عصرِ حاضر کی معروف شاعرہ نصرتؔ مہدی کا یومِ ولادت – پنجند۔کوم

آج – یکم؍مارچ 1970
عصرِ حاضر کی معروف شاعرہ” نصرتؔ مہدی صاحبہ “ کا یومِ ولادت… 
ڈاکٹر نصرت مہدی، یکم؍مارچ 1970ء  کو نگینہ، اتر پردیش کے ایک علمی گھرانے میں پیدا ہوئیں۔ ابتدائی تعلیم نگینہ میں ہی حاصل کی اور گریجویشن میرٹھ یونیورسٹی سے کیا. آپ نے تین زبانوں اردو، ہندی اور انگریزی میں ایم اے کیا ہے.  ایشکروفٹ یونیورسٹی، لندن (یوکے) نے آپ کو ڈاکٹریٹ کی اعزازی ڈگری سے بھی  نوازا ہے.  آپ فی الوقت ڈائریکٹر، راجیہ آنند سنستھان، محکمہ روحانیت، حکومت مدھیہ پردیش کے عہدے پر فائز ہیں اور بھوپال میں مقیم ہیں. 
اردو شعریات کی طویل رہ گزر پر خواتین کی نمائندگی یوں تو ہر دور میں رہی ہے لیکن بیسویں صدی کے نصف آخر میں ان شاعرات کی ایک طویل فہرست ہمارے سامنے ہے جنھوں نے  اپنی شاعری میں نہ صرف یہ کہ نسائی جذبات واحساسات کو رقم کیا بلکہ اپنے مخصوص لہجے کو بھی اس کے تمام شوخ رنگوں کے ساتھ برتا ۔ اس کا اثر بعد میں آنے والی شاعرات نے بھی قبول کیا اور پوری خود اعتمادی کے ساتھ اپنے افکار کو اپنے انداز میں پیش کیا۔ اس حوالے سے دیکھیں تو  ڈاکٹر نصرت مہدی نے اکیسویں صدی کی ان دو دہائیوں میں اپنا جو بھی شعری سرمایہ سمیٹا ہے اس  میں وہ تمام خصوصیات موجود ہیں جن کا ذکر ابھی میں نے کیا ہے ۔ ان کا جس ادبی و علمی معاشرے سے تعلق ہے وہ   اردو زبان وادب کے حوالے سے ہمیشہ عالم میں انتخاب رہا ہے ۔
ڈاکٹر نصرت مہدی  ایک طویل عرصے تک مدھیہ پردیش اردو اکادمی کی سکریٹری رہیں ۔ انھوں اپنی انتظامی صلاحیتوں سے اکیڈمی کے وقار میں اضافہ کیا ۔ کئی سال تک اردو ہفتہ منایا جس کے ذریعے فنون لطیفہ کے تعلق سے وہ بہت سے کام کیے جو زبان و ادب کو مقبول بنانے میں معاون ثابت ہوتے ۔ افسانے کا افسانہ ، ڈرامہ ، بیت بازی، تلاشِ جوہر اور سب سے بڑھ کر جشن اردو جیسا عالیشان پروگرام ایسے پروگرام تھے جنہو ں نے عوام و خواص کو اردو زبان و تہذیب کی طرف راغب کیا اور مدھیہ پردیش اردو اکادمی کا وقار پورے ہندوستان کی اردو اکادمیوں میں بلند کیا.
سکریٹری مدھیہ پردیش اردو اکادمی کے علاوہ آپ کئی اہم عہدوں پر فائز رہیں جن میں سابق ڈپٹی ڈائریکٹر، علامہ اقبال ادبی مرکز، محکمہ ثقافت، مدھیہ پردیش، قومی کونسل برائے فروغ اردو زبان، نئی دہلی کے ایگزیکٹو بورڈ کی سابق میمبر
 نیشنل بک ٹرسٹ آف انڈیا کی مجلس مشاورت کی سابق میمبر، سی سی آر ٹی وزارت ثقافت، دہلی کے اردو پینل کی میمبر، سابق چیف ایگزیکٹو آفیسر، مدھیہ پردیش وقف بورڈ، سابق ایگزیکٹو آفیسر، اسٹیٹ حج کمیٹی جیسے اہم عہدے شامل ہیں. 
 جہاں تک ان کی شاعری کا تعلق ہے تو ڈاکٹر مہدی نے بھی معاشرے کے تلخ و ترش اور انتشار و احتجاج کو جس خوبی سے شعری پیکر میں ڈھالا ہے وہ یقیناً قابل تعریف ہے ۔ اس پر مستزاد یہ کہ ان کے سحر انگیز ترنم نے تلخ باتوں کو بھی شیرینی کا ایک سبک دریا بنا دیا۔ ان کے شعری سروکار میں جو چیزسامع یا قاری کو میں سمجھتا ہوں متاثر کرتی ہے وہ مضمون آفرینی تو ہے ہی ساتھ ہی الفاظ کی رنگا رنگی بھی ہے۔
شاعری کےعلاوہ آپ کہانیاں، آرٹیکلز ، ڈراما اسکرپٹ وغیرہ بھی لکھتی ہیں. بین الاقوامی سیمناروں، اردو کنونشن، ورکشاپ، مشاعروں میں فعال اور  مسلسل شمولیت رہی ہے. امریکہ، انگلینڈ  دبئی، سعودی عرب،، پاکستان، بحرین، قطر، کویت، مسقط وغیرہ مختلف ممالک کے ادبی اسفار کرچکی ہیں. 
آپ کی شعری تصانیف درج ذیل ہیں. 
1.سایہ سایہ دھوپ ،2. آبلہ پا، 3. میں بھی تو ہوں (دیوناگری)، 4. گھر آنے کو ہے، 5- حصار ذات سے پرے، 6- فرہاد نہیں ہونے کے (دیو ناگری )
اور نثری تصانیف درج ذیل ہیں :  
1. 1857 کی جنگ آزادی 
2. انتخاب سخن (ایم اے اردو کے نصاب میں شامل). 
آپ کو ملکی و بین الاقوامی سطح پر کئی اعزازات و انعامات سے نوازا جا چکا ہے جن میں بین الاقوامی سطح پر  اردو مرکز انٹرنیشنل لاس اینجلس، کیلیفورنیا امریکہ کے ذریعے "حسن کارکردگی انٹرنیشنل ایوارڈ"، انٹرنیشنل سوشل ڈیولپمینٹ فاؤنڈیشن کے ذریعے 10 فروری 2018 کو "موسٹ پرومیسنگ پؤیٹیس اینڈ رائٹر ان انڈیا ایوارڈ"،  انٹرنیشنل چیمبر آف میڈیا اینڈ اینٹرٹینمینٹ انڈسٹری اینڈ ایشین اکیڈمی آف آرٹس کے ذریعے اعزاز شامل ہیں جبکہ قومی سطح پر   شِونا ادبی اعزاز 2018 ، شِونا پرکاشن کے ذریعے، "آنندا اعزاز 2017 ، خوشبو ایجوکیشن اینڈ کلچرل سوسائٹی، بھوپال کے ذریعے، سُمِرن ساہتیک سنستھا ،کانپور کے ذریعے" سُمِرن گیت اعزاز 2017"،  ابھنو کلا پریشد، بھوپال کے ذریعے "ابھنو شبد شلپی 2017" اعزاز، لوک کلا منڈل، اُدے پورہ کے ذریعے "سِرجن کلا پریرک اعزاز 2016"،  اقبال میموریل ایجوکیشن سوسائٹی، نگینہ، اتر پردیش کے ذریعے "اختر الایمان ایوارڈ 2016"، مدر ٹریسا گولڈ میڈل 2015،  بیسٹ سٹیزن آف انڈیا گولڈ میڈل، 2015،  امراوتی مہا نگرپالیکا، مہاراشٹر کے ذریعے "پروین شاکر 2014" اعزاز،مظہر سعید خاں ایوارڈ 2014، امر شہید اشفاق اللہ ایوارڈ، 2010، بھوپال ،بزم نشور، کانپور کے ذریعے "نشور ایوارڈ" 2008، خاتونِ اودھ ایوارڈ 2006، لکھنؤ وغیرہ قابل ذکر ہیں۔
    ✨ پیشکش : اعجاز زیڈ ایچ
༺━━━━━━━━━━━━━━━༻
معروف شاعرہ نصرتؔ مہدی کے یوم ولادت پر منتخب کلام بطور خراجِ تحسین…
 کترا کے زندگی سے گزر جاؤں کیا کروں 
رسوائیوں کے خوف سے مر جاؤں کیا کروں 

