یہ تو سب جانتے ہیں کہ قصیدہ عربی صنفِ سخن ہے اور فارسی کے راستے سے اردو میں داخل ہوئی۔ فرق صرف یہ ہے کہ عربی شعراء نے صرف قافیے پر اکتفا کیا جب کہ فارسی شعراء نے عربی شعراء کی اتباع میں مقفیٰ قصیدے لکھنے کے علاوہ اس میں ردیف شامل کر کے بھی قصائد لکھے۔ اردو کے شاعروں نے بھی اسی طریقے کو اپنایا۔
ابتدائی عربی شاعری میں قصیدے ہی کا سانچہ استعمال کیا جاتا تھا اور اس میں ہر طرح کے موضوعات باندھے جاتے تھے لیکن بعد میں مدحیہ مضامین بھی باندھے جانے لگے اور انعام و ا کرام کے لیے رئیسوں کی مدح میں قصیدے لکھے گئے۔ پھر جب فارسی میں قصائد لکھے گئے تو ان کا مقصد بھی امراء کی مدح کر کے ان سے انعام و ا کرام حاصل کرنا تھا۔ اس طرح قصیدہ مدح سرائی کے لیے مخصوص ہو گیا۔ کبھی یہ بھی ہوا کہ شعراء نے اپنے دل کی بھڑاس نکالنے کے لیے ہجو لکھی اور قصیدے کے سانچے کو ہی وسیلہ بنایا۔ چناں چہ قصیدے میں مدحیہ اور ہجویہ دونوں طرح کے مضامین باندھے گئے۔ ویسے عام طور پر قصیدے کا اطلاق مدح پر ہی ہوتا ہے جو ہمارے روزمرہ میں بھی داخل ہے۔ زندہ افراد کے علاوہ اہم شخصیتوں خصوصاً حضور نبی کریم ؐ اور دیگر بزرگانِ دین کی مدح میں قصائد لکھے گئے۔
کئی دوسری اصناف کی طرح اردو قصیدہ نگاری کا آغاز دکن سے ہوتا ہے۔
نصیر الدین ہاشمی نے محمد شاہ بہمنی کے دور کے شاعر مشتاق اور لطفی کا ذکر کیا ہے اور ان دونوں کے قصائد کے نمونے بھی دئیے ہیں۔ لیکن یہ قصائد نعتیہ نہیں ہیں اور نہ ہی ان میں کوئی نعتیہ شعر ہے۔ چونکہ اس مضمون کا موضوع نعت سے متعلق ہے اس لیے ان شعرا کے قصائد سے مثالیں پیش کرنے سے گریز کیا گیا ہے۔
عادل شاہی سلطنت کا بادشاہ علی عادل شاہ شاعری سے گہرا شغف رکھتا تھا اور شاہی تخلص کرتا تھا۔ ڈاکٹر زینت ساجدہ نے کلیات شاہی کے عنوان سے اس کا کلام مرتب کر کے شائع کر دیا ہے۔ اس کلیات میں چھ قصیدے ہیں جن میں سے ایک قصیدہ نبی کریم ؐ کی مدح میں ہے۔ اس قصیدے کا مطلع یہ ہے
دیکھو نوروز چنچل یو بہارستاں دکھایا ہے
بَرک بِن پُھل و پھولاں تیں پون کے ہتھ کھلایا ہے
شاہی نے تشبیب میں بیس شعر کہے ہیں اور اس کے بعد گریز یوں ہے
گلابی پھول پر دعویٰ لگیا کرنے سمن سینتی
کھیا مالی نہ کر دعویٰ بڑا و و ناؤں پایا ہے
و و بولیا باغ مالی سوں بڑا ہے ناؤں سو کس کا
کھیا وہ اسم احمد ا کا جنے دیں اَپ نپایا ہے
محمد شاہ مرسل کا لگیا جب نعت کہنے میں
میٹھائی پاکے کے من میرا یو مضموں چن کے لیایا ہے
اور اب یہاں سے مدحِ رسول ؐ کا آغاز ہوتا ہے۔ مدح کے دو شعر ملاحظہ ہوں
محمد سا نہیں پیدا کیا کرتار تِر جگ میں
اوسی کے عشق تے سونسار تِر جگ کا بھرایا ہے
شریعت ہور حقیقت کا عنایت سب کیا سائیں
بڑا رتبہ دے عالم میں کرم اپنا جتایا ہے
اس قصیدے کے آخری تین شعر یہ ہیں
لکھیا ہوں نعت یو سارا طبع مجھ روشنی پانے
رسن کوں کاں اچھے طاقت تْہیں حق کا سرایا ہے
مضامیں کے بھریا موتی چتر پُن کے لے چو سیتے
قصیدیاں میں مرصع کر قصیدہ یو بنایا ہے
تمارے عشق کا نس دن دندھا دل میں دھریا شاہی
چرن تل سیس لا اپنا دعا منگنے کو دھایا ہے
قطب شاہی دور میں جو قصائد لکھے گیے ان کے بارے میں نصیر الدین ہاشمی لکھتے ہیں
’قصائد اپنی شوکت لفظی ‘ طمطراق اور تخیل کی بلند پروازی کے لحاظ سے تعریف و ستائش کے مستحق ہیں ‘
(دکن میں اردو۔ ص 80)
فیروز قطب شاہی دور کا ایک اہم شاعر گزرا ہے جس کی شاعرانہ صلاحیتوں کا وجہی اور ابن نشاطی نے کیا ہے۔ لیکن اس کا کوئی قصیدہ نہ مل سکا۔ اور نہ ہی محمود ملا خیالی وجہی وغیرہ کے قصائد دستیاب ہو سکے۔ مگر یہ ضرور کہا جا سکتا ہے کہ ان شاعروں نے قصائد یقیناً لکھے ہیں۔ اس بات کی تصدیق پروفیسر سیدہ جعفر کی تحریر سے بھی ہوتی ہے وہ لکھتی ہیں
’’ دکن میں بیجا پور کے عادل شاہی حکمرانوں اور گول کنڈے کے قطب شاہی سلاطین نے دوسری اصنافِ سخن کے ساتھ قصیدہ نگاری کی بھی حوصلہ افزائی کی اور ان کی قدردانی اور سرپرستی نے اس صنف کو پروان چڑھایا۔‘‘
(دکنی ادب میں قصیدے کی روایت۔ ص 44)
محمد قلی قطب شاہ اردو کا پہلا صاحبِ دیوان شاعر تسلیم کیا جاتا ہے۔ اس نے قصائد بھی لکھے ہیں جو اس کے کلیات میں شامل ہیں۔ عید میلاد النبی پر محمد قلی قطب شاہ کے قصیدے کا مطلع یوں ہے :
نبی مولود لیایا ہے خبر سر تھے خوشی کا
سدا صلواۃ بھیجو سب محمد ہور علی کا
بڑای ہے بہوت اس دیس کوں عیداں میں سارے
سعادت میں سعادت ہے سعادت اس گھڑی کا
سو ساعت کی سعادت میں دعا منگے جو کوئی
لکھیں بخشیش کا خط اس پیشانی پر جلی کا
نبی مولود ہے دیباچہ سب مولود میانے
سو ہے نوروز عیداں میں انند یے سروری کا
کلیات محمد قلی قطب شاہ مرتبہ ڈاکٹر سیدہ جعفر میں اس قصیدے کا عنوان ’عید میلاد النبی‘ دیا گیا ہے۔ (ص 711)۔ لیکن یہ قصیدہ بیک وقت نعت بھی ہے اور منقبت بھی‘ کیوں کہ اس کے زیادہ تر اشعار میں سرکارِ دو عالم ؐ کی مدح کے ساتھ حضرت علی کرم اللہ وجہ‘ کی مدح بھی ملتی ہے۔ اس کی وجہ یہ ہے کہ محمد قلی قطب شاہ اثنائے عشری عقائد کا پیرو تھا۔ کلیات میں ’بعثت نبی صلی اللہ علیہ و سلم‘ کے عنوان سے ایک قصیدے کے صرف دو شعر درج کیے گئے ہیں اور نیچے نوٹ دیا گیا ہے کہ اس کے بعد کے صفحات موجود نہیں ہیں۔ وہ دو اشعار یہ ہیں:
