کیا داغِ سویدا ہے
درد ہے سینے کا
اور سب پہ ہویدا ہے
۔۔۔۔۔
ہیرے کا مِرا کوکا
دیکھ لے آ چھو کر
کس نے ہے تجھے روکا
۔۔۔۔۔
اب سانس بھی آری ہے
اک پل رُکتی نہیں
ایسی یہ کٹاری ہے
۔۔۔۔۔
سلجھائے جو بالوں کو
چھو کے انگلی سے
اُلجھائے خیالوں کو
۔۔۔۔۔
کیا حشر و قیامت ہیں؟
پاس ہمارے بھی
کچھ اشکِ ندامت ہیں
۔۔۔۔۔
یہ وقت کا ریلا ہے
تو بھی چلتا چل
سنسار کا میلا ہے
کیوں آنکھ ترستی ہے؟
اُن کو ہم پا لیں
کیا اپنی ہستی ہے؟
۔۔۔۔۔
آوازے کستی ہے
حال پہ میرے اب
یہ دنیا ہنستی ہے
۔۔۔۔۔
کیا ذہنی پستی ہے
دل سی شئے بھی اب
دنیامیں سستی ہے
۔۔۔۔۔
جاں لیوا جدائی ہے
دل جو نہیں رکتا
یہ دل کی ڈھٹائی ہے
۔۔۔۔۔
دھوکے سے نہ ڈرجانا
اپنی عادت ہے
وعدے سے مکر جانا
۔۔۔۔۔
بڑی قسمیں کھائی ہیں
غور کیاہے کبھی؟
اک،دو بھی نبھائی ہیں؟
ہم یوں تو نہیں روتے
جائیں جہاں بھی ہم
کہیں اپنے نہیں ہوتے
۔۔۔۔۔
گو عشق قیامت ہے
اس کے دم سے ہی
یہ دنیا سلامت ہے
۔۔۔۔۔
یا ربا! دہائی ہے
کوئی نہیں اپنا
یہ تیری خدائی ہے؟
۔۔۔۔۔
تھی آنکھ وہ مستانی
اتنی بدل گئی اب
ہم نے بھی نہ پہچانی
۔۔۔۔۔
چمیلی کی کلیاں ہیں
پیار سے مہکی ہوئی
بابل کی گلیاں ہیں
۔۔۔۔۔
ساون کا مہینہ ہے
جل میں ملا ہے کیا
مرا جلتا سینہ ہے
جھولا ہے کوئی جھولے
چاند کا مُکھ چومے
آکاش کا دل چھولے
۔۔۔۔۔
یہ بھید نہیں کھلتا
میٹھے دردوں سے
کیوں زہر سا ہے گھلتا؟
۔۔۔۔۔
ہم کو بھی سکھا جانا
سیکھ لیاتم نے
وعدے سے مکر جانا
۔۔۔۔۔
سو ٹونے کرتی ہوں
کب تو جانے گا
میں تجھ پر مرتی ہوں
۔۔۔۔۔
باغوں کی چھیئیاں تھی
پہلے پہل اُس نے
جب پکڑی بیئیاں تھی
۔۔۔
دنیا کے میلے تھے؟
بچھڑے وہی ہم سے
جو ساتھ میں کھیلے تھے
اب دل کی کتھا سن لے
روزِمحشرہے
جو ہم نے سہا سن لے
۔۔۔
غیروں سے لگے ملنے
دھرتی کا دل کانپا
آکاش لگا ہلنے
۔۔۔
کوہساروں کو جاتے ہیں
توڑ کے سب رشتے
لو تجھ سے نبھاتے ہیں
یہ تھی میری پسپائی
رفتہ رفتہ مجھے
جوگور تلک لائی
۔۔۔
کیا حشر و قیامت ہیں؟
جھولی میں اپنی بھی
کچھ اشکِ ندامت ہیں
۔۔۔
یہ تھی میری پسپائی
رفتہ رفتہ مجھے
تا گور جو لے آئی