میں کیا کروں کہ تیری انا کو سکوں ملے 
گر جاؤں ٹوٹ جاؤں بکھر جاؤں کیا کروں 

پھر آ کے لگ رہے ہیں پروں پر ہوا کے تیر 
پرواز اپنی روک لوں ڈر جاؤں کیا کروں 

جنگل میں بے امان سی بیٹھی ہوئی ہوں میں 
آواز کس کو دوں میں کدھر جاؤں کیا کروں 

کیا حکم آپ کا ہے مرے واسطے حضور 
جاری سفر رکھوں کہ ٹھہر جاؤں کیا کروں
 
کب تک سنوں بہار میں خوشبو کی دستکیں 
کیوں اے غمِ حیات سنور جاؤں کیا کروں
▬▬▬▬▬▬▬▬▬▬▬▬
سب کچھ ہے عیاں پھر بھی ہے پردہ مرے آگے 
دنیا ہے تری ایک کرشمہ مرے آگے 

میں پیاس کی شدت کا فلک چوم رہی ہوں 
گھستا ہے جبیں خاک پہ دریا مرے آگے 

میں خود کو لکیروں میں کہیں ڈھونڈ ہی لیتی 
مٹھی وہ کبھی کھول تو دیتا مرے آگے 

جس سمت بھی دیکھوں ہیں سرابوں کی صلیبیں 
پھیلا ہے عجب ریت کا صحرا مرے آگے
 
تنقید مری ان کے گناہوں پہ نہیں تھی 
آئینۂ اعمال رکھا تھا مرے آگے
 
ناکردہ گناہوں کی سزا پائی ہے نصرتؔ 
انصاف ہوا شہر میں رسوا مرے آگے
፤፤፤፤፤፤፤፤፤፤፤፤፤፤፤፤፤፤፤፤፤፤፤፤፤፤፤፤፤፤፤፤፤፤፤፤፤፤፤፤
یہ نہ سمجھو کہ کسی درد کے اظہار میں تھی 
آرزو وقت کے ٹوٹے ہوئے پندار میں تھی
 
جانے کیا ڈھونڈھتا پھرتا تھا یہاں میرا وجود 
اک اداسی مرے گھر کے در و دیوار میں تھی
 
میری تخئیل میں الفاظ کی زنجیریں تھیں 
زندگی ورنہ زمانے تری رفتار میں تھی
 
کرتی پھرتی تھی اجالوں کی قبا میری تلاش 
اور میں تھی کہ اندھیروں کے کسی غار میں تھی
 
لوگ سمجھے ہی نہیں میرے ہنر کو ورنہ 
مجھ میں فن کار تھا پوشیدہ میں فن کار میں تھی
●•●┄─┅━━━★✰★━━━┅─●•●
ڈاکٹر نصرتؔ مہدی
انتخاب : اعجاز زیڈ ایچ