دَم اُسکا بھرتی ہوں
پہلے ماہیے کو
نام اللہ کے کرتی ہوں
۔۔۔
رکھ لینا بھرم میرا
ماہیے کہنے ہیں
یارب ہو کرم تیرا
۔۔۔۔۔
ہر حمد میں احمد ہے
نامِ الہی کا
سب حُسن محمد ہے
۔۔۔۔
مشہود ہے شاہد ہے
اللہ نے فرمایا
سب نبیوں کا قائد ہے
۔۔۔۔
جی بھر کے کہو ماہیا
کہناہے صفدرؔ کا
ماہ پارہ لکھو ماہیا
۔۔۔۔
سینے سے لگاتے ہیں
تنہا لمحوں میں
پاپا یاد آتے ہیں
۔۔۔
مری روح کے اندر ہے
پیار محبت کا
ماں میری سمندر ہے
۔۔۔۔
بیٹی مری سانسیں ہے
شُکر خداوندا
بیٹا مری آنکھیں ہے
۔۔۔۔
کچھ بات ہو ساجن کی
تاج مرے سر کا
خوشبو ہے مرے من کی
۔۔۔
دریا ہے محبت کا
دل میں اتروں جب
اندازہ ہو وسعت کا
۔۔۔
دل کو سمجھاؤں گی
فکر نہیں کرنا
میں لوٹ کے آؤں گی
۔۔۔
خوشبوؤں کا سایہ ہے
دردِ جدائی کو
اب من میں بسایا ہے
۔۔۔
جینے کا سوال آیا
اور اداس ہوئی
جب اُس کا خیال آیا
۔۔۔۔
آنکھوں کا فسوں آنسو
سوچ رہی ہوں میں
بہہ نکلے ہیں کیوں آنسو
۔۔۔
تمہیدِ جنوں آنسو
سچی بات کہوں
دیتے ہیں سکوں آنسو
۔۔۔
