احسان سہگل(ہالینڈ)
تو پورے شوق سے کر پوری بات اپنی
ترے قدموں میں رکھ دی ہے حیات اپنی
اسیرِ زلف بن کر کھودی آزادی
اسیری میں نہ دن اپنا ،نہ رات اپنی
کہیں بہہ ہی نہ جائے اشک بن بن کر
ان آنکھوں میں ہے پنہاں کائنات اپنی
نچھاور کر دیا سب کچھ میں نے اپنا
وفا کر لے تو بھی تو کوئی بات اپنی
تُو اور کیا چاہتا ہے ہم سے اے فاتح
تری محفل میں ہار آئے حیات اپنی
مواقع تو بہت ملتے ہیں باتوں کے
نہیں ہوتی مکمل پھر بھی بات اپنی
زمانے کے ستم سارے تُو لکھ سہگلؔ
جھجک کیا،ہے قلم اپنا،دوات اپنی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
احسان سہگل
پوجا ہوتی، پوجا کا گھر ہوتا
کاش میں بھی ایک پتھر ہوتا
بات تو جب تھی برابر اے دوست
عشق میں تو خود بھی مضطر ہوتا
سُرخرو ہوتی مِری بھی تقدیر
با وفا گر مِرا دل بر ہوتا
چیختا میری طرح تو بھی دوست
گر ترا بھی جینا دو بھر ہوتا
عاشقی کا سلسلہ ہے کچھ یوں
تو نہ ہوتا ،کوئی دیگر ہوتا
پیاس بجھتی،آس پوری ہوتی
دستِ ساقی میں یہ ساغر ہوتا
اور بھی آساں ہوتی منزل سہگلؔ
راستے میں کوئی رہبر ہوتا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
احسان سہگل
عشق میں تڑپنے کی تب نظیر ہوتا ہے
دل کسی کی زلفوں کا جب اسیر ہوتا ہے
اور کسی کے بارے میں سوچتا نہیں ہے وہ
خواہشوں کا اپنی ہی جو اسیر ہوتا ہے
اور بھی حسیں ہوتے ہیں مگر مِرے نزدیک
یار میرا محفل میں بے نظیر ہوتا ہے
لوگ دوسرے تو تسلیم کرتے ہیں اُس کو
لیکن اپنوں ہی میں اپنا حقیر ہوتا ہے
سوچتا ہے جو اوروں کی بھلائی کا ہر دَم
اپنی ذات میں وہ ہی تو منیر ہوتا ہے
اپنی خامیاں کیسے دیکھے نکتۂ فن میں
شخص جو رسالے کا خود مدیر ہوتا ہے
وہ سمجھ نہیں سکتا آج کی نئی باتیں
اس لکیر کا سہگلؔ جو فقیر ہوتا ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
احسان سہگل
رات ہو کہ دن ہو وہ اشکبار رہتا ہے
شہر میں ترے بھی اک غمگسار رہتا ہے
منحصر ہے یہ سب کچھ اپنی گفتگو ہی پر
ٹھیک ہو زباں تو پھر زندہ پیار رہتا ہے
بے سلیقہ ہوتا ہے جو بھی ذات میں اپنی
بزم میں تری وہ ہی بے وقار رہتا ہے
اعتدال کے رستے پر چلا جو بھی راہی
اُس کا رابطہ سب سے استوار رہتا ہے
تُو چلا گیا میرے شہر سے، ہوئی مدت
ہے یہ دل کہ جو اب بھی بے قرار رہتا ہے
جھوٹ پر نہ ہو مبنی وعدۂ وفا تو دوست
دو دلوں میں پھر قائم اعتبار رہتا ہے
اس حیات میں آیا ہی نہیں کوئی سہگلؔ
پھر وہ کون ہے جس کا انتظار رہتا ہے
