انوار احمد(مرحوم)
دو آنسو
میں اس مقدس درخت تلے
چار راتیں سویا ہوں،جس کے پتے
ہوا اور مٹی کی زد سے باہر ہیں
جنہیں لوگ محفوظ جگہوں پر رکھ لیتے ہیں
میں موسمِ خزاں میں دوستوں کو خطوط لکھتا ہوں
تمہارے گھر جاتی سڑک کے کنارے
میں میونسپلٹی کا وہ درخت ہوں
جس کی چھال اُدھیڑکر۲۳نمبرلکھ دیا گیا ہے
اگر یہ گرتے پڑتے تم تک آ پہنچے
تو انہیں اپنے پرانے صندوق میں جگہ دینا
میں تمہارے لیے ہی یہاں ہوں جہاں تم نہیں ہو
خود کشی
خشک پتے سڑک پار کرتے ہوئے
رُک گئے ہیں۔۔۔۔۔۔۔۔!
۔۔۔۔۔۔۔۔۔۔۔۔۔۔۔۔۔۔۔
کلر بلائنڈ
ترے رنگ ہم پر مسلط،ہماری سحر پر
ترے رنگ راتوں پہ یکساں نمایاں
ہمیں تو نے رنگوں سے بے بہرہ تشخیص کرتے ہوئے
سب کے پیلے مکانوں میں کائی اُگائی
سیاہی سے ماخوذ رنگوں سے جسموں پہ سبزہ لکھا
ہمارے لیے تو نے ساون پہ اشعار کہنے کی
ترغیب اور فنڈ
گھر گھر روانہ کیے
کہ اس سے نئی نسل کے خالی ذہنوں میں سبزی اُگائیں
مگر ہم ترے خواب رنگوں کی تردید میں نا معنک رہے
تو نے سیلاب کے دن
عماموں میں ملبوس سبزی فروشوں پہ کشتی اتاری
مگر بہتے پانی کی رنگت نہ دیکھی!
۔۔۔۔۔۔۔۔۔۔۔۔۔۔۔۔۔۔
یہ لاہورہے
رات کی رخصت کے صدمے ہیں
اور سورج سے خالی
لمبی،کالی سڑکیں۔۔۔
ہاتھ میں اپنے اپنے نام کے کتبے لے کر
میری جانب دیکھ رہی ہیں
اور کہتی ہیں
’’جسموں کا دریا
ساحل چوس گئے ہیں‘‘
۔۔۔۔۔۔۔۔۔۔۔
ہوا بند کمرہ
ہوا بند کمرہ،
غٹا غٹ کئی سانس کھینچے،بمشکل
صدا کی درآمدبرآمدنہ دارد
بدن آبِ مذقوم سے تر ہراساں
سیہ خامشی،ذہن جیسے کئی زرد نیلے لبوں
اور سایوں کی تیزی،تحرک کا لمحہ مجسم!
کہیں روشنی اور جینے کی خواہش کا امکاں
مگر راستے سب سماعت کے محتاج،
آواز معدوم
کبھی میرے رنگیں سمندر میں اترے
مری آتشِ زیر پا کو اجالے،
تو جانے،
کہ پایاب پانی میں ڈوبے ہوئے تھے!
ہوا بند کرکے دریچوں کی صورت در آیا
تو میں مر چکا تھا
اگر ساری تمہید کاٹو،تو میں آج بھی
برف اور چاندنی کے کنارے پڑا
بھیگتا،اینٹھتا ہوں!
۔۔۔۔۔۔۔۔۔۔۔
شام اترے کبھی
شہر کے بدنمامنظروں اور سیہ جنگلوں سے پرے
تیرے پاؤں میں جوتے نہ ہوں،ریت ہو
دور تک ریت ہی ریت ہو اور ہوا۔۔۔۔
ہوا ہم پہ رخصت کی سیٹی بجاتی رہے
ترے بال اور میری نظموں کے اوراق اڑتے رہیں
دن گزرتے رہیں
بارشیں ریت کی خشک چادر کبھی،
استخوانوں سے سِرکا کے دیکھیں تو رُک جائیں
پاگل ہوا ،
پھر بھی رخصت کی سیٹی بجاتی رہے!
