتاب جہاں تاب جو 15/ ستمبر 1936ء کو ریاست پٹیالہ ہندوستان سے طلوع ہوا اور ایک عالم کو اپنے افکار کی تابانیوں سے بقعہء نور کرنے کے بعد 17/ جنوری 2017ء کو فیصل آباد کے افق سے عدم کی بے کراں وادیوں میں غروب ہو گیا ۔ایک زیرک ،فعال اور مستعد تخلیق کار کے ہاتھ سے اجل نے قلم چھین لیا ۔مسلسل سات عشروں تک پرورش لوح و قلم میں مصروف رہنے اور خون دل سے گلشن ادب کو نکھارنے والے حریت فکر کے اس عظیم مجاہد کی یاد میں بزم ادب کے تمام ارکان کے دل سوگوار اور آنکھیں اشک بار ہیں ۔جدیداردو شاعری کو مقاصد کی رفعت میں ہم دوش ثریا کرنے والے اس نابغہ ء روزگار ادیب نے بڑے زوروں سے اپنی تخلیقی صلاحیتوں کا لوہا منوایا۔اردو نظم ، غزل اور نعت کے وہ عظیم تخلیق کار جن کی ادبی خدمات کا ایک عالم معترف تھا ۔ان کے نام کی تعظیم ہر دور میں تاریخ کرتی رہے گی۔بسمل شمسی کا اصل نام محمّد خاں تھا ۔وہ اپنے قلمی نام سے مشہور ہوئے ۔کچھ عرصہ پٹیالوی تخلص بھی استعمال کرتے رہے ۔۔پانچویں کلاس سے نویں کلاس تک کے امتحانات ڈی بی ہائی سکول خانقاں ڈوگراں سے پاس کیے۔۔اس کے بعد میموریل ہائی سکول شیخوپورہ سے میٹرک کا امتحان پاس کیا ۔جب تقسیم ہند کے ہنگامے شروع ہوئے تو آپ اس وقت گورنمنٹ ہائی اسکول شیرانوالہ گیٹ میں پانچویں کلاس میں پڑھتے تھے ۔کچھ عرصہ کے بعد فیصل آباد میں مستقل سکونت کرلی۔اور ادیب عالم کا امتحان فیصل آباد سے پاس کیا جو کے انٹرمیڈیٹ کے برابر ہوتا ہے ۔۔۔بسمل شمسی کے والد محترم کا نام حافظ شمس الدین خاں ، دادا کا نام عمرالدین اور اہلیہ کا نام شمیم اختر تھا ۔تقسیم ہند سے قبل آپ کے والد گورنمنٹ بیکانیر کی فوج میں اور پاکستان میں محکمہ انہار میں پانچ سال پنسال نویس کے عہدے پر کام کرتے رہے ۔جو فوجی ملازمت کے دوران فوج کی ہاکی ٹیم کے کھلاڑی بھی رہے۔۔بسمل شمسی کا تعلق راجپوت گھرانے سے تھا ۔۔آپ کا خاندانی سلسلہ قادریہ چشتیہ تھا ۔۔آپ قادریہ چشتیہ سلسلہ کے خلیفہ مجاز حکیم سائیں غلام محمد جڑانوالہ کے ہاتھ پر بیعت تھے۔ آپ نے محکمہ واپڈا میں بطور کلرک اپنی پیشہ ورانہ زندگی کا آغاز کیا تھا اور اسی محکمہ سے ریٹائرمنٹ لی تھی ۔۔۔شاعری میں آپ جمیل رامپوری سے اصلاح لیتے تھے ۔۔۔آپ کا نعتیہ شاعری مجموعہ "مرے اندر مدینہ بولتا ہے"۔۔نے ادبی دنیا میں ایک خاص پہچان کروائی ۔۔۔۔۔۔ بسمل شمسی وہ قابل مبارک باد کا سخن ور ہے جنہوں نے اپنے دل، اپنی فکر اپنے احساس اور اپنے قلم کو حمد باری تعالی کی تخلیق کے لیے وقف کیے ہوئے ہے۔سعادت فریضہ حج مکمل خلوص اور یکسوئی کے ساتھ اختیار کیا بلکہ اسے ثابت قدمی سے برقرار بھی رکھے ہوئے تھے ۔۔ان کو حمدونعت نگاری سے الفت اور عقیدت وابستہ ہے ۔۔۔ان کا حمدیہ اور مناجاتی کلام یہاں ان کی شاعرانہ صلاحیتوں کا عکس گر ہے وہاں ان کے اس صدق دل اور اخلاص فراواں کا بھی آئینہ دار ہے ۔۔ جو ان کی ہر حمد کے پیکر میں دل بن کے دھڑک رہا ہے ۔بسمل شمسی لوح محفوظ کو پڑھ کر حمد لکھنے کا خواب دیکھتا ہے۔۔
