۵ نومبر۱۹۶۴ء کو ضلع مٹیاری(سندھ) کے ایک قصبہ، اڈیرولال اسٹیشن میں پیدا ہوئے. ۱۹۸۸ء سے درس و تدریس کے شعبہ سے منسلک ہیں اور ساتھ ساتھ علم و ادب کے چراغ جلانے میں منہمک ہیں۔ امین اڈیرائی نے شاعری کا آغاز ۱۹۸۲ء کو کیا وہ کہانی کار بھی ہیں اور درجن بھر سے زائد کتب کے مصنف ہیں جو کہ
سندھی زبان میں
۱: اچو سورن واریوں (شاعری)۱۹۸۴ء
۲:سڈکا سڈکا زندگی (کہانیاں)۱۹۸۷ء
۳:کشکول میں چنڈ (شاعری)۱۹۹۳ء
۴:چانڈوکیء جو گھاؤ (شاعری)۱۹۹۹ء
۵: وچھوڑے جو درد (کہانیاں)۲۰۰۶ء
۶: خوابن جی جاگیر (شاعری)۲۰۰۹ء
۷:چنڈ چانڈوکی ء سور (کلیات) ۲۰۱۵ء
اردو زبان میں
۱:ہاتھوں پہ سورج (غزلیں)۲۰۰۳ء
۲:. اک وجود اور (کہانیاں)۲۰۰۷ء
۳: احساس کی خوشبو (غزلیں)۲۰۰۸ء
۴: چاندنی کے اس پار (ناول)۲۰۰۹ء
۵. رشتہ آنکھ اور پانی کا (غزلیں نظمیں)۲۰۱۱ء
پنجابی زبان میں
۱. دل دا کاسہ (غزلیں نظمیں)۲۰۱۳ء
آئیے ان کے کلام سے کچھ اشعار دیکھتے ہیں
۔۔۔۔۔۔۔۔۔ ۔
اپنی عریانیت چھپانے کو
روح نکلی پہن کے میرابدن
۔۔۔۔۔۔۔۔۔۔۔
مجنوں سمجھ کے مارنے پتھر جو آ گیا
بچہ وہ تیرے شہر کا کتنا ذہین تھا
۔۔۔۔۔۔۔۔۔۔۔
میں ہاتھوں پر لیے سورج کھڑا ہوں
مرے گھر میں اندھیرا کس لیے ہے
۔۔۔۔۔۔۔۔۔۔۔۔۔۔۔
لوگ خودکوخداسمجھنے لگے
آ گیا پھر رواج پتھر کا
۔۔۔۔۔۔۔۔۔۔۔۔۔۔۔
رزق رکھتا نہ مرے پاؤں میں گر در بدری
میں نے ہر لمحہ ترے ساتھ گذارا ہوتا
۔۔۔۔۔۔۔۔۔۔۔۔
مسلسل آہٹیں سی ہو رہی ہیں
ذرا دیکھو پسِ دیوار کیا ہے
۔۔۔۔۔۔۔۔۔۔ـ
قدموں میں کیاسےکیانہیں رکھاگیامگر
ہم نے تمہارے پیار کا سودا نہیں کیا
۔ــــــــ۔۔۔۔۔
کھیل سمجھا تھا عشق کو لیکن
زندگی لگ گئی ہے داؤ پر
۔۔۔ـــــ۔۔۔۔۔۔۔
نیند کے شہر میں نہیں ہوں میں
اب ترے خواب در بدر ہونگے
۔۔۔۔۔۔۔۔۔۔۔۔۔
تیرے احساس کی خوشبو کو بساکر دل میں
تیرے لہجے کی تھکن اوڑھ کے سو جاتا ہوں
۔۔۔۔۔۔۔۔۔ـــــــــ
جنوں نے جونہی مرے کان میں کہا رقصم
پھر اس کے بعد تماشا ہوا تھا بستی میں
۔ـــ۔۔۔۔۔۔۔۔۔۔۔
دشتِ جنوں سے لوٹ کے آئے تھے ہم مگر
دامن تھا تارتار سو گھر بھی نہیں گئے
۔۔۔۔۔۔۔۔۔۔۔۔۔
دیر تک روتا رہا وہ ایک شخص
اپنے ہی ہاتھوں سے مجھ کو مار کر
۔۔۔۔۔۔۔۔۔۔۔۔
آج خوشبو سی ہے ہواؤں میں
دیکھو بستی میں کون آیا ہے
۔۔۔۔۔۔۔۔۔۔
آئنے سے بھی کیا لڑے کوئی
اس لیے سر جھکائے بیٹھے ہیں
۔۔۔۔۔۔۔۔۔۔۔
حالات مرےعہدکے جینےنہیں دیتے
بچوں کی دعائیں مجھے مرنے نہیں دیتیں
۔۔۔۔۔۔۔۔۔۔۔۔
رات ہوتے ہی جانے کتنے خوف امین
میرے گھر کی چھت پر سونے آجاتے ہیں
۔۔۔۔۔۔۔۔۔۔۔
قصہء خاک تو کچھ خاک سے آگے تک تھا
گیلی مٹی کا سفر چاک سے آگے تک تھا
۔۔۔۔۔۔۔۔۔۔۔۔
صحرائےجاں میں جلتی ہوئی روح کادھواں
اتنا اٹھا کہ راہ کی دیوار بن گیا
۔۔۔۔۔۔۔ ۔۔۔۔۔۔
پتھر پر ہے ایک لکیر
رشتہ آنکھ اور پانی کا
کرداروں کی بے چینی
اگلا موڑ کہانی کا
۔۔۔۔۔۔۔۔
اپنے کھوئے بیٹوں کو اب شہر بہ شہر
ڈھونڈ رہی ہیں مائیں مردہ خانوں میں
۔۔۔۔۔۔۔۔۔
آج اس شہرِ پریشاں میں اکیلا ہوں بہت
مجھکو اے وقت مرے بھائی کہیں سے لادو
۔۔۔۔۔۔۔۔ل
تجھ کو پا لینے کے اسباب کہاں سے لاتا
نیند روٹھی تھی ترے خواب کہاں سے لاتا
۔۔۔۔۔۔۔۔۔۔۔۔
دور پردیس میں بیٹھا ہوا سردار امین
رو دیا نقشہء پنجاب سرہانے رکھ کر
۔۔۔۔۔۔۔۔۔۔۔۔۔
