غنچہ کھِلنے لگا

خاور اعجاز

کہانی !

تِری ابتدا ’’ کُن ‘‘ کے عنواں سے ہوتی ہے

بے شکل و بے ہیت اِک تیرگی کے سمندر سے

پہلی کرن روشنی کی گزرتی ہے

قریہ بہ قریہ ٹھہرتی ہُوئی

اِس زمیں پراُترتی ہے

رات اور دِن بنے لگتے ہیں

ننھے ستارے افق در افق چلنے لگتے ہیں

بامِ فلک آ گیا معرضِ ہست میں

نقش کل کے اُبھرنے لگے پانیوں کی در و بست میں

گنبدِ آسماں جگمگانے لگا

لطف جنّت میں رہنے کا آنے لگا

ایک دن

آتشِ قرب سے چہرہء زندگی سرخ ہونے لگا

باد و باراں کاموسم بدن کو بھگونے لگا

بیج میں سر چھپائے شجر

شب کے خوابِ گراں سے نکلنے لگا

موسمِ گل مِرے ساتھ چلنے لگا

حرف سے حرف کا ہاتھ مِلنے لگا

شاخ پر اوّلیں غنچہ کھِلنے لگا