دھرتی ، امبر ، پربت ، صحرا ، جنگل سبزہ زار
قدم قدم پر رنگ بکھیرے داتا کا سنسار
نعت کا یہ آہنگ بسمل شمسی کا ہی اختصاص نہیں ،ہر صاحب شعور کے دل کی پکار ہے ۔وہ ایسے ماحول میں نعت سرا ہیں جو نعت کا حوالہ بنتا ہے ۔۔نعت گو شعرا نے مدحت طرازی محبوب کبریا حضرت محمد مصطفی صلی اللہ علیہ وآلہ وسلم کے باب میں جس طرح مدینہ منورہ کی منظر کشی کی ہےاور اس کے گلی کوچوں اور فضاؤں کو من کی دنیا میں بسا لینے کی اک اچھوتی آرزو اور تمنا کا اظہار جس دل آویز پیرائے میں بیان کیا ہے ،اس سے بے اختیار یہ مصرع نوک زبان پر مچلنے لگتا ہے ۔۔لکھتے ہیں۔
میں جب چاہوں دیکھوں تصور میں بسمل
میرے دل کا آنگن مدینہ مدینہ
بسمل شمسی ایک کہنہ مشق شاعر ہیں خیال آفرینی اور لفظ شناسی کا ہنر خوب جانتے ہیں ، انتخاب مقالات کا بھی لکھا ہے مگر انہیں احساس ہے کہ یہ بارگاہ نہایت محترم ہے یہاں صرف عقیدتوں کو ہی سلام پیش نہیں کرنا، ایمان کے تقاضوں کا بھی حق ادا کرنا ہے۔اسی لئے لفظوں خیال ادب کے جھرمٹ میں ہیں ۔ شمسی شمسی نعت کی حدود کو خوب جانتے ہیں۔وہ شہر محبوب میں خود سپردگی کی کیفیت میں ڈوب کر سانس کی زینت خوشبوئے نعت کو اپنا ہم راز بناتے ہوئے کہہ اٹھتے ہیں۔۔۔
ہے نعت کی خوشبو ہی مرے سانس کی زینت
گلشن میں بدل ڈالا مرے دل کا بیاباں
بسمل شمسی کے دل اندر عقیدت کی یے لو شروع سے تا ابد رہی ۔اس لیے مدینہ مدینہ منورہ کی زیارت ، خواہش ان کے دل میں ہر دم جوان ہے ۔۔وہ اپنے دل کے آنگن میں جھانک کر جذب دروں کی اسی کیفیت کو یوں اپنے دل پر طاری کر لیتے ہیں کہ ان کے قلب و باطن میں یہ تصور جاگزیں ہو جاتا ہے ۔جس کا اظہار بسمل شمسی اس طرح کرتے ہیں ۔۔
مہر و مہ و نجوم کا آتا ہے اس پہ رشک
جس دل میں جاگزیں ہو محبّت رسول کی
بسمل شمسی کا نعتیہ مجموعہ " مرے اندر مدینہ بولتا ہے" جذبوں کا ایک خاص رخ رکھتا ہے ۔یوں تو نعت مدح سرائی ہے مگر اس کے اندر مضامین مدح کا تنوع اس قدر وسیع ہو گیا ہے کہ ایک حساس دل کی ہر تمنا اس کا حصہ بن گئی ہے ۔۔خصائل و شمائل سے شہر آشوب تک کی ہر داستان اس میں سما گئی ہے۔۔مدینہ منورہ سے وابستگی کا یہ عالم ہوا کہ مدینہ منورہ ایک خطہ امن ہی نہ رہا ، امن دلوں کی دھڑکن بن گیا اور محبت شناس وجودوں کے اندر مدینہ بولنے لگا ۔۔۔بسمل شمسی کی زندگی کا حاصل بھی یہی وظیفہ ہے ۔۔مدینہ منورہ کو اتنا پکارا، اتنا چاہا اور یوں چاہا کہ دوریاں ختم ہو گئیں اور مدینہ دل کے جغرافیے کا حصہ بن گیا ۔۔۔۔
