ارشد جمال حشمی(کانکنارا)
اشارہ نظر کا بڑا صاف تھا
نظر تا بہ دل راستہ صاف تھا
لگایا بہت موجِ خوں نے بھی زور
مگر دستِ قاتل بھی کیا صاف تھا
وہ مکرا تو منکر ہوئے سب کے سب
گو لوگوں نے دیکھا سنا صاف تھا
بہانے کی کوئی بھی صورت نہ تھی
کہ مقتل تلک راستہ صاف تھا
وہ ملنا ترا وہ بچھڑنا ترا
بس اس کے سوا حافظہ صاف تھا
زمانے نے کوشش بہت کی مگر
دل اس کی طرف سے مرا صاف تھا
نہیں پڑھ سکا زعمِ طاقت میں وہ
نوشتہ تو دیوار کا صاف تھا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ارشد جمال حشمی
دل یہ شیشہ وہ حسیں بھی شیشہ
شیشے کے گھر کا مکیں بھی شیشہ
میرا تو وہم و گماں بھی ہے چٹان
تیرا ایمان و یقیں بھی شیشہ
اے درِ دوست بتا کیا کروں میں
دل بھی شیشہ ہے جبیں بھی شیشہ
سنگ کا شہر تو بزدل نکلا
ہم نے پایا نہ کہیں بھی شیشہ
وقت عریاں تمہیں کر ہی دیتا
ہم جو دکھلاتے نہیں بھی شیشہ
سنگ کے در پہ ملا سر بسجود
جس کا ایمان بھی دیں بھی شیشہ
پاؤں رکھئے گا سنبھل کر ارشدؔ
فکر بھی شیشہ زمیں بھی شیشہ
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ارشد جمال حشمی
گفتار میں تری ترا کردار پڑھ لیا
ہم نے تو سرخیوں میں ہی اخبار پڑھ لیا
کاغذ کے پھول سونے کے گملوں میں لائے ہیں
سوداگروں نے شہر کا بازار پڑھ لیا
ہم نے بھی رکھ لی حرفِ تمنّا کی آبرو
جب صاف ان کی آنکھوں میں انکار پڑھ لیا
یہ تجربوں نے ہم کو سکھائی ہے احتیاط
دانستہ ہم نے پھول کو بھی خار پڑھ لیا
اے میرے دوست تیرا نشانہ غلط نہ تھا
یوں ہے کہ میں نے ہی ترا ہر وار پڑھ لیا
ارشدؔ تو مفت ہی ہوا بدنام شہر میں
کم گوئی کو زمانے نے پندار پڑھ لیا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ارشد جمال حشمی
کب تیغوں سے روکی گئی یلغار لہو کی
جیت اہلِ ستم پر ہوئی ہر بار لہو کی
ہے ناز بہت آہنی شمشیر پہ تم کو
دیکھی نہیں تم نے ابھی تلوار لہو کی
وہ کرتی ہے آغاز تو یہ لکھتی ہے انجام
وہ دھار ہے تلوار کی یہ دھار لہو کی
کیا کشتِ وطن کو ہے مرے خوں کی ضرورت
کیوں اٹھتی ہے رگ رگ سے یہ جھنکار لہو کی
قاتل نے کیا اپنا ہی ہر راستہ مسدود
ہر چار سو استادہ ہے دیوار لہو کی
یاروں نے بھی اب سر سے کفن باندھ لیا ہے
اللہ سلامت رکھے دستار لہو کی
