ایک نصابی مضمون
1.1 تمہید
1.2 مختصر حالاتِ زندگی
1.3 اکبر کی ابتدائی شاعری
1.4 اکبر کی طنزیہ و مزاحیہ شاعری
1.5 خلاصہ
1.6 نمونہ امتحانی سوالات
1.7 فرہنگ
1.8 سفارش کردہ کتابیں
1.1 تمہید
1857ء کا خونیں انقلاب جسے انگریزوں نے غدر کا نام دیا تھا، ہندوستان کی تاریخ کا ایک اہم باب ہے۔ انگریزوں کے استبداد کے خلاف ہندوستانیوں نے متحدہ طور پر جدوجہد کی لیکن ہندوستان کو انگریزوں کے چنگل سے آزاد کرانے کی یہ کوشش ناکام ثابت ہوئی۔ اس کے بعد تو انگریز حکمرانوں نے اس قدر ظلم و ستم ڈھائے کہ جس کی مثال نہیں ملتی۔ جس کسی پر یہ شبہ ہوا کہ اس نے انگریزوں کے خلاف ہتھیار اٹھائے اسے توپ سے اڑا دیا گیا یا پھانسی دیدی گئی۔ دہلی کے اطراف سولیوں پر کئی دن تک لاشیں لٹکتی رہیں جس کا مقصد صرف یہ تھا کہ عوام میں خوف پید ا ہو جائے اور وہ انگریزوں کے خلاف آواز اٹھانے کی ہمت نہ کر سکیں۔ عام مسلمانوں کی ہمتیں پست ہو چکی تھیں اور انھیں کچھ سوجھائی نہیں دے رہا تھا۔ آہستہ آہستہ کچھ بیداری آئی۔ عوام کو یہ احساس ہونے لگا کہ اگر وہ زمانے کے ساتھ نہیں چلیں گے تو پھر ان کا نام و نشان مٹ جائے گا۔
1857ء کے بعد ہندوستان کے افق پر جو تبدیلیاں آئیں ان کا گہرا اثر یہاں کی سماجی اور معاشرتی زندگی پر بھی پڑا۔ ایک گروہ نے یہ سوچنا شروع کیا کہ نئی تہذیب کو اپنائے بغیر اور مغربی علوم کو حاصل کئے بغیر ترقی ممکن نہیں۔ چنانچہ سر سید احمد خان اور ان کے ساتھیوں کی کاوشیں رنگ لائیں اور اینگللو محمڈن کالج کا قیام عمل میں آیا جہاں مسلمانوں کو جدید علوم کی طرف راغب کیا گیا۔ ایک گروہ کا خیال تھا کہ صرف مذہبی علوم کے حصول سے ہی ہندوستانیوں کی فلاح ممکن ہے۔ ان لوگوں کو سر سید احمد خان کی کوششیں پسند نہ تھیں۔ ان کا خیال تھا کہ اس طرح مسلمان دین سے دور ہو جائیں گے چنانچہ کٹر مذہبی علماء نے سر سید کی مخالفت پر کمر باندھ لی۔ ایک گروہ ایسا تھا جو ہندوستانیوں کی تہذیبی شناخت کو اہم جانتا تھا۔ یہ گروہ تعلیم کا مخالف نہ تھا لیکن اقدار کی شکست و ریخت اس کے لیے ناقابل برداشت تھی۔ لسان العصر خان بہادر اکبر حسین اکبر الٰہ آبادی اسی گروہ کے علم بردار تھے۔ اکبر الٰہ آبادی نے سنجیدہ شاعری بھی کی ہے لیکن ان کی شناخت ظریفانہ اور طنزیہ شاعری سے ہے۔ اودھ پنچ اردو کا وہ اہم رسالہ ہے جس نے لندن سے نکلنے والے پنچ کی طرح طنز و مزاح کے پیرائے کو اپنایا۔اور اردو کو ایک ایسا اسلوب دیا جس میں تلخی، طنز، شوخی اور مزاح بنیادی حیثیت کے حامل تھے۔ اس رسالے نے اپنی تیکھی اور طنزو مزاح میں ڈوبی ہوئی تحریروں کے ذریعے ہندوستانیوں کی تہذیبی اقدار کو ٹوٹنے اور بکھرنے سے روکنے کی کوشش کی۔ اکبر الٰہ آبادی اسی دور کی پیداوار ہیں۔ اودھ پنچ کے ایک اہم قلم کار کی حیثیت سے انہوں نے اس دور کی ایک اہم ضرورت کو پورا کیا۔
1.2 مختصر حالاتِ زندگی