سید المرسلین خاتم الانبیاء احبیب خدا سرور دو جہاں
آپ آئے اجالوں کا موسم لیے دور تک مٹ گئے تیرگی کے نشاں
دل تڑپتے ہوئے چین پانے لگے منصفانہ دیے جگمگانے لگے
غم کے مارے ہوئے مسکرانے لگے زندگانی اٹھی لے انگرائیاں
رقص کرتے کھجوروں کے اشجار کو میں بھی دیکھوں مدینے کے بازار کو
تاجدار دو عالم کے دربار کی اپنی پلکوں سے چوموں حسیں جالیاں
کیا شجر کیا چمن کیا یہ سرووسمن کیا فلک کیا زمین کیا یہ کوہ و دمن
ہر طرف سے یہی آرہی تھی صدا آگئے آگئے حامی بے کساں
میں بھی ہوں آپ پر جان ودل سے فدا ہو نگاہ کرم سرور انبیاء
میں بھی ہوں آپ کا بسمل غم زدہ میں نے دیکھا نہیں آپ کا آستاں
بسمل شمسی کی غزل ۔۔۔۔۔
بسمل شمسی کی شاعری میں درد دل کے علاوہ اور بھی بہت کچھ موجود ہے جس کا تعلق زندگی کے نشیب و فراز اور کائنات کی ناقابل انکار حقیقتوں سے ہے ۔ ان کی شاعری میں تجربات زندگی کی تہہ در تہہ پرتیں کھلتی جاتی ہیں ، جن سے عام انسان کی زندگی عبارت ہے ۔ اپنوں کی قہر سامانیاں ، غیروں کی کج ادائیاں اور معشوق کی دل آزاریاں ، یہ تمام عناصر بیک وقت ان کی شاعری میں ایک خاص تاثراتی انداز میں دیکھنے کو ملتے ہیں ۔ غموں کی کارفرمائیاں اور تلخیوں کی زہرناکیاں کچھ اس طرح ان کی شاعری میں سماچکی ہیں ، جن کا بیان لفظوں میں ممکن نہیں ، لیکن ان کی تخلیقات میں انہی تلخیوں اور زہرناکیوں کی خوبصورت آمیزش نے ان کے معاصر شعراء کی صف میں نمایاں طور پر انھیں جگہ دلانے میں کامیابی حاصل کی ہے ۔۔بسمل شمسی نے زندگی کے اچھے اور بُرے دونوں رخ قریب سے دیکھے ہیں۔ وہ ایک حساس انسان ہیں۔ ان کے اشعار میں دردمندی، کسک اور ملال کی جو دبیز لہر پوشیدہ ہے، وہ ان کے د رد بھرے تجربوں کی دین ہے۔ درد و کسک کے اسی احساس نے ان سے روح و دل میں اترجانے والے ایسے پُر اثر اشعار کہلوائے ہیں جو ہر حساس دل کو متاثر کرتے اور اپنا ہم نوا اور معترف بنالیتے ہیں۔ مثال کے طور پر یہ اشعار ملاحظہ کیجئے ۔۔
اب کوئی حسرت کوئی ارماں کوئی خواہش نہیں
اس طرح ٹوٹا ہے دل جڑنے کی گنجائش نہیں
اور بھی دیوار و در پر ہیں حوادث کے نقوش
قصر دل میں تیری یادوں ہی کی آرائش نہیں
وہ بھی تیرے نام لیواؤں میں ہیں شام و سحر
بزم ہستی میں میسر جن کو آسائش نہیں
پھول مانگے تھے دعائےصبح میں پتھر ملے
جائے اب آپ سے کوئی بھی فرمائش نہیں
ناوک رنج و الم نے چھلنی چھلنی کر دیا
سینہء بسمل میں اب زخموں کی گنجائش نہیں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
وہ جھیل میں دنیا کی ہے ایک پھول کنول کا
یوں ہم نے دیا ہے اسے عنوان غزل کا
مفلس کی جوانی کا عالم ہے کہ جیسے
