آج معروف نغمہ نگار شاعر جاوید اختر کا یومِ پیدائش ہے

جان نثار اختر کے گھر 17 جنوری  1945ءمیں جب ایک ننھے بچے نے آنکھ کھولی تو اپنی ایک نظم کے مصرعے
’لمحہ لمحہ کسی جادُو کا فسانہ ہوگا‘
 کی نسبت سے اُس بچے کا نام ’جادُو‘ رکھا گیا۔۔۔ کچھ عرصے بعد یہ نام بدل کر ’جاوید‘ کر دیا گیا کہ جادُو سے قریب تر تھا۔۔۔
جاوید اختر نے ایک علمی گھرانے میں پرورش پائی اور ادب سے محبت انہیں گویا وراثت میں نصیب ہوئی۔۔۔ مُضطر خیر آبادی (شاعر) دادا، جان نثار اختر والد تھے تو مجاز لکھنوئی جیسے بلند قامت شاعر جاوید کے ماموں تھے۔۔۔ یہ گھر کے ماحول کا اثر ہی تھا کہ جاوید نے لڑکپن میں ہی اردو اور دنیا کی مختلف زبانوں کا کلاسیکی ادب پڑھنا شروع کر دیا اور جس عمر میں بچے کھیل کود میں دلچسپی لیتے ہیں اس عمر میں جاوید کو اردو کے ہزاروں شعر زبانی یاد تھے۔۔۔ یوں یہ تعجب کی بات نہیں کہ سکول اور کالج میں جاوید تقریروں اور بیت بازی کے لیے شہرت رکھتے تھے۔۔۔
اُردو کے سینکڑوں شعراء کے دیوان پڑھ لینے اور عمدہ شعر سے شغف رکھنے کے باوجود جاوید اختر نے اپنی زندگی میں شاعری کو قدرے تاخیر سے اختیار کیا۔۔۔ 80ء کی دہائی کے بعد بالی وُوڈ کو یقیناً ایسے بے حساب نغمے عطاء ہوئے جنہیں آج بھی شوق سے سنا جاتا ہے اور جن کے لیے جاوید اختر کا نام ہمیشہ یاد رکھا جائے گا۔۔۔
تو پھر فلموں میں گیت نگاری اور عام شاعری میں کیا فرق ہے؟ کیا فلمی شاعری نسبتاً کم درجے کی شاعری ہے؟ جاوید سمجھتے ہیں کہ ایسا نہیں ہے، اصل کمال شاعر کا ہے کہ وہ کتنی مشاقی سے اپنے کام کو نبھاتا ہے، لفظوں سے کھیلتا ہے اور انہیں گیت، غزل یا نظم میں ڈھالتا ہے۔۔۔ یہی وجہ ہے کہ جاوید کے فلمی نغمے ہوں یا ’ترکش‘ اور ’لاوا‘ جیسے شعری مجموعے، تمام کام جاوید کے دل سے بہت قریب ہے
جاوید اختر پہلے بھارتی شاعر ہیں جن کی نظموں کا فرانسیسی زبان میں ترجمہ کیا گیا ہے،  یہ ترجمہ 2 خواتین ودیا ونکتیش اور اینی سنہا نے کیا ہے، فرانسیسی زبان میں ترجمہ کی گئی نظموں کے مجموعے کا افتتاح  یونیورسٹی آف پیرس میں کیا گیا اور اس موقع پر جاوید اختر نے کہا کہ یہ میرے لئے حیران کن ہے کیوں کہ میری نظموں کا فرانسیسی زبان میں ترجمہ کرنا آسان بات نہیں  لیکن ان دو خواتین نے یہ ممکن کر دکھایا۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
منتخب کلام
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ﺷﮩﺮ ﮐﮯ ﺩﮐﺎﻧﺪﺍﺭﻭ ، ﮐﺎﺭﻭﺑﺎﺭ ِ ﺍﻟﻔﺖ ﻣﯿﮟ ﺳﻮﺩ ﮐﯿﺎ ﺯِﯾﺎﮞ ﮐﯿﺎ ﮨﮯ ﺗﻢ ﻧﮧ ﺟﺎﻥ ﭘﺎﺅ ﮔﮯ
ﺩﻝ ﮐﮯ ﺩﺍﻡ ﮐﺘﻨﮯ ﮨﯿﮟ ﺧﻮﺍﺏ ﮐﺘﻨﮯ ﻣﮩﻨﮕﮯ ﮨﯿﮟ ﺍﻭﺭ ﻧﻘﺪ ِ ﺟﺎﻥ ﮐﯿﺎ ﮨﮯ ﺗﻢ ﻧﮧ ﺟﺎﻥ ﭘﺎﺅ ﮔﮯ