اکبر الٰہ بادی کا پورا نام سید اکبر حسین تھا۔ ان کے والد تفضل حسین رضوی نائب تحصیل دار کے عہدے پر فائز تھے۔ اکبر 16 نومبر 1846ء کو قصبہ بارا میں پیدا ہوئے۔ ان کی پیدائش کے کچھ ہی سال بعد والد کا انتقال ہو گیا اور ان کے تایا سید وارث علی نے پرورش کی۔ معمولی سی تعلیم کے بعد 17 برس کی عمر میں مجبوراً انہیں پندرہ روپئے ما ہوار کی ملازمت کرنی پڑی پھر انہوں نے ریلوے کے دفتر میں محرر کی حیثیت سے کام کیا۔ اسی دوران انھوں نے انگریزی میں استعداد حاصل کی اور 1857ء میں وکالت کا امتحان کامیاب کر کے وکالت کا پیشہ اختیار کیا۔ 1869ء میں وہ نائب تحصیل دار مقرر ہوئے۔ اس کے بعد داروغۂ آبکاری کا عہدہ سنبھالا۔ پھر وہ ہائی کوٹ میں ملازم ہو گئے۔ 1873ء میں انھوں نے ہائی کوٹ کی وکالت کا امتحان کامیاب کیا اور منصف کے عہدے پر فائز ہوئے۔ 1888ء میں انھیں نائب جج بنایا گیا پھر عدالت حفیفہ کے جج بنے اور اس کے بعد سیشن جج ہو گئے۔ 1905ء میں اکبر ملازمت سے سبکدوش ہوئے۔ 1907ء میں برطانوی حکومت نے ان کی خدمات کے پیش نظر خان بہادر کے خطاب سے نوازا جس کے بعد الٰہ آباد یونیورسٹی نے انھیں فیلو مقرر کیا۔ 9 ستمبر 1921ء کو اکبر نے 75 برس کی عمر میں وفات پائی۔
1.3 اکبر کی ابتدائی شاعری
اکبر نے تقریباً پچپن برس تک اقلیم شعر پر حکمرانی کی ……ابتدائی شاعری میں وہ قدیم روش نمایاں طور پر نظر آتی ہے جو شعرائے لکھنؤ کی نازک خیالیوں کی آوردہ تھی۔
الفت گیسو نے آخر دی میرے دل کو شکست
ہائے کیا انمول شیشہ تھا مگر بال آ گیا
انہوں نے غزل کی قدیم روایت کی پاسداری میں جو اشعار کہے ہیں ان میں ایسے ہی مضامین کی بہتات نظر آتی ہے جو اس دور کی شاعری کا خاصہ رہے ہیں۔
پھر گئی آپ کی دو دن میں طبیعت کیسی
یہ وفا کیسی تھی صاحب یہ مروت کیسی
آپ بوسہ جو نہیں دیتے تومیں دل کیوں دوں
ایسی باتوں میں میری جان مروت کیسی
یاد قیامت سے جو اس دن مل گئی فرصت ہمیں
دیکھ لیں گے دور سے ہم بھی تماشہ حشر کا
غزل میں اکبر نے جو گل کھلائے ہیں ان سے فکری سطح پر بھی کہیں کہیں مشامِ جاں معطر ہوتے ہیں اور یہ فیض غزل کی ہمہ جہتی کیفیت کا ہے۔
دارِ فنا سے لے نہ چلے کچھ تو غم نہیں
فرمایئے تو، لائے تھے ملک بقا سے کیا
مداوائے رہنمائے گمرہاں اس دشتِ غربت میں
مسافر ہوں پریشان حال ہوں گم کردہ منزل ہوں
توقع رہتی ہے ہر دم کہ دم لینے کی مہلت ہے
معاذاللہ اپنی موت سے کس درجہ غافل ہوں
میں دیتا جاؤں یاران وطن کو کیا پتہ اپنا
خدا جانے مجھے لے جائے وحشت کس بیاباں میں
خانۂ دل کو کیا عشق بتاں نے برباد
کیا سے کیا ہو گئی اللہ کے گھر کی صورت
اب کہاں اگلے سے وہ راز و نیاز
مل گئے صاحب سلامت ہو گئی
اور یہ مشہور شعر ان ہی کا ہے۔
ہم آہ بھی کرتے ہیں تو ہو جاتے ہیں بدنام
وہ قتل بھی کرتے ہیں تو چرچا نہیں ہوتا
اس کے باوجود اکبر کی عظمت تو اس شاعری سے ہے جس میں طنز کی کاٹ اور مزاح کی چاشنی غالب عنصر کی حیثیت رکھتی ہے۔
1.4 اکبر کی طنزیہ و مزاحیہ شاعری
اکبر الٰہ آبادی سرکاری ملازم بھی رہے اور شاید اسی لیے ان کے لیے یہ ممکن نہ تھا کہ راست لب و لہجہ میں انگریزی استبداد کے خلاف آواز بلند کرتے لیکن شعری زبان کی وسعت اور ظرافت آمیز اظہار نے اس کمی کو پورا کر دیا۔ چنانچہ وہ کہتے ہیں۔
شاہد معنی نے اوڑھا ہے ظرافت کا لباس
اور اس طرح اکبر نے اپنے موقف کی وضاحت کر دی ہے کہ ظرافت کے پیچھے جو معنی چھپے ہوئے ہیں ان کی تلاش کرنے پر در مقصود مل سکتا ہے۔
اکبر کی طنزیہ و مزاحیہ شاعری اودھ پنج کی مرہون منت ہے۔ بقول ڈاکٹر وزیر آغا
’’اودھ پنج نہ صرف اردو کا پہلا مزاحیہ اخبار تھا بلکہ اