فیض الحسن خیال حیدر آباد کے ان شعرا میں ہیں جو زائد از چالیس برس سے تقریباً ہر محفل شعر کی رونق رہے ہیں۔ روایت اور ترقی پسندی کے امتزاج کے ساتھ ساتھ اپنے مخصوص ترنم کے ذریعہ فیض الحسن خیال نے نہ صرف حیدر آباد بلکہ بیرون حیدر آباد بھی اپنی مقبولیت کے سکے جمائے۔ ان کے اب تک چار مجموعے منظر عام پر آ چکے ہیں۔ پہلا مجموعہ ’ موجِ صبا‘ 1965 میں شائع ہوا۔ اور پھر دوسرا مجموعہ ’ صبح کا سورج‘ 1972 میں زیور طبع سے آراستہ ہوا۔ اس کے بعد 1979 میں ان کا تیسرا مجموعہ ’کانچ کا شہر‘ منصۂ شہود پر آیا۔ پھر ان کا چوتھا مجموعہ ’قندِ ہند ‘ 1995 میں اشاعت پذیر ہوا۔
فیض الحسن خیال کا چوتھا مجموعہ اس اعتبار سے ندرت کا حامل ہے کہ اس میں فیض الحسن خیال کے اردو منتخب کلام کے ساتھ انگریزی، ہندی اور تلگو میں ترجمہ بھی شامل ہے جو بالترتیب پروفیسر پی وی شاستری، عزیز بھارتی اور خواجہ معین الدین نے کیا۔ کسی شعری مجموعے کو چار زبانوں میں ایک ہی جلد میں ایک ساتھ شائع کرنے کی یہ پہلی مثال ہے۔ اور اب ان کا چوتھا مجموعہ’ ‘ کے عنوان سے شائع ہو رہا ہے۔
فیض الحسن خیال سیدھے سادے انداز میں اپنی بات کہنے کے قائل ہیں۔ ان کے ہاں ناقابل فہم استعارے اور لاینحل قسم کی تراکیب نہیں ملتیں۔ وہ عوامی مزاج کے شناسا ہیں اور یہ جانتے ہیں کہ مشکل زبان اور تراکیب سے عوامی ترسیل کامیاب نہیں ہو سکتی۔ ان کا یہ شعر دیکھئے
اسی کا ذکر گلشن میں نہیں ہے
لہو جس نے بہاروں کو دیا ہے
آزادی کے بعد وہی متوالے سرے سے بھلا دئیے گئے جنھوں نے وطن کی خاطر اپنا لہو بہایا۔ یہ ان ہی آزادی کے جنون سے سرشار جیالوں کا فیض ہے کہ ہندوستان نے آزادی کی فضا میں سانس لی۔ لیکن جب آزادی ملی تو کیا ہوا، یہ سب جانتے ہیں۔ فیض الحسن خیال نے اسی حقیقت کو شعر کا پیراہن دے کر عوامی احساس کو بیدار کرنے کی کوشش کی ہے۔ اسی خیال کو ایک اور غزل میں انھوں نے اس طرح پیش کیا ہے۔
جنھوں نے امن و آزادی کے میخانے سجائے ہیں
انہی کو عصرِ نو نے زہر کے ساغر پلائے ہیں
لیکن فیض الحسن خیال کو اس بات کا یقین ہے کہ وقت سب سے بڑا مصنف ہے اور جس شقاوت کا مظاہرہ بردارانِ وطن نے کیا ہے انھیں اس کی سزا ضرور ملے گی۔ وہ کہتے ہیں
بدل دیا ہے جو تو نے نظام میخانہ
زمانہ تجھ کو ضرور ایک دن سزا دے گا
فسادات کے زہر نے انسانیت کو داغ دار کر دیا۔ کوئی شہر ایسا نہیں بچا جہاں فسادات کے عفریت نے تباہی نہ پھیلائی ہو۔ دیکھیے فیض الحسن خیال کیا کہتے ہیں
کس طرح آندھی چلی بجلی گری گھر جل گیا
کیا کرو گے سن کے تم یہ غم بھرا افسانہ ہے
لطف یہ ہے کہ جو ہنگاموں کے واقعی ذمہ دار ہیں وہ تو سنگھاسنوں پر براجمان ہیں اور بجائے اس کے کہ مظلوموں کو انصاف ملتا الٹے ان ہی کو مجرم قرار دیا جاتا رہا۔ یہ شعر دیکھیے
جرم کس کا ہے یہاں اور سزا کس کو ملی
فیصلے میں یہ عبارت نہیں دیکھی جاتی
فیض الحسن خیال ایک درد مند شاعر ہیں۔ انھوں نے جو کچھ محسوس کیا اسے لفظوں میں ڈھال دیا۔ یہ دیکھنا ضروری نہیں ہے کہ شاعر نے کیسے کہا۔ لیکن یہ ضرور دیکھنا چاہیے کہ وہ کیا کہہ رہا ہے۔ اس کا مطمحِ نظر کیا ہے، اس کے خوابوں کی بنیاد کیا ہے اور یہ خواب کس طرح شکست و ریخت کے مراحل سے دوچار ہیں۔ یہ سوچنا شاعر کا کام نہیں ہے کہ مسائل کا حل کیا ہے۔ کیوں کہ مسائل کو حل کرنے کے لیے ہر شخص کے پاس اس کا اپنا نظریہ ہے۔ شاعر تو صرف نشاندہی کرتا ہے۔ فیض الحسن خیال نے یہ کام بڑی خوبصورتی سے سر انجام دیا ہے۔
یہ تو سبھی جانتے ہیں کہ آج کے دور میں شعری مجموعوں کی پذیرائی کم ہی ہوتی ہے۔ جب قاری ہی کم سے کم ہوتے جائیں تو شاعر کی آواز دیمک زدہ صفحات میں قید ہو کر رہ جاتی ہے۔ پھر بھی کچھ لوگ ایسے ہیں جو اپنے اظہار کو مصلحتوں کے غلاف میں چھپا کر زندگی کے حقائق سے آنکھیں نہیں چراتے بلکہ حسب المقدور آواز بلند کرتے رہتے ہیں۔ فیض الحسن خیال ایسے ہی ایک فن کار ہیں۔
خدا کرے کہ ان کا یہ مجموعہ مقبول ہو۔