ﮐﻮ ﺋﯽ ﮐﯿﺴﮯ ﻣﻠﺘﺎ ﮨﮯ ﭘﮭﻮﻝ ﮐﯿﺴﮯ ﮐﮭﻠﺘﺎ ﮨﮯ ﺁﻧﮑﮫ ﮐﯿﺴﮯ ﺟﮭﮑﺘﯽ ﮨﮯ ﺳﺎﻧﺲ ﮐﯿﺴﮯ ﺭﮐﺘﯽ ﮨﮯ
ﮐﯿﺴﮯ ﺭﺍﮦ ﻧﮑﻠﺘﯽ ﮨﮯ ﮐﯿﺴﮯ ﺑﺎﺕ ﭼﻠﺘﯽ ﮨﮯ ﺷﻮﺥ ﮐﯽ ﺯﺑﺎﮞ ﮐﯿﺎ ﮨﮯ ﺗﻢ ﻧﮧ ﺟﺎﻥ ﭘﺎﺅ ﮔﮯ

ﻭﺻﻞ ﮐﺎ ﺳﮑﻮﮞ ﮐﯿﺎ ﮨﮯ ، ﮨﺠﺮ ﮐﺎ ﺟﻨﻮﮞ ﮐﯿﺎ ﮨﮯﺣﺴﻦ ﮐﺎ ﻓَﺴﻮﮞ ﮐﯿﺎ ﮨﮯﻋﺸﻖ ﮐﺎ ﺩَﺭﻭﮞ ﮐﯿﺎ ﮨﮯ
ﺗﻢ ﻣﺮﯾﺾ ِ ﺩﺍﻧﺎﺋﯽ ﻣﺼﻠﺤﺖ ﮐﮯ ﺷﯿﺪﺍﺋﯽ ﺭﺍﮦ ِ ﮔﻤﺮﮨﺎﮞ ﮐﯿﺎ ﮨﮯ ﺗﻢ ﻧﮧ ﺟﺎﻥ ﭘﺎﺅ ﮔﮯ

ﺟﺎﻧﺘﺎ ﮨﻮﮞ ﻣﯿﮟ ﺗﻢ ﮐﻮ ﺫﻭق ﺷﺎﻋﺮﯼ ﺑﮭﯽ ﮨﮯ ﺷﺨﺼﯿﺖ ﺳﺠﺎﻧﮯ ﻣﯿﮟ ، ﺍِﮎ ﯾﮧ ﻣﺎﮨﺮﯼ ﺑﮭﯽ ﮨﮯ
ﭘﮭﺮ ﺑﮭﯽ ﺣﺮﻑ ﭼﻨﺘﮯ ﮨﻮ ﺻﺮﻑ ﻟﻔﻆ ﺳﻨﺘﮯ ﮨﻮ ﺍِﻥ ﮐﮯ ﺩﺭﻣﯿﺎﮞ ﮐﯿﺎ ﮨﮯ ﺗﻢ ﻧﮧ ﺟﺎﻥ ﭘﺎﺅ ﮔﮯ
۔۔۔۔۔۔۔۔۔۔۔۔۔۔۔۔۔۔۔۔
آپ سے مل کے ہم کچھ بدل سے گئے، شعر پڑھنے لگے گنگنانے لگے
پہلے مشہور تھی اپنی سنجیدگی، اب تو جب دیکھئے مسکرانے لگے

ہم کو لوگوں سے ملنے کا کب شوق تھا، محفل آرائی کا کب ہمیں ذوق تھا
آپ کے واسطے ہم نے یہ بھی کیا، ملنے جلنے لگے، آنے جانے لگے

ہم نے جب آپ کی دیکھیں دلچسپیاں، آگئیں چند ہم میں بھی تبدیلیاں
اک مصور سے بھی ہوگئی دوستی، اور غزلیں بھی سننے سنانے لگے

آپ کے بارے میں پوچھ بیٹھا کوئی، کیا کہیں ہم سے کیا بدحواسی ہوئی
کہنے والی جو تھی بات ہو نہ سکی، بات جو تھی چھپانی، بتانے لگے

