اج آکھاں وارث شاہ نوں کتھوں قبراں وچوں بول
تے اج کتاب عشق دا کوئی اگلا ورقہ پھول
اک روئی سی دھی پنجاب دی تُوں لکھ لکھ مارے وین
اج لکھاں دھیاں روندیاں تینوں وارث شاہ نوں کہن
اُٹھ دردمنداں دیاں دردیا، اُٹھ تک اپنا پنجاب
اج بیلے لاشاں وچھیاں، تے لہو دی بھری چناب
کسے نے پنجاں پانیاں وچ دِتّی زہر رلا
تے انہاں پانیاں نے دھرت نُوں دِتا پانی لا
ایس زرخیز زمین تے لُوں لُوں پُھٹیا زہر
گٹھ گٹھ چڑھیاں لالیاں پُھٹ پُھٹ چڑھیا قہر
اَج آکھاں وارث شاہ نُوں کتھوں قبراں وچوں بول
ویہو ولسّی وا فیر وَن وَن وگی جھا
اوہنے ہر اِک وانس دی ونجھلی دِتی ناگ بنا
پہلا ڈنگ مداریاں منتر گئے گواچ
دُجے ڈنگ دی لگ گئی جَنے کھنے نوں لاگ
ناگاں کِیلے لوک مُونہہ، بَس فیر ڈنگ ہی ڈنگ
پل او پل ای پنجاب دے نیلے پے گے انگ
اَج آکھاں وارث شاہ نُوں کتھوں قبراں وچوں بول
وے گلے اوں ٹُٹے گیت فیر، ترکلے اوں ٹُٹی تند
ترنجنوں ٹُٹیاں سہیلیاں چرکھڑے کُوکر بند
سنے سیج دے بیڑیاں لُڈن دِتیاں روڑھ
سنے ڈالیاں پینگ اج پپلاں دِتی توڑ
اَج آکھاں وارث شاہ نُوں کتھوں قبراں وچوں بول
جتھے وجدی سی پُھوک پیار دی اوہ انجھلی گئی گواچ
رانجھے دے سب وِیر اج بُھل گئے اوہدی جاچ
دھرتی تے لہُو وسیا قبراں پیاں چوون
پرِیت دِیاں شاہ زادیاں اج وِچ مزاراں روون
اج سبھے قیدو بن گئے ، حُسن عشق دے چور
اج کتھوں لیائیے لبھ کے وارث شاہ اِک ہور
اَج آکھاں وارث شاہ نُوں کتھوں قبراں وچوں بول
تے اج کتاب عشق دا کوئی اگلا ورقہ پھول
