اسیں آں پاکستانی سانوں نفرت اے بے ایمانی توں

اسیں آں پاکستانی سانوں نفرت اے بے ایمانی توں

ہر کام کرئیے سُچّا سُتھرا رہیے دُور شیطانی توں

وچھے دس کے مجھاں ویچن سُچّا کام قصائیاں دا

اک بلیڈ نال پینتی (35) داڑھیاں مُنناں کام اے نائیاں دا

کھوئے وچ لاوندے آلو ویکھو کسب حلوائیاں دا

پاویں سارا ای چھیتی بھوس جے ذرا جی بے تیانی توں

اسیں آں پاکستانی سانوں نفرت اے بے ایمانی توں

بے ایمانی توں قسم اے ساڈی کوئی اینوں پنّنے نہ

لا الہ وی پڑھ پُڑھ لئی دا جے کوئی چھیتی منّے کا

لو دا ڈالر سانوں ساویں سودا کیتا انّے ناں

اندرو اندری تنگ بڑے آں امریکی تے افغانی توں

اسیں آں پاکستانی سانوں نفرت اے بے ایمانی توں

شان عزلاں دے چوڑل لائیے پالش کر کے ریٹ ودائیے

مرچاں دے وچ بُورا پائیے پانی پا کے دودھ ودائیے

حرام کمائی توں توبہ ساڈی جِنّاں لبھ جے اوہناں کھائیے

سانوں رب انسان بنایا اسیں آں دور انسانی توں

اسیں آں پاکستانی سانوں نفرت اے بے ایمانی توں

وچ سکولاں گھپاں وجن مُنڈے بستے چھڈ کے پجّن

کُڑیاں پاون پینٹاں شرٹاں ننگے سر نوں کدی نہ کجّن

روز کراون خانہ داریاں مِسّاں حلویاں نال نہ رجّن

کِنّے اج سبجیکٹ پڑھائے نی پوچھے کون استانی توں

اسیں آں پاکستانی سانوں نفرت اے بے ایمانی توں

کالیاں کوٹاں والے ایتھے تڑیاں لاون ججاں نوں

جناں پنج ست بندے مار لے اوہ ای ٹُر گے حجّاں نوں

سارے ایتھے دا ای لاوندے کون نبھوندا لجّاں نوں

ہر کوئی اپنا فرض نبھائے تے بچیا رے پریشانی توں

اسیں آں پاکستانی سانوں نفرت اے بے ایمانی توں

شربت جوس تے قُلفیاں والے کھان دی تھاں سکرین ملوندے

ویسن دی تھاں کول کے آٹّا پکوڑیاں والے ڈنگ ٹپوندے

جنّنی مرضی لسّی پادیاں پانیاں تے کدوں مکھن آوندے

بوہتی بوف تے تھوڑا دہی باقی کم لیئے مداھنی توں

اسیں آں پاکستانی سانوں نفرت اے بے ایمانی توں

اِکّو محکمہ صاف رہ گیا رشوت توں مزدوراں دا

وڈیاں واسطے شورا بنیا لہو سی بے قصوراں دا

اللہ ایہناں نوں جنت دے وے لین نظارہ حُوراں دا

اگلے پاسے ای پج جان سارے دوزخ ناگہانی توں

اسیں آں پاکستانی سانوں نفرت اے بے ایمانی توں

عوام نوں ہر شے پُوری دیئے پانی بجلی گیس وی

ڈالر سارے کول ای رکھیے تھوڑی کرئیے عیش وی

بوہتے سانوں چنگا آکھن تے تھوڑے آکھن نیش وی

ہر ویلے اسیں توبہ کرئیے فحاشی تے عُریانی توں

اسیں آں پاکستانی سانوں نفرت اے بے ایمانی توں

مسلمانی نوں سامنے رکھیے بے ایمانی سانوں جچدی کوئی نئی

ہر شے وچ ملاوٹ کرئیے خالص عوام نوں پچجدی کوئی نئی

تائیوں ہر شے پاکستانی بے ایمانی توں بچ دی کوئی نئی

فیر وی خوش عوام نئی ہوندی ساڈی ایس قربانی توں

اسیں آں پاکستانی سانوں نفرت اے بے ایمانی توں

یونس ایتھے ای ٹھپ کہانی کئیاں ایہہ گل سہنی کوئی نئی

جے کہانی لمبی ہو گئی دلچسپی فیر رہنی کوئی نئی

سارا قصّہ سچّا لکھیا جُھوٹی تے گل کہنی کوئی نئی

عوام تے پہلاں ای تنگ بڑی اے کوئی بجلی توں کوئی پانی توں

اسیں آں پاکستانی سانوں نفرت اے بے ایمانی توں

ہر کم کرئیے سُچّا سُتھرا رہیے دُور شیطانی توں

ناں وے میرا محمد یونس کیتا آپ اے تیار اے قِصّہ

سُن کے تُسیں انصاف کرو گے واقعی مزے دار اے قِصّہ