آج 12 جنوری 1901ء اردو میں آزاد نظم کے بانیوں میں شامل ممتاز شاعر اور نامور قانون دان تصدق حسین خالد کا یومِ پیدائش ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
اردو زبان میں آزاد نظم کے بانیوں میں شامل ممتاز شاعر اور نامور قانون دان تصدق حسین خالد 12 جنوری 1901ء کو پشاور میں پیدا ہوئے۔
انہیں قانون کی پریکٹس کے ساتھ ساتھ سیاست سے بھی دلچسپی تھی اور وہ 1935ء سے 1937ء تک پنجاب مسلم لیگ کے پبلسٹی سیکریٹری بھی رہے تھے۔
ڈاکٹر تصدق حسین خالد کے شعری مجموعے سروونو اور لامکاں نا لامکاں کے نام سے شائع ہوئے۔
سب سے پہلے تصدق حسین خالد نے آزاد نظم لکھی۔ اس ضمن میں ڈاکٹر عنوان چشتی عبدالوحید کراچی کے حوالے سے لکھتے ہیں کہ
خالد نے1952ءسے نظم آزاد لکھنا شروع کی۔۔۔ان کا شمار اردو کے چند باغی شعرا میں ہوتا ہے جنہوں نے اردو نظم میں نئے تجرباتی دور کاآغاز کیا۔اور مروجہ اصناف سخن اور اسالیب سے ہٹ کر نئی نئی راہیں نکالیں۔
13 مارچ 1971ء کو تصدق حسین خالد لاہور میں وفات پاگئے۔ وہ لاہور میں دارالعلوم اسلامیہ، شادمان لنک روڈ میں آسودۂ خاک ہیں۔
۔۔۔۔۔۔۔۔۔۔۔۔۔
منتخب نظمیں
۔۔۔۔۔۔۔۔۔۔۔۔۔۔۔۔
نظم "موجِ دریا"
مجموعہ کلام "سروُدِ نو"
اے حسیں ساحل مگر سوتا ھے توُ؟
تیرے حُسنِ بے خبر پر میری بیداری نثار!
میرے قطروں کی جبیں،
مُضطرب سجدوں کی دُنیائے ناز،
آستانِ ناز پر زوقِ عبادت کا ھجوُم
دیکھ، لرزاں سانس
تیری دِید کو آتی ھوُں میں
گاتی ھوُئی، روتی ھوُئی
اور توُ؟
اضطرارِ فطرتِ سیماب کا رنگِ ادا
تیری اِس شانِ تغافل پر فدا،
سوتا ھے توُ
دردِ اُلفت کی اَسیر
تیری ریتوں کو اگر میں بوسہ دُوں
ھے یہی اِک آرزوُ،
ایک جُنبش، اِک نگاہ
اِک سرسراہٹ، ایک آہ
اے میرے دِل کے دیوتا!
میرے آئینے سے مسحوُرِ جمال،
تمتما اُٹھتے ھیں تارے،
گم سے ھو جاتے ھیں دَم بھر کے لیے
منعکس ھے میرے دامن میں فروغِ ماہتاب
خوشہء پرویں کہ ھے شادابِ خوُن آفتاب
پانیوں میں لہلہاتا ھے عجب انداز سے،
حُسنِ ایمن کی بہار
یاد ھے چشمِ کلیم؟
میرے دِل کے دیوتا!
سونے کو ھوُں،
ایک جُنبش، اِک نگاہ
اِک سرسراہٹ، ایک آہ
اے میرے دِل کے دیوتا!
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
نظم "محبّت"
مجموعہ کلام "سروُدِ نو"
"محبت غم ھے"
"عشق اِک روگ ھے"
یہ کج نگاھی اھلِ دنیا کی!
تمہیں ذوقِ تصوّف اور کچھ شاید کہے لیکن،
مجھے باوَر کرو گی؟
خیر کچھ بھی ھو،
تمہیں آج اِک اچھُوتے راز سے آگاہ کرتا ھُوں:
تمہارے شاعروں کے دل!
یہ کیا کہتی ھو؟
دل؟
اے وائے نادانی!
نہیں، یہ دل نہیں،
ھاں، لوتھڑے ھیں گوشت کے، خوُں کے،
اور اُن کے جسم
غمگیں مقبرے ھیں اُن کی روُحوں کے،
محبّت نوُر ھے
اِک جاودانی نوُر ھے
اے سلمے!
کہ جس کے جلوہء سوزاں سے ھے روُحانیت تاباں،
مُسرّت کھیلتی ھے شاد کامِ آرزوُ ھو کر،
جمال و ناز و موسیقی کی رنگیں، دِلستاں پریاں
صداقت، درد اور معصومیت کی دِلنشیں حوُریں
محبّت کی حریمِ قُدس میں اِک رقص کرتی ھیں
حسیں فطرت کی زیبائی میں سو سو رنگ بھرتی ھیں
نوائے وقت کی اِک راگنی منظوُم ھوتی ھے
جہاں میں زندگی ھی زندگی معلوم ھوتی ھے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
بشکریہ خالد محمود
