پیدائش: 13 جون 1933ء
وفات: 7 دسمبر 2015ء
۔۔۔۔۔۔۔۔۔۔۔۔۔۔۔۔۔۔۔۔۔۔۔
معروف شاعر، افسانہ نگار اور نقاد زہیر کنجاہی کا اصل نام محمد صادق چغتائی اور تخلص زہیر تھا۔
زہیر کنجاہی 13 جون 1933ء کو کنجاہ، ضلع گجرات میں پیدا ہوئے۔ ابتدائی تعلیم کنجاہ میں حاصل کی۔ ایم اے (اردو) گورڈن کالج، راولپنڈی سے امتیازی حیثیت سے پاس کیا۔ راولپنڈی میں تدریس سے وابستہ رہے۔
پاکستان رائٹرز گلڈ اسلام آباد/ راولپنڈی کے پانچ سال تک سیکریٹری رہے۔ شاعری میں افقر موہانی سے اصلاح لی۔ ان کی وفات کے بعد یزدانی جالندھری سے تلمذ حاصل رہا۔
ان کی تصانیف کے نام یہ ہیں:
’فکر و خیال‘، ’گل کدہ‘، ’دریچے‘، ’دیپک‘، ’محبت اور خون‘، ’ترا آئینہ ہوں میں‘۔
7 دسمبر 2015ء کو زہیر کنجاہی کا راولپنڈی میں انتقال ہو گیا۔
۔۔۔۔۔۔۔۔۔۔۔۔۔۔۔۔۔۔۔۔۔۔
منتخب کلام:
بادہ کش ہوں نہ پارسا ہوں میں
کوئی سمجھائے مجھ کو کیا ہوں میں
۔۔۔۔۔۔۔۔۔۔۔۔۔۔۔۔۔۔۔۔۔۔
خاک کے پردوں میں یارو جب نہاں ہو جاؤں گا
ایک افسانہ بنوں گا داستاں ہو جاؤں گا
۔۔۔۔۔۔۔۔۔۔۔۔۔۔۔۔۔۔۔۔۔۔
رات بکھرے ہوئے ستاروں کو
دن کی باتیں سنا رہا ہوں میں
میرے دل میں ہیں غم زمانے کے
ساری دنیا کا ماجرا ہوں میں
شعر اچھے برے ہوں میرے ہیں
ذہن سے اپنے سوچتا ہوں میں
کوئی منزل نہیں مری منزل
کس دوراہے پہ آ گیا ہوں میں
یوں گرا ہوں کہ اٹھ نہیں سکتا
شاید اپنا ہی نقش پا ہوں میں
ان کا افسانہ کہتے کہتے زہیرؔ
اپنی روداد کہہ گیا ہوں میں
۔۔۔۔۔۔۔۔۔۔۔۔۔۔۔۔۔۔۔۔۔۔
جینے کی ہے امید نہ مرنے کی آس ہے
جس شخص کو بھی دیکھیے تصویر یاس ہے
جب سے مسرتوں کی ہوئی جستجو مجھے
میں بھی اداس ہوں مرا دل بھی اداس ہے
لاشوں کا ایک ڈھیر ہے گھیرے ہوئے مجھے
آباد ایک شہر مرے آس پاس ہے
مجھ سے چھپا سکے گی نہ اپنے بدن کا کوڑھ
دنیا مری نگاہ میں یوں بے لباس ہے
یاران مے کدہ مرا انجام دیکھنا
تنہا ہوں اور سامنے خالی گلاس ہے
اب ترک آرزو کے سوا کیا کریں زہیرؔ
اس دشت آرزو کی فضا کس کو راس ہے
۔۔۔۔۔۔۔۔۔۔۔۔۔۔۔۔۔۔۔۔۔۔
شام غم یاد نہیں صبح طرب یاد نہیں
زندگی گزری ہے کس طرح یہ اب یاد نہیں
یاد ہے اتنا کہ میں ڈوب گیا پستی میں
کتنی اونچی ہوئی دیوار ادب یاد نہیں
میں نے تخلیق کئے شعر و سخن کے موتی
میری تخلیق کا تھا کون سبب یاد نہیں
جن کے جلووں سے تھا آباد جہان دل و جاں
میری نظروں سے نہاں ہو گئے کب یاد نہیں
آنکھ میں اشک ہیں اشکوں میں غموں کی تلخی
کیسے ہوتے ہیں وہ نغمات طرب یاد نہیں
اتنا ہی یاد ہے مدت سے خفا ہیں وہ زہیرؔ
ان کی خفگی کا مگر کوئی سبب یاد نہیں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ترتیب و انتخاب و پیشکش
نیرہ نور خالد