عشق بے گھر کرے، عشق بے در کرے، عشق کا سچ ہے کوئی ٹھکانا نہیں
ہم جو کل تک ٹھکانے کے تھے آدمی، آپ سے مل کے کیسے ٹھکانے لگے
۔۔۔۔۔۔۔۔۔۔۔۔۔۔۔۔۔۔۔۔۔۔۔
ہمارے شوق کی یہ اِنتہا تھی
قدم رکھا کہ منِزل راستہ تھی

کبھی جو خواب تھا، وہ پا لیا ہے
مگر جو کھو گئی وہ چیز کیا تھی

جسے چُھو لوں میں وہ ہو جائے سونا
تجھے دیکھا تو جانا بددُعا تھی

محبت مر گئی مجھ کو بھی غم ہے
میرے اچھے دِنوں کی آشنا تھی

میں بچپن میں کھلونے توڑتا تھا
میرے انجام کی وہ ابتداء تھی

مریضِ خواب کو تو اب شفا ہے
مگر دنیا بڑی کڑوی دوَا تھی

بچھڑ کر ڈار سے بن بن پھرا وہ
ہرن کو اپنی کستوری سزا تھی
۔۔۔۔۔۔۔۔۔۔۔۔۔۔۔۔۔۔۔
جو اِتنے قریب ہیں اِس دل سے، وہ دُور ہوئے تو کیا ہوگا
ہم اُن سے بِچھڑ کر جینے پر مجبُور ہوئے تو کیا ہوگا

ہم اُن کی محبت پانے کو ہر بات گوارا تو کرلیں
اِن باتوں سے وہ اور اگر مغرُور ہوئے تو، کیا ہوگا ؟

شیشے سے بھی نازک خواب ہیں جو راتوں نے سجائے ہیں لیکن
یہ دن کی چٹانوں پر گِر کے جب چُور ہوئے تو کیا ہوگا

دُنیا جو کہے گی تم کو بُرا، ہم کو نہ لگے گا یہ اچھا
سوچو کہ تمہارے ہم پہ سِتم مشہور ہوئے تو کیا ہوگا
۔۔۔۔۔۔۔۔۔۔۔۔۔۔۔۔۔۔۔۔۔
کن لفظوں میں اتنی کڑوی، اتنی کسیلی بات لکھوں
شہر کی میں تہذیب نبھاؤں، یا اپنے حالات لکھوں

غم نہیں لکھوں کیا میں غم کو، جشن لکھوں کیا ماتم کو
جو دیکھے ہیں میں نے جنازے کیا اُن کو بارات لکھوں

کیسے لکھوں میں چاند کے قصے، کیسے لکھوں میں پھول کی بات
ریت اُڑائے گرم ہوا تو کیسے میں برسات لکھوں

کس کس کی آنکھوں میں دیکھے میں نے زہر بجھے خنجر
خود سے بھی جو میں نے چھپائے کیسے وہ صدمات لکھوں

تخت کی خواہش، لُوٹ کی لالچ، کمزوروں پر ظلم کا شوق
لیکن اُن کا فرمانا ہے میں اُن کو جذبات لکھوں

قاتل بھی مقتول بھی دونوں نام خدا کا لیتے تھے
کوئی خدا ہے تو وہ کہاں تھا، میری کیا اوقات لکھوں

اپنی اپنی تاریکی کو لوگ اُجالا کہتے ہیں
تاریکی کے نام لکھوں تو قومیں، فرقے، ذات لکھوں

جانے یہ کیسا دور ہے جس میں یہ جرآت بھی مشکل ہے
دن ہو اگر تو اُس کو لکھوں دن، رات اگر ہو رات لکھوں
۔۔۔۔۔۔۔۔۔۔۔۔۔۔۔۔۔۔۔
میں خود بھی سوچتا ہوں یہ کیا میرا حال ہے
جس کا جواب چاہیے وہ کیا سوال ہے

گھر سے چلا تو دل کے سوا پاس کچھ نہ تھا
کیا مجھ سے کھو گیا ہے مجھے کیا ملال ہے

آسودگی سے دل کے سبھی داغ دُھل گئے
لیکن وہ کیسے جائے جو شیشے میں بال ہے

بے دست و پا ہوں آج تو الزام کس کو دوں
کل میں نے ہی بُنا تھا یہ میرا ہی جال ہے

پھر کوئی خواب دیکھوں کوئی آرزو کروں
اب اے دلِ تباہ ترا کیا خیال ہے
۔۔۔۔۔۔۔۔۔۔۔۔۔۔۔۔۔۔۔
غم ہوتے ہیں جہاں ذہانت ہوتی ہے
دنیا میں ہر شے کی قیمت ہوتی ہے

اکثر وہ کہتے ہیں وہ بس ہیں میرے
اکثر کیوں کہتے ہیں حیرت ہوتی ہے

تب ہم دونوں وقت چُرا کر لاتے تھے
اب ملتے ہیں جب بھی فرصت ہوتی ہے

اپنی محبوبہ میں اپنی ماں دیکھیں
بِن ماں کے بچوں کی فِطرت ہوتی ہے

اک کشتی میں ایک قدم ہی رکھتے ہیں
کچھ لوگوں کی ایسی عادت ہوتی ہے
۔۔۔۔۔۔۔۔۔۔۔۔۔۔۔۔۔
بھوک
آنکھ کھل گئی میری
ہوگیا میں پھر زندہ
پیٹ کے اندھیروں سے
ذہن کے دھندلکوں تک
ایک سانپ کے جیسا
رینگتا خیال آیا
آج تیسرا دن ہے۔۔۔۔ آج تیسرا دن ہے

اک عجیب خاموشی
منجمد ہے کمرے میں
ایک فرش اور اک چھت
اور چار دیواریں
مجھ سے بے تعلّق سب
سب مرے تماشائی
سامنے کی کھڑکی سے
تیز دھوپ کی کرنیں
آرہی ہیں بستر پر
چُبھ رہی ہیں چہرے پر
اس قدر نکیلی ہیں
جیسے رشتے داروں کے
طنز میری غربت پر
آنکھ کھل گئی میری
آج کھوکھلا ہوں میں
صرف خول باقی ہے
آج میرے بستر میں
لیٹا ہے مرا ڈھانچہ
اپنی مُردہ آنکھوں سے
دیکھتا ہے کمرے کو
آج تیسرا دن ہے
آج تیسرا دن ہے

دوپہر کی گرمی میں
بے ارادہ قدموں سے
اک سڑک پہ چلتا ہوں
تنگ سی سڑک پر ہیں
دونوں سمت دُکانیں
خالی خالی آنکھوں سے
ہر دُکان کا تحتہ
صرف دیکھ سکتا ہوں
اب پڑھا نہیں جاتا
لوگ آتے جاتے ہیں
پاس سے گزرتے ہیں
پھر بھی کتنے دھندلے ہیں
سب ہیں جیسے بے چہرہ
شور ان دُکانوں کا
راہ چلتی اک گالی
ریڈیو کی آوازیں
دُور کی صدائیں ہیں
آرہی ہیں میلوں سے
جو بھی سن رہا ہوں میں
جو بھی دیکھتا ہوں میں
خواب جیسا لگتا ہے
ہے بھی اور نہیں بھی ہے
دوپہر کی گرمی میں
بے ارادہ قدموں سے
اک سڑک پہ چلتا ہوں
سامنے کے نُکّڑ پر
نل دکھائی دیتا ہے
سخت کیوں ہے یہ پانی
کیوں گلے میں پھنستا ہے
میرے پیٹ میں جیسے
گھونسہ ایک لگتا ہے
آرہا ہے چکّر سا
جسم پر پسینہ ہے
اب سکت نہیں باقی
آج تیسرا دن ہے
آج تیسرا دن ہے

ہر طرف اندھیرا ہے
گھاٹ پر اکیلا ہوں
سیڑھیاں ہیں پتّھر کی
سیڑھیوں پہ لیٹا ہوں
اب میں اُٹھ نہیں سکتا
آسماں کو تکتا ہوں
آسماں کی تھالی میں
چاند ایک روٹی ہے
جھک رہی ہیں اب پلکیں
ڈوبتا ہے یہ منظر
ہے زمین گردش میں

میرے گھر میں چُولھا تھا
روز کھانا پَکتا تھا
روٹیاں سُنہری ہیں
گرم گرم یہ کھانا
کُھل نہیں رہی آنکھیں
کیا میں مرنے والا ہوں
ماں عجیب تھی میری
روزاپنے ہاتھوں سے
مجھ کو وہ کھلاتی تھی
کون سرد ہاتھوں سے
چھو رہا ہے چہرے کو
اک نوالا ہاتھی کا
اک نوالا گھوڑے کا
اک نوالا بھالو کا
موت ہے کہ بے ہوشی
جو بھی ہے غنیمت ہے
آج تیسرا دن تھا۔ ۔۔۔آج تیسرا دن تھا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
بشکریہ خالد محمود