ٹوٹا ہوا فانوس کسی شیش محل کا
اف چشم غزالاں یہ لب و عارض گلگوں
رنگ اس پہ قیامت کہ ملا گندمی ہلکا
آؤ کوئی خورشید سکوں ڈھونڈ کے لائیں
ماحول کے گردوں پہ مسلط ہے دھندلکا
بسمل یہ تمنا تھی ملے کوئی تو ہم راز
افسوس ملا بھی تو ملا پیٹ کا ہلکا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
کیف یوں بےسرور ہے یارو
زندگی غم سے چور ہے یارو
میں نے خود ہی بدل لئے راستے
اس میں کس کا قصور ہے یارو
پوچھتا ہوں میں شب کے ماروں سے
صبح نو کتنی دور ہے یارو
وہ یقینا خدا کے بندے ہیں
جن کو چہروں پہ نور ہے یارو
جانے کب اس کو میں دیکھتا تھا
آج تک بھی سرور ہے یارو
ایک پل بھی گزارنا مشکل
زندہ رہنا تو دور ہے یارو
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
غم بشکل داغ جب تک دلنشیں ہوتا نہیں
شعر کہنے کا تخیل بھی حسیں ہوتا نہیں
آج پت جھڑ ہی سہی پھوٹیں گی کونپلیں
ایک سا موسم کبھی دیکھا نہیں' ہوتا نہیں
حادثات زندگی کچھ سے بنا دیتے ہیں کچھ
خود بخود تو کوئی بھی اندوہگیں ہوتا نہیں
میرے تیرے درمیاں ترکیب خار و گل سہی
کیا کوئی کانٹا کسی گل کے قریں ہوتا نہیں
سوز دل کافی ہے تڑپانے کو اے بسمل تجھے
غم تری رگ رگ میں جب تک جا گزیں ہوتا نہیں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
نیزے جو میرے سینہ گلشن میں گڑے ہیں
نکلیں گے یہ مشکل ہی سے کچھ ایسے اڑے ہیں
یوں فصل بہار سے خزان کھیل رہی ہے
سوکھے ہوئے پتے مرے آنگن میں پڑے ہیں
یہ آپ کے چہرے پہ لہو کس کا ہے روشن
موتی تو میرے ماتھے پہ محنت نے جڑے ہیں
سورج کی تمازت سے تو جل ہی گئے ہوتے
یہ پیڑ بھی شبنم کی برودت سے کھڑے ہیں
دیکھیں گے یہ ساتھ نبھاتے ہیں کہاں تک
کہنے کو تو بسمل تیرے احباب بڑے ہیں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
گلشن میں اب سکوں سے کوئی بہرہ ور نہیں
شبنم کا آج آتش گل پر اثر نہیں
شب کا فسوں تو صبح طرب کا پیام ہے
میں کس طرح کہوں کہ امید سحر نہیں
میرے لہو کا فرش بچھا دو چمن چمن
کلیوں میں حسن پھولوں میں خوشبو اگر نہیں
ممکن ہے کل میں روئے سحر بڑھ کے چوم لوں
لیکن ابھی تو گیسوئے شب سے مفر نہیں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
اس بے مثال ادیب نے ہر ہر مقام پر میں اپنی ادبی
کامرانیوں کے جھنڈ ے گاڑ دئیے۔۔ اردو شاعری کی ایک سربہ فلک چوٹی موت کے بے رحم ہاتھوں زمیں بوس ہو گئی۔۔زمین نے کتنے بڑے آسمان اپنے دامن میں چھپا لیے ہیں ،اس تصور ہی سے کلیجہ منہ کو آتا ہے ۔سب اہل کمال علم وادب کے خورشید جہاں تاب تھے جن کی تابانیوں سے عالمی ادب کا گوشہ گوشہ منور ہو گیا۔۔۔
مقدور ہو تو خاک سے پوچھوں کہ اے لئیم
تو نے وہ گنج ہائے گرانمایہ کیا کئے؟ (مرزا غالب)
