معیدؔ رشیدی کی پانچ غزلیں

معیدؔرشیدی(نئی دہلی)

ہر گھڑی کیوں یہ کمی آتی ہے پیچھے پیچھے

بے سبب ایک نمی آتی ہے پیچھے پیچھے

ایک سایہ سا تصور میں چمک جاتا ہے

اور اک چیخ چلی آتی ہے پیچھے پیچھے

آگے بڑھتا ہے کوئی خواب ستانے کے لیے

اور تعبیر کوئی آتی ہے پیچھے پیچھے

جب بھی چھاتے ہیں مری دشت میں خوابوں کے غبار

خودبہ خود بے خبری آتی ہے پیچھے پیچھے

زندگی تو ہی بتا، میرے مقدّر میں سدا

کیوں فقط دربدری آتی ہے پیچھے پیچھے

راہِ ادراک سے جب بھی میں گزرتا ہوں معیدؔ

کیوں یہ آشفتہ سری آتی ہے پیچھے پیچھے

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

گھنیری رات میں تھوڑی سی روشنی کے لیے

بھٹک رہا ہے گماں شاخِ آگہی کے لیے

میں اپنی روح کے صحراے بے کراں میں خود

جھلس رہا ہوں زمانے سے بے خودی کے لیے

جدھر بھی دیکھیے ہے موت کا گھنا سایہ

جدھر بھی دیکھیے ہے جنگ زندگی کے لیے

کوئی تو سامنے آئے حصارِجاں بن کر

انا پرست بگولوں سے ہم سری کے لیے

سفینہ پھر کوئی غرقاب ہونے والا ہے

ہوا چلی ہے سفینوں کی رہبری کے لیے

۔۔۔۔۔۔۔۔۔۔۔۔۔۔۔۔۔۔۔۔۔۔۔

کوئی نہ کوئی سخت کمی ہے اندر سے

دریا کو کیوں تشنہ لبی ہے اندر سے

ایک عمارت باہر سے زیرِتعمیر

ایک عمارت ٹوٹ رہی ہے اندر سے

سخت بدن ملبے تھرّائے،شور اٹھا

تازہ تازہ چیخ ملی ہے اندر سے

رنگ رنگ کی دھوپ سے ملتی ہے دیوار

ملتے ملتے سوکھ گئی ہے اندر سے

تاحدِّ نظراوپر سورج کا پہرا ہے

خاموشی میں رات چلی ہے اندر سے

ایک سیاہی کھیل رہی ہے چہرے پر

کوئی نہ کوئی بات ہوئی ہے اندر سے

شعر تمہارا کوزے کی مانند معیدؔ

غور کرو تو ایک ندی ہے اندر سے

۔۔۔۔۔۔۔۔۔۔۔۔۔۔۔۔۔۔۔۔۔۔

کبھی یقیں کی طرف اور کبھی گمان کے بیچ

ٹھہرسکا ہے کہاں کوئی آسمان کے بیچ

ذرا بھی چوکوں اگر میں تو دم نکل جائے

بڑا ہی فاصلہ ہے جسم اور جان کے بیچ

اتر رہی ہے اداسی بڑے غرور کے ساتھ

چھلک رہاہے اندھیرا بہت مکان کے بیچ

خود اپنی سانس کی دھاروں کی سرکشی کا شکار

حیات و مرگ کے بے نام امتحان کے بیچ

نہ جانے لوگ تھے کیسے ،نہ جانے کیسا طلسم

نہ جانے کون سی دنیا تھی داستان کے بیچ

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

دشت میں وہ درودیوار اٹھانا چاہتے ہیں

اور اک ہم ہیں کہ گھرباراٹھانا چاہتے ہیں

ایک سورج ہے مسلط ہمارے سر پہ تو کیا

آج ہم برف کی دیواراٹھانا چاہتے ہیں

زندگی بارِگراں ہی سہی،طوفاں ہی سہی

ہم وہ خوگر ہیں کہ آزار اٹھانا چاہتے ہیں

ان سے ملنا نہ ہوا ،جنگ کا سامان ہوا

بات کی بات میں تلوار اٹھانا چاہتے ہیں

لفظِ موہوم پہ رکھے ہیں معانی کے صلیب

روشنی تجھ کو سرِدار اٹھانا چاہتے ہیں

ایک طوفاں اٹھے اس پار بھی اے شورِ نہاں

ایک ہنگامہ پھر اس پار اٹھانا چاہتے ہیں

توشہء خاک بدن چشمہء حیواں تو نہیں

اس لیے عشق کے معیا ر اٹھانا چاہتے ہیں

زخم ناسور بنے جاتے ہیں پھر بھی یہ غبار

لذتِ گرمیِ بازار اٹھانا چاہتے ہیں