آج اردو کے مشہور شاعر اور ادیب نامیؔ انصاری کی برسی ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
اردو کے مشہور و ممتاز ترقی پسند ادیب و شاعر نامی انصاری 10 جنوری 2010ء کو کانپور میں اِنتقال کر گئے تھے۔
رحمت اللہ نامی انصاری 31 جنوری 1930ءکو پیدا ہوئے تھے۔ اُن کاآبائی وطن اُتر پردیش کا مردم خیز قصبہ جائس (ضلع رائے بریلی) تھا۔
اُن کے والد بھی شاعر تھے جو مولوی محمد بخش مفتوں جائسی کے نام سے معروف تھے۔ نامی انصاری نے ملازمت کے سلسلے میں ایک مدت کانپور میں گزاری اور اسی شہر سے ادبی دُنیا میں اُنہوں نے اپنی ایک شناخت بھی بنائی۔
وہ جواں عمری ہی میں ترقی پسند تحریک سے وابستہ ہوگئے تھے اور اپنی اس وابستگی کو اُنہوں نے آخر تک قائم رکھتے ہوئے وضع داری کو تقویت بخشی۔ انہوں نے شاعری بھی کی، تنقیدی مضامین بھی لکھے۔ اُن کے نام ِنامی سے اُردوکی ادبی دُنیا اچھی طرح واقف ہے اس کی وجہ یہ ہے کہ وہ ہند ۔ پاک کے اکثر موقر رسائل میں تواتر سے چھپتے رہے ہیں۔
نامی انصاری خاصے متحرک قلم کار اور قاری تھے ان کی ایک خاص بات جو نئی نسل کےلئے کسی سبق سے کم نہیں کہ وہ اپنے دیار میں اُن گنتی کے چند لوگوں میں سے تھے جولکھنے کے ساتھ ساتھ پڑھنے پر بھی بھرپور توجہ دیتے تھے ۔
نامی انصاری نے ارضِ ادبِ اطفال میں بھی اپنے فن کے پھول کھلائے۔ سمندری لڑکا ،بچوں کے نہرو اورتینالی رمن کی کہانیاں اُن کی ترجمہ نگاری کا بہترین نمونہ ہیں۔
ان کے دو شعری مجموعے برگ ِسبز اور روشنی اے روشنی 1980 اور1994 ءمیں طبع ہوئے تھے۔ لیکن جس کام سے ان کا ایک ادبی وقار قائم ہوا وہ’ آزادی کے بعد اُردو نثر میں طنز و مزاح‘ تھا ۔
