عطاؔ یار علوی کا یومِ ولادت

آج – یکم ؍ جون؍١٩٨١

سر زمین مالیگاؤں کے منفرد لب و لہجہ کے لیے معروف نعت خواں شاعر” عطاؔ یار علوی صاحب “ کا یومِ ولادت…

نام عطاء المصطفیٰ تخلص عطاؔ یار علوی، والد محمّد اسمٰعیلؔ یار علوی یکم جون ١٩٨١ء کو محنت کشوں کے شہر مالیگاؤں میں پیدا ہوئے ۔ ابتدائی عصری تعلیم مقامی دی لائٹ ہائی اسکول مالیگاؤں سے حاصل کی ، ابتدائی دینی تعلیم قدیم درس گاہ خانقاہ اشرفیہ مالیگاؤں سے حاصل کی ۔ شرفِ تلمذ جناب عبدالعزیز ادیبی مالیگاؤی سے حاصل ہوا ۔

عطاؔ یار علوی کے دو نعتیہ مجموعہ کلام شائع ہو چکے ہیں جن کے نام یہ ہیں :

میرا نبی ﷺ ذیشان، سرکار ﷺ کا جلوہ

 پیشکش : اعجاز زیڈ ایچ

معروف شاعر عطاؔ یار علوی کے یومِ ولادت پر منتخب اشعار بطورِ خراجِ تحسین… 

مجھ پہ مولا کا ایسا کرم ہوگیا

میں بھی مدّاحِ شاہِ امم ہوگیا

—

ہر وقت مہکتا ہے گلزار محمّدﷺ کا

فردوس کا ثانی ہے دربار محمّدﷺ کا

—

مَیں نے دربار میں واضح جو کیا عیبِ غزل

تخلیہ کہہ کے شہنشاہِ سخن روٹھ گئے

—

ہیں آشنا مرے آباء سخن کی دولت سے

مَیں اپنے شہر کا سب سے امیر زادہ ہوں

—

گالیاں سُن کر دعائیں جو دِیا کرتے رہے

پیکرِ مہر و وفا اے رحمتِ عالم ہیں آپ

—

میرے لفظوں کو محبّت کی گواہی مل جائے

مجھ کو بھی مملکتِ شعر کی شاہی مل جائے

—

جب تک ہے سانس ذکرِ شہِ بحر و بر نہ چھوڑ

کہتا ہے دل کہ مدحتِ خیرالبشر نہ چھوڑ

—

سر تا پا آپ نور کے پیکر شہِ حجاز

کیسے ہو کوئی آپ کا ہمسر شہِ حجاز

—

اہلِ باطل دہرِ فانی کی ہیں الفت کے حریص

اہلِ حق ہیں ہادیِٔ حق کی محبت کے حریص

—

شان و شوکت سے غرض ہے اور نہ شہرت سے غرض

ہم ثنا خوانوں کو ہے آقاﷺ کی مدحت سے غرض

—

تیری عظمت ابنِ آدم اک طرف

شانِ سرکارِ دوعالم اک طرف

—

وہ باز آنہ سکے گا کبھی عداوت سے

جسے نہیں ہے کوئی واسطہ محبت سے

—

بلند حوصلے سرکش ہَوا کے دیکھتے ہیں

چلو چراغِ محبت جلا کے دیکھتے ہیں

—

اسے نہیں ہے عطاؔ مجھ پہ اعتبار مگر

وہ اعتبار کے قابل ہے کیا کِیا جائے؟

—

اف! یہ جینا بھی کوئی جینا ہے

موت کی یاد بھی نہیں آتی

—

گمنام جب تھے آپ تو شیریں بیان تھے

شہرت ملی تو آپ کا لہجہ بدل گیا

—

سنا ہے بزمِ ادب میں ہے دبدبہ اس کا

جسے ادب کا ابھی تک "الف" نہیں آتا

—

اپنے محور سے ہٹ گیا سورج

تم نے چاہا پلٹ گیا سورج

—

مَیں بھی خسرو کی طرح شعر کہوں رقص کروں

کاش! مجھ کو کوئی محبوبِ الٰہی مل جائے

—

عاجزی تجھ کو سیکھنا ہے اگر

تو فقیروں کے ساتھ بیٹھا  کر

عطاؔ یار علوی 

انتخاب : اعجاز زیڈ ایچ