فرحت نواز کی سات نظمیں

فرحت نواز شیخ(رحیم یار خان)

آج کے بچے

کھیل کی باتیں بڑی عمر میں سچ ہوتی ہیں

پانی سر سے اونچا بھی ہو گا تو کیسے

آج کے بچے ’’ہرا سمندر‘‘ نہیں کھیلتے

یہ تو اب یا سکریبل میں

نئے نئے  الفاظ بنائیں

یا پھر ڈائمنڈ،ہارٹ،کلب کے پتے پھینٹیں

جیتیں چاہے ہاریں

لیکن گیم پہ گیم جماتے جائیں

سوچتی ہوں یہ آج کے بچے

اپنے کل میں اپنے بڑوں کی

کہنہ اور اندھی رسموں کو جم کر چیلنج کر پائیں گے؟

دل کی بازی ہار گئے تو

تب بھی کیا یہ اسی طرح سے

دوسری بازی کھیلنے کو تیا ر رہیں گے؟

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

فرحت نواز شیخ

جواب

تم کو اپنی ذات کے اندر کے موسم کا حال کیا لکھوں!

کیونکہ میں تو کئی رُتوں سے

اپنی ذات سے باہر بیٹھی

راہ تمہاری دیکھ رہی ہوں!

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

فرحت نواز شیخ

رتجگے

وقت کی کھائی میں رات گرنے لگی

توڑ کر دل کے زندان کے بھاری قفل

آکے آنکھوں کے غاروں پہ یلغار کی

چند بیتے ہوئے وحشی لمحات نے

آبلے میری بینائی کے پاؤں میں

پھر سے اُگنے لگے؍پھر تنِ ناتواں روندا جانے لگا

اندھی خواہش کے کوہِ  گراں کے تلے

بس گھڑی دو گھڑی اور چٹخے گی رُوح

صبح نزدیک ہے

خونیں پنجوں میں سورج جکڑ لے گا پھر

اندھی خواہش کا لرزیدہ زخمی بدن

تب لپکتی شعاعوں کی پیاسی زباں

اس کے زخموں سے بہتا،ابلتا ہوا

رتجگوں کا لہو چاٹتے چاٹتے رات کر دے گی پھر!!

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

فرحت نواز شیخ

مِری شاعری

ایک گھونٹ کافی کا پی کر پیالی میز پہ رکھوں اور پھر

دیر تلک تجھ کو ہی سوچوں

اپنی سوچ کے رنگوں سے جب تیرا پیکر بنتے دیکھوں

کافی کا اک گھونٹ بھروں اور شعر کہوں

پھرتجھ کو سوچوں،تیرا پیکر بنتے دیکھوں

گھونٹ بھروں، پھر شعر کہوں

 اور گھونٹ گھونٹ یوں تیرا پیکر،میرے اندر اترا جائے

مِری شاعری ہوتی جائے!

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

فرحت نوازشیخ

وقت اور ہم

ہمسفری کا فرغل اوڑھے

جگر جگر کرتی امیدوں کے کنگروں پر

آسودہ سی منزل کو چھُونے والی مخمل جیسی

پگڈنڈی کا موڑ،جہاں پہ

قسمت کے بَل کھاتے عصا نے اک چشمے کو جنم دیا تھا

بے حد تنہا ، افسردہ اور چُپ رستوں کا

اور موئن جو ڈارو جیسے ان رستوں پر

چلنے والے جسموں کے تعویز جہاں پر

میوزیم کے شو کیسوں کی رونق کہلائے

جہاں روپہلے خوابوں کا اندوختہ اپنا

تلخ حقیقت کے قزاق نے لُوٹا بڑھ کر

جہاں چمکتی دیواروں کے سینے سے لگ کر

بیتے دن روئے تھے

جہاں پہ آسودہ لمحوں کی ہلکی ہلکی نرم سی دستک

پنڈولم کے تلخ جھکولوں میں بدلی تھی

وقت ابھی تک وہیں کھڑا ہے

ہم تیزی سے گزر رہے ہیں!

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

فرحت نواز شیخ

ڈائلماDilemma

دکھ یہ ہے کہ ہم دونوں اک دوجے کو پا ہی نہیں سکتے

اس سے بھی بڑھ کر دکھ یہ ہے کہ ہم دونوں

اک دوجے کو کھو کر بھی تو جی نہیں سکتے

پالینے اور کھو دینے کے بین بین کوئی رستہ ڈھونڈو

اور ہاں دیکھو!

ریستوران کی لمبی میز کے دو کونوں پر

اپنے آگے ٹھنڈی ہوتی چائے رکھے

یوں ہم دونوں

آخر کب تک بیٹھے رہیں گے!

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

فرحت نواز شیخ

ہجرت

سرداروں کی یورش ہر پل بڑھتی جائے

میرے چاہنے والے !

سب ہی تیری جان کے دشمن ٹھہرے

میری مانو

میری مَن بستی سے تم ہجرت کر جاؤ

خدا کرے کوئی  امن محبت کی دھرتی تم کو مل جائے

ساتھ تمہارے کیسے ہولوں

میرے پاس امانتیں ہیں جو کس کو سونپوں

کوئی بھی ذمہ لے نہیں سکتا

ظاہر ہے اپنے بستر پر

مجھ کو خود ہی سونا ہوگا!