تحقیق و تنقید کی اس کتاب کی مقبولیت کا یہ ثبوت ہے کہ اس کے دو ایڈیشن شائع ہوئے نیز’ بیسویں صدی میں طنز و مزاح‘ کے نام سے بھی ان کی ایک کتاب 2002ءمیں منظر عام پر آچکی ہے۔ دیا نرائن نگم اور مرزا فرحت اللہ بیگ کا مونو گراف بھی اُنہی کا مرتب کردہ ہے جسے ساہتیہ اکادیمی نے شائع کیا۔ ’ لہروں کے درمیان‘ اُن کے تنقیدی مضامین کا مجموعہ ہے
ان کی ادبی خدمات کے پیشِ نظر میر ایوارڈ اور امتیاز ِمیر ایوارڈ جیسے ا عزاز انھیں دیے گئے اور 1999ءمیں وزیر اعظم کے ہاتھوں بھی انھیں ایک ایوارڈ تفویض کیا گیا تھا۔
۔۔۔۔۔۔۔۔۔۔۔۔۔۔۔۔
منتخب کلام
۔۔۔۔۔۔۔۔۔۔۔۔۔۔۔۔
پتھروں کا کھیل جاری ہے سروں کے درمیاں
زندگی ٹھہرے کہاں ان وحشتوں کے درمیاں
بزم ناؤ نوش کا یہ شور و غل اپنی جگہ
کوئی نغمہ زیرِلب،اونچے سُروں کے درمیاں
میں تو سچی بات کہہ سکتا ہوں اب بھی برملا
فرق آ جاۓ گا لیکن دوستوں کے درمیاں
وقت کے سیلاب نے سب کچھ مٹا کر رکھ دیا
ایک چھپر بھی نہیں باقی گھروں کے درمیاں
فلسفہ، مذہب ، سیاست ، خودپرست، برہمی
راستہ ملتا نہیں ان جنگلوں کے درمیاں
اپنی پرسش آپ ہی کرتے رہیں گے عمر بھر
اعتبارِ فن کہاں صورت گروں کے درمیاں
کس کا نقش ناز یارب!میرے دل پر ثبت ہے
کوئی صورت خوش نہ آۓ مہ وشوں کے درمیاں
یہ زمینِ گل بہ داماں شعلہ رو کب ہوئی
کوئی کتبہ مل گیا پتھروں کے درمیاں
ان کا اک حرفِ سخن بھاری مرے دیوان پر
میں کہ ٹھہرا پستہ قد خوش قامتوں کے درمیاں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ہر شے وہی نہیں ہے جو پرچھائیوں میں ہے
اس کے سوا کچھ اور بھی گہرائیوں میں ہے
فرصت ملے تو میں بھی کوئی مرثیہ لکھوں
اک دشتِ کربلا مری تنہائیوں میں ہے
کس شہر میں تلاش کریں رشتہء وفا
سنتے تو ہیں پرانی شناسائیوں میں ہے
دریا کے زور و شور پہ باتیں ہزار ہوں
پانی مگر وہی ہے جو گہرائیوں میں ہے
