فرحت نواز شیخ(رحیم یارخان)
۱
لفظ کتابوں میں اور خواب
دل میں سجائے رکھو
دونوں
عملی زندگی میں
اتنے ہی بے کشش ہیں
جتنے جگنو
دن کی روشنی میں!
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۲
لمبی نیندیں سو گیا بابل
ماں نے اوڑھا بے رنگ آنچل
وقت کی گردش ٹھہر گئی ہے
آنکھ میں منظر۔۔۔۔۔۔۔
ایک ہی منظر تیر رہا ہے
میں نے جتنے لفظ پڑھے تھے
ان کے جو معنی سمجھے تھے
آج وہ سارے بدل گئے ہیں
ماضی،حال اور مستقبل کے سارے لمحو!
مجھ کو کچھ بھی نہیں سمجھاؤ
میری طرح بس سوگ مناؤ۔۔۔چُپ ہو جاؤ!
………….
۳
بھائیوں کی چُپ،
بہنوں کی خالی خالی نظریں
ماں کا بہت سفید دوپٹہ
اپنے سر کے اوپر سے
جب آسمان سرکتا دیکھوں
بابل تیری یاد آئے اور دل کٹتا ہی جائے!
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۴
کتنے برسوں بعد
کڈز کارنر میں اچانک سامنا ہوا تو
ہم دونوں ایک دوسرے کا حال تک نہ پوچھ سکے
میری نظریں اس کی نظروں سے ٹکرا کر
اس کی توند پہ جا کر ٹھہر گئیں
اور اس کی نظریں
میرے تازہ رنگے ہوئے بالوں میں جیسے اٹک گئیں
وہ اپنے بیٹے کے لئے جو سوئیٹر خرید رہا تھا
اسے چھوڑ کر چلا گیا
اور میں اپنی بیٹی کے لئے
جو جیکٹ خرید کر لائی
وہ بڑے سائز کی نکلی۔