۔۔۔۔۔۔۔۔۔۔۔۔۔۔۔۔۔۔۔۔۔۔۔
محبت کے ذخائر
دل کی کانوں سے محبت کے ذخائر ختم ہونے کو ہیں
بچوں کے خوبصورت دلوں میں سچائی اور چہروں پر
مسکراہٹ خبیث ہو چلی ہے
اور لڑکیوں کی آنکھوں میں جو ہونا چاہیے وہ نہیں ہے
اور لڑکوں نے خوبصورت انگلیوں سے
سونے کی انگوٹھیاں اتار لی ہیں
آؤ بچ رہنے والی بیکار محبت کسی بہت
ویران دھوپ میں چھڑکیں
اس کو کہنا اگر سبز آنکھوں سے
چھوتی ہوئی کوئی موجود سچائی گزرے تو
مجھ سخت تاریک کمرے میں لٹکے ہوئے کو
بھلانا نہیں ہے!
۔۔۔۔۔۔۔۔۔۔۔
چاندنی
کل چاند کی سولہویں تھی
مگر آج چاندنی کہیں بھی نہیں
شاید ان گھنے بادلوں کے اوپر خالی جگہوں پر پھیلی ہو
جیسے تم مجھ سے اوپر والے فلیٹ میں
سرمئی بستر پر اکیلی سوئی ہو!
۔۔۔۔۔۔۔۔۔۔۔۔۔۔۔۔۔۔
گہری شام
جتنی گہری شام ہے
اتنے اونچے پیڑ
سونے تنہا راستے،قدموں سے لپٹے
سوکھے پتوں کے ڈھیر۔۔۔۔۔
چلنا گہری دھند کا ہولے ہولے ساتھ
عجب منظر سرطان سے مرنے والی
اچھی لڑکی کے جنازے کا
ایک کواڑ تو گر ہی پڑا تھا کھلے ہوئے دروازے کا
وہم کی صورت ارد گرد پر بارش کی آواز
تیری ساتھ گزاری گھڑیاں اور نمناک جدائی
دل پر گرتا تیزاب،کریہہ کٹاؤ
اسی جگہ پر درد کی بارش جہاں پہ میرا دل
تیرے ساتھ ہی رہنے کی خواہش میں تر ہواتھا!
۔۔۔۔۔۔۔۔۔۔۔۔۔۔۔۔۔۔۔۔۔۔
عزمِ آہنی
فصیل شب کے سائے
یاس کے زنداں کی اندھی بے بسی میں،
آس کی مشعل جلائے
اعتبار صبح درخشاں
میں۔۔۔۔۔۔
ہر اک کوہ و دمن،دریا و دشت
پھاندتا جاؤں گا جیسے تند خو طوفانِ آب
اور اس صبح طرب کی آرزو میں
میں۔۔۔۔۔
ہر اک لمحے کی زد سے ،یوں نکل آؤں گاجیسے
دامنِ خورشید سے کوئی شعاع
جس کو کوئی راہرو،دریا بگولہ،دیوتا
کاٹ سکتا ہی نہیں
اور کہنہ پربتوں پر بے حسی کی برف
میری سوچوں کی تمازت سے پگھل جائے گی یوں
حدتِ احساس سے جیسے کوئی پتھر کی سل
میں جھٹک کر توڑ دوں گاطوقِ ضبط
مجھ سے کٹ جائے گی ہر زنجیرِ یاس
دشتِ شب کے فاصلے سب مختصر ہو جائیں گے
اور عزمِ آہنی کے روبرو
سب ہی یکساں بحر و بر ہو جائیں گے!