گُھل جاۓ شعر میں تو زمیں آسماں بنے
وہ حسنِ لازوال جو سچائیوں میں ہے
بیاکر اس کو اہلِ وفا میں گنا گیا
نامیؔ کہاں سے آپ کے شیدائیوں میں ہے
۔۔۔۔۔۔۔۔۔۔۔۔۔۔۔۔۔۔۔۔۔
یہ واقعہ بھی عجب ہے کہ میں سفر میں رہوں
ہزار کوس چلوں پھر بھی اپنے گھر میں رہوں
نہ پتھروں سے مری دوستی نہ شیشوں سے
کہاں قیام کروں کس کی رہگزر میں رہوں
یہ معجزہ بھی تو ممکن نہیں زمانے میں
کہ اشک بن کے تری چشمِ معتبر میں رہوں
مجھے بھی تنگ لگے ہے یہ شہرِ ناپُرساں
عجیب نہیں کہ کسی دشتِ پُرخطر میں رہوں
پھر اس کے بعد وہی چشم و دل کی حیرانی
تمام عمر اگر کاوشِ ہنر میں رہوں
ہزار خون بہے میرے آرپار مگر
زباں سے کچھ نہ کہوں اپنے بال و پر میں رہوں
نہ خلعتوں نہ خطابوں کی آرزو نامیؔ
یہی بہت ہے کہ احباب کی نظر میں رہوں
۔۔۔۔۔۔۔۔۔۔۔۔۔۔۔۔۔۔۔
ﻣﻮﺝ ﮔﻞ ﺑﺮﮒ ﺣﻨﺎ ﺁﺏ ﺭﻭﺍﮞ ﮐﭽﮫ ﺑﮭﯽ ﻧﮩﯿﮟ
ﺍﺱ ﺟﮩﺎﻥ ﺭﻧﮓ ﻭ ﺑﻮ ﻣﯿﮟ ﺟﺎﻭﺩﺍﮞ ﮐﭽﮫ ﺑﮭﯽ ﻧﮩﯿﮟ
ﭘﮭﺮ ﻭﮨﯽ ﺫﻭﻕ ﺗﻌﻠﻖ ﭘﮭﺮ ﻭﮨﯽ ﮐﺎﺭ ﺟﻨﻮﮞ
ﺳﺮ ﻣﯿﮟ ﺳﻮﺩﺍ ﮨﮯ ﺗﻮ ﺁﺷﻮﺏ ﺟﮩﺎﮞ ﮐﭽﮫ ﺑﮭﯽ ﻧﮩﯿﮟ
ﺍﮎ ﺳﻤﻨﺪﺭ ﮐﺘﻨﺎ ﮔﮩﺮﺍ ﻣﯿﺮﮮ ﭘﺲ ﻣﻨﻈﺮ ﻣﯿﮟ ﮨﮯ
ﺳﺎﻣﻨﮯ ﻟﯿﮑﻦ ﺯﻣﯿﻦ ﻭ ﺁﺳﻤﺎﮞ ﮐﭽﮫ ﺑﮭﯽ ﻧﮩﯿﮟ
ﺩﮬﻮﭖ ﮐﯽ ﭼﺎﺩﺭ ﺑﮭﯽ ﻣﻞ ﺟﺎﺋﮯ ﺗﻮ ﮐﺎﻓﯽ ﮨﮯ ﺑﮩﺖ
ﮐﭽﮯ ﭘﮑﮯ ﻣﻮﺳﻤﻮﮞ ﮐﺎ ﺳﺎﺋﺒﺎﮞ ﮐﭽﮫ ﺑﮭﯽ ﻧﮩﯿﮟ
ﺻﺒﺢ ﮐﯽ ﺩﮨﻠﯿﺰ ﭘﺮ ﺳﻮﺗﮯ ﮨﯿﮟ ﺍﺏ ﺑﮭﯽ ﻗﺎﻓﻠﮯ
ﻭﻗﺖ ﮐﮯ ﺻﺤﺮﺍ ﻣﯿﮟ ﺁﻭﺍﺯ ﺍﺫﺍﮞ ﮐﭽﮫ ﺑﮭﯽ ﻧﮩﯿﮟ
ﻣﻮﻡ ﮨﻮ ﺟﺎﺗﮯ ﮨﯿﮟ ﭘﺘﮭﺮ ﻧﺮﻣﯽٔ ﮔﻔﺘﺎﺭ ﺳﮯ
ﯾﻮﮞ ﺗﻮ ﮐﮩﻨﮯ ﮐﻮ ﻣﺮﯼ ﻃﺒﻊ ﺭﻭﺍﮞ ﮐﭽﮫ ﺑﮭﯽ ﻧﮩﯿﮟ
ﺩﯾﮑﮭﯿﮯ ﮐﺐ ﺑﺮﻑ ﭘﮕﮭﻠﮯ ﮐﺐ ﭼﻠﮯ ﺑﺎﺩ ﺳﺤﺮ
ﻭﮦ ﺗﻮ ﺍﺏ ﺗﮏ ﻣﮩﺮﺑﺎﮞ ﻧﺎﻣﮩﺮﺑﺎﮞ ﮐﭽﮫ ﺑﮭﯽ ﻧﮩﯿﮟ
ﺍﻥ ﮐﻮ ﺷﺎﯾﺪ ﺍﺏ ﺑﮭﯽ ﭘﺘﮭﺮ ﮐﮯ ﺯﻣﺎﻧﮯ ﯾﺎﺩ ﮨﯿﮟ
ﺟﻮ ﯾﮧ ﮐﮩﺘﮯ ﮨﯿﮟ ﮐﮧ ﭘﮭﻮﻟﻮﮞ ﮐﯽ ﺯﺑﺎﮞ ﮐﭽﮫ ﺑﮭﯽ ﻧﮩﯿﮟ
ﺷﻮﺧﯽٔ ﺗﻘﺮﯾﺮ ﻧﺎﻣﯽؔ ﺳﮯ ﻏﻠﻂ ﻓﮩﻤﯽ ﻧﮧ ﮨﻮ
ﺳﭻ ﺗﻮ ﯾﮧ ﮨﮯ ﻣﯿﺮﮮ ﺍﺱ ﮐﮯ ﺩﺭﻣﯿﺎﮞ ﮐﭽﮫ ﺑﮭﯽ ﻧﮩﯿﮟ
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
بشکریہ خالد محمود