حضرت نبی پیغمبری حق تھے سو اس دن پائے ہیں
جبرئیل کھن تھے مصطفی کن وحی لے کر آئے ہیں
سارے نبیاں پر سروری دیتا خدا حضرت کوں تو
قدرت تھے چتّر ہوئے کر سر پر ابھالاں چھائے ہیں
محمد قلی کے قصیدوں میں تشبیب اور گریز نہیں ملتے۔ اس نے صرف مدح اور دعا لکھی ہے۔
ان نعتیہ قصائد کے علاوہ محمد قلی نے نعتیں بھی لکھی ہیں۔ کلیات محمد قلی قطب شاہ مرتبہ ڈاکٹر سیدہ جعفر میں پانچ نعتیں ملتی ہیں جن کے مطلعے پیش ہیں۔
تج مکھ اٰجت کی جوت تھے عالم دٖیپن ہارا ہوا
تج دین تھے اسلام لے مومن جگت سارا ہوا
اسم محمد تھے ا ہے جگ میں سو خاقانی مجھے
بندہ نبی کا جم رہے سُہتی ہے سلطانی مجھے
چاند سورج روشنی پایا تمارے نور تھے
آب کوثر کوں شرف تھڈی کے پانی پور تھے
دیا بندہ کوں حق نبی کا خطاب
حکم دے دیا نور جوں ماہتاب
خدا منج مہر سوں اٰپی نبی صدقے کیا رافع
منجے تختِ سلِماں جوں وہی آپی دیا رافع
ان میں سے تیسری نعت کے تین اشعار ڈاکٹر ثمینہ شوکت نے اپنے مضمون ’دکھنی قصائد‘(مشمولہ مجلہ عثمانیہ 1963-64دکنی ادب نمبر) میں درج کیے ہیں۔ متن کی غلطیوں سے قطع نظر یہ اشتباہ ہوتا ہے کہ یہ اشعار بھی صنفِ قصیدہ سے تعلق رکھتے ہیں جب کہ ڈاکٹر سیدہ جعفر نے انھیں نعت کے زمرے میں رکھا ہے اور یہی درست ہے۔ قصیدے کی بظاہر خصوصیت یہ ہے کہ اس کے ہر شعر میں مطلع کے قوافی کی پابندی کی جاتی ہے۔ غزل کی ہیئت بھی یہی ہے لیکن غزل کا ہر شعر ایک مکمل اکائی کی حیثیت رکھتا ہے۔ قصیدے کی سب سے اہم شرط مدح ہے اور مدح تک پہنچنے کے لیے شاعر تشبیب اور گریز کی راہ اختیار کرتا ہے۔
اس مضمون کا اختتام ہم ولی کے نعتیہ قصیدے پر کرتے ہیں۔ اس قصیدے کا آغاز حمدِ باری سے ہوتا ہے جس کا مطلع یوں ہے
عشق میں لازم ہے اول ذات کوں فانی کرے
ہو فنا فی اللہ دائم یاد یزدانی کرے
چودہ حمدیہ اشعار کے بعد نعت کے اشعار یوں ہیں :
زندگی پاوے ابد کی جگ منیں و و خضرِ وقت
جو اپس کوں فدویء محبوبِ سبحانی کرے
یا محمد دو جہاں کی عید ہے تجھ ذات سوں
خلق کوں لازم ہے جیو کوں تجھ پہ قربانی کرے
وہ اچھے آزاد جو بازار میں تجھ حسن کے
بندگی میں آپ کوں جیوں ماہِ کنعانی کرے
زیّنُوْ اِ لْحَانَکَمْ کا گر سنے داود ناد
ہو وے خوش دربار پر تیرے خوش الحانی کرے
نوح تجھ رحمت کی کشتی باج کیئں پاوے نہ تھاہ
تجھ غضب کا گر سمندر جوشِ طوفانی کرے
رتبۂ عالی میں دیکھے حق نزیک اپنا کلام
گر کلیم اللہ آ تیری ثنا خوانی کرے
جسم کوں سٹ روح سوں آوے بہت مشتاق ہو
گر تری امت خلیل اللہ کی مہمانی کرے
تب مسیحا فقر کے خط کو سکھے گا تجھ نزیک
مشق کرنے فقر کی جب لوح پیشانی کرے
جس مکاں میں ہے تمھاری فکرِ روشن جلوہ گر
عقل اول آکے وھاں اقرارِ نادانی کرے
حکمتاں کی سب کتاباں دھو سٹے یک بارگی
گر فلاطوں تجھ دبستاں میں سبق خوانی کرے
تجھ قدم پر جو اپس کا سیس راکھے جیوں سُرج
وہ قیامت لگ اپس چہرے کو ں نورانی کرے
کیا ملک کیا انس و جن یوجگ میں کس کوں ہے سکت
خط بنا تجھ مکھ کے جو تفسیرِ قرآنی کرے
دیکھ طوبیٰ قد ترا جنبش میں آوے شوق سوں
جب گلستانِ ارم کی تو خرامانی کرے
عارفاں بولیں گے جان و دل سوں لاکھوں آفریں
جب ولی تیری مدح میں گوہر افشانی کرے
درج بالا قصیدہ مکمل طور پر نعتیہ ہے۔ اس کے علاوہ ولی کے کلیات میں ایک اور قصیدہ ملتا ہے جس کا عنوان ہے ’ در حمد و نعت و منقبت و موعظت ‘۔ جیسا کہ نام سے ظاہر ہے ، اس قصیدے میں حمد باری کے بعد نعتِ محمدؐ اور پھر منقبت خلفائے راشدین و امام حسن و امام حسین ہے۔ آخر میں دنیا کے بارے میں تفصیلی اور نصیحت سے معمور بیان ہے۔ یہاں صرف نعت کے اشعار درج کیے جا رہے ہیں۔
بعد حمدِ خدا ے بے ہمتا
یاد کر نعتِ سیدِ مرسل
جس کی ہمت کی ہے ترازو میں
دو جہاں مثلِ دانۂ خردل
اس کی مجلس میں آہوا ہے کھڑا
صفِ آخرمیں جوہر اول
گر ہو و و آفتاب گرمِ عتاب
ٓآسماں جائیں مثلِ موم پگھل
دیکھ اس کے جلال و عظمت کوں
بادشاہاں کا دنگ ہے دنگل
گر کرے بحر پر غضب کی نظر
ماہیاں جائیں جل کے بھیتر جل
اْس فصاحت اگے دِسے مج کوں
نطقِ سحباں عبارتِ مہمل
کاملاں سوں سنا ہوں یہ نکتہ
عشق اس کا ہے ہادی اکمل
نام اس کا ہے حرزِ ہر مومن
یاد اس کی ہے واقعِ کلول
دیکھ اس زلف و مکھ کوں بے جا ہے
بحر و بر میں عنبر و صندل
ان اشعار میں جو صنعتیں ہیں ان میں سے چند کی طرف اشارہ کیا جا رہا ہے۔ تیسرے شعر میں اول اور آخر استعمال ہوا ہے جو صنعتِ تضاد ہے۔ پانچویں شعر میں دنگ اور دنگل آیا ہے۔ یہ تجنیسِ مطرف زائد الآخر ہے۔ چھٹے شعر میں جل دو مرتبہ الگ الگ معنوں میں استعمال کیا گیا ہے۔ یہ تجنیسِ تام مستوفی ہے۔
ولی کے ان دو قصائد میں ایک بات بری طرح کھٹکتی ہے اور وہ یہ ہے کہ ولی نے حضور نبی کریم ؐ کے عتاب اور غضب کا بھی ذکر کیا ہے جب کہ حضورؐ کی ذاتِ با برکات رحمت اللعالمین تھی۔
***