25 مارچ 1912ء اردو کے نامور شاعر سراج الدین ظفر کی تاریخ پیدائش ہے۔
سراج الدین ظفر جہلم میں پیدا ہوئے تھے۔
ان کی والدہ بیگم زینب عبدالقادر خود بھی اردو کی ایک مشہور مصنفہ تھیں اور ان کے نانا فقیر محمد جہلمی سراج الاخبار کے مدیر اور حدائق الحنیفہ جیسی بلند پایہ کتاب کے مصنف تھے۔
سراج الدین ظفر نے افسانے بھی لکھے اور شاعری بھی کی۔ وہ لب و لہجے کے حوالے سے بے حد منفرد شاعر تھے۔ ’’شباب اور شراب‘‘ ان کا خاص موضوع تھا۔ نئی نئی زمینیں تلاش کرنا اور ادق قافیوں میں رواں دواں شاعری کرنا انہی کا اسلوب تھا۔ ان کی شاعری کے دو مجموعے زمزمہ حیات اور غزال و غزل کے نام سے شائع ہوئے تھے۔ غزال و غزل پر انہیں 1968ء میں آدم جی ادبی انعام بھی ملا تھا۔فسانوں کا مجموعہ ’’آئینے‘‘1943ء میں فیروز سنز نے شائع کیا تھا۔ شروع میں انھوں نے سیماب اکبرآبادی سے اصلاح لی۔
6 مئی 1972ء کو سراج الدین ظفر کراچی میں انتقال کر گئے اور گورا قبرستان کے عقب میں فوجی قبرستان میں آسودہ خاک ہوئے۔
ان کی لوح مزار پر انہی کا یہ شعر تحریر ہے ؎
ظفر سے دور نہیں ہے کہ یہ گدائے است
زمیں پہ سوئے تو اورنگ کہکشاں سے اٹھے
۔۔۔۔۔۔۔۔۔۔۔۔۔۔۔۔۔۔
منتخب کلام:
ہم آہوانِ شب کا بھرم کھولتے رہے
میزانِ دلبری پہ انہیں تولتے رہے
عکسِ جمالِ یار بھی کیا تھا، کہ دیر تک
آئینے قُمریوں کی طرح بولتے رہے
کل شب ہمارے ہاتھ میں جب تک سُبو رہا
اسرار کتمِ راز میں پر تولتے رہے
کیا کیا تھا حل مسئلۂ زندگی میں لطف
جیسے کسی کا بندِ قبا کھولتے رہے
ہر شب شبِ سیاہ تھی لیکن شراب سے
ہم اُس میں نورِ صبحِ ازل گھولتے رہے
پوچھو نہ کچھ کہ ہم سے غزالانِ بزمِ شب
کس شہرِ دلبری کی زباں بولتے رہے
ہم متقیِ شہرِ خرابات رات بھر
تسبیحِ زلفِ ماہ وشاں رولتے رہے
کل رات ملتفت تھے اِدھر کچھ نئے غزال
ہم بھی نظر نظر میں انھیں تولتے رہے
تا صبح جبرئیل کو ازبر تھا حرف حرف
راتوں کو جو سُرور میں ہم بولتے رہے
اتنی کہانیاں تھی کسی زُلف میں کہ ہم
ہر رات ایک دفترِ نو کھولتے رہے
کل رات میکشوں نے توازن جو کھو دیا
خط ِ سُبو پہ کون و مکاں ڈولتے رہے
پہلے تو خود کو عشق میں حل ہم نے کر دیا
پھر عشق کو شراب میں ہم گھولتے رہے
روکا ہزار بزم نے ہنگامِ مے کشی
ہم تھے، کہ رازِ ارض و سما کھولتے رہے
کل شب تھا ذکرِ حُور بھی ذکرِ بتاں کے ساتھ
زُہد و صفا اِدھر سے اُدھر ڈولتے رہے
اپنا بھی وزن کر نہ سکے لوگ، اور ہم
روحِ ورائے روح کو بھی تولتے رہے
سرمایۂ ادب تھی ہماری غزل ظفر
اشعارِ نغز تھے، کہ گُہر رولتے رہے
۔۔۔۔۔۔۔۔۔۔۔۔۔۔۔۔۔۔۔
شوق راتوں کو ہے درپۓ کہ تپاں ہو جاؤں
رقص وحشت میں اٹھوں اور دھواں ہو جاؤں
ساتھ اگر باد سحر دے تو پس محمل یار
اک بھٹکتی ہوئی آواز فغاں ہو جاؤں
اب یہ احساس کا عالم ہے کہ شاید کسی رات
نفس سرد سے بھی شعلہ بجاں ہو جاؤں
لا صراحی کہ کروں وہم و گماں غرق شراب
اس سے پہلے کہ میں خود وہم گماں ہو جاؤں
وہ تماشا ہوں ہزاروں مرے آئینے ہیں
ایک آئینے سے مشکل ہے عیاں ہو جاؤں
شوق میں ضبط ہے ملحوظ مگر کیا معلوم
کس گھڑی بے خبر سود و زیاں ہو جاؤں
ایسا انداز غزل ہو کہ زمانے میں ظفرؔ
دور آئندہ کی قدروں کا نشاں ہو جاؤں
۔۔۔۔۔۔۔۔۔۔۔۔۔۔۔۔۔۔۔۔۔۔۔
بغیر ساغر و یار جواں نہیں گزرے
ہماری عمر کے دن رائیگاں نہیں گزرے
ہجوم گل میں رہے ہم ہزار دست دراز
صبا نفس تھے کسی پر گراں نہیں گزرے
نمود ان کی بھی دور سبو میں تھی کل رات
ابھی جو دور تہ آسماں نہیں گزرے
نقوش پا سے ہمارے آگے ہیں لالہ و گل
رہ بہار سے ہم بے نشاں نہیں گزرے
غلط ہے ہم نفسو ان کا زندگی میں شمار
جو دن بخدمت پیر مغاں نہیں گزرے
ظفرؔ کا مشرب رندی ہے اک جہاں سے الگ
مری نگاہ سے ایسے جواں نہیں گزرے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
بشکریہ خالد محمود
