شاہد ماہلی(دہلی)
پتّھروں کی چاپ سُن، نقشِ صَدا محفوظ کرلے
آنے والی یہ صَدی پُوچھے گی کیا، محفوظ کرلے
مُشتہر کردے، کتابِ زندگی کے باب سارے
رازِ دل کے کچھ مگر صفحے ذرا محفوظ کرلے
کچھ ریا، کچھ مَصلحت، کچھ دُور اَندیشی کی خاطر
دُشمنوں کے درمیاں کچھ ہم نَوا محفوظ کرلے
کچھ سُراغِ زندگی ماضی کے تَہہ خانوں میں رکھ دے
اُنگلیو ں کے کچھ نِشاں، کچھ نقشِ پا محفوظ کرلے
کون جانے، خُشک ہو جائیں کہاں، خوشیوں کے دَھارے
کچھ ہنسی بچوں کی، بوڑھوں کی دعا محفوظ کرلے
ڈال دے دَامن میں کل کے، تلخیاں ماضی کی ساری
داستانِ غم کا سارا سلسلہ محفوظ کرلے
سارے منظر بے کراں شب میں پگھل جائیں گے شاہدؔ
تِیرگی بڑھنے سے پہلے اِک سِرا محفوظ کرلے
۔۔۔۔۔۔۔۔۔۔۔۔۔۔۔۔۔۔
سانسوں میں، رَگ و پے میں سَمایاہے کوئی اور
ہے زیست کسی اور کی جِیتا ہے کوئی اور
آنکھوں نے بَسائی ہے کوئی اور ہی صُورت
اِس دل کے نہاں خانے میں ٹھہرا ہے کوئی اور
کیا طُرفہ تماشا ہے ہے کہ اِس دل کی صَدا کو
سُنتا ہے کوئی اور سمجھتا ہے کوئی اور
اِک آگ ہے جو دل میں بُجھی جاتی ہے ہر پَل
خِرمن سے جو اُٹھتا ہے وہ شعلہ ہے کوئی اور
لاشے ہیں کنارے پہ پڑے تشنہ لبوں کے
جو پیاس بُجھاتاہے وہ دریا ہے کوئی اور
ہر صبح پہ سایہ سا ہے کچھ تلخیٔ شب کا
ہر شام کو اندیشۂ فردا ہے کوئی اور
اِک بوئے رِفاقت سی فضاؤں میں ہے شاہدؔ
اِس کوچۂ بیگانہ سے گذرا ہے کوئی اور
۔۔۔۔۔۔۔۔۔۔۔۔۔۔
درد تھم جائے گا، موسم بھی بدل جائے گا
دِل تو پھر دِل ہے کسی طور بہل جائے گا
میہماں بَن کے جو آیا ہے درونِ دل میں
آج اگر رُک بھی گیا ہے تو وہ کل جائے گا
زخم بھر جائے گا رہ جائے گی تا عُمر چُبھن
یہ جو کانٹا ہے کِسی طرح نِکل جائے گا
کھینچ رکّھا ہے تمنّاؤں نے شعلوں کا حصار
جو بھی یاں پاؤں کو رکّھے گا وہ جَل جائے گا
اِک ذرا وقت کی باہوں میں سِمٹ جانے دو
کوہ صدیوں کا بھی لمحوں میں پگھل جائے گا
تجھ کو الفاظ کی دیوار میں چُن جاؤں گا
یہ قلم لے کے تِرے پاس غزل جائے گا
آنے والی یہ صدی یاد کرے گی شاہدؔ
جو بھی اِک لمحہ مِرے شعر میں ڈھل جائے گا
۔۔۔۔۔۔۔۔۔۔۔۔۔۔۔۔۔
کوئی صَدا، کوئی سایہ، نہ سلسلہ کوئی
تمام راہ دُھندلکوں میں ڈُوب ڈُوب گئی
بہت قریب سے دیکھا تو میرا سایہ تھا
جسے گلے سے لگائے ہوئے تھی تنہائی
عجب صَدا تھی کہ دیکھی گئی نگاہوں سے
عجیب بَرق تھی کانوں سے آکے ٹکرائی
رگوں میں پھیل گیا زَہر خود پسندی کا
نمو کی دُھوپ سے دیوارِ جسم ٹوٹ گئی
خیالِ ریت کا صحرا، اُمید راکھ ہی راکھ
کوئی شرر بھی نہیں دل کی آگ ایسی بُجھی
۔۔۔۔۔۔۔۔۔۔۔۔۔۔۔
اُداسی کا دُھواں بن کر جو روز و شب پہ چھایا ہے
وہ گُذری ساعتوں میں اِک حسیں لمحے کا سایا ہے
بدلتے موسموں کا درد پھیلا ہے رَگ و پے میں
نگاہوں میں مگر اَب بھی وہی منظر سَمایا ہے
وہ صحنِ شب سے نکلا ہے جو شرمایا سا ایک سُورج
نہ جانے کِتنے خوابوں کے محل کو اس نے ڈھایا ہے
تِری آنکھوں میں اُمیدوں کی شمعیں اَب بھی روشن ہیں
فَسُردہ آندھیوں نے یوں تو ہر لمحہ بُجھایا ہے
ابھی تک یاد ہے اِک روز و شب کے وصل کا منظر
وگرنہ اس دلِ بے رحم نے کیا کیا بھُلایا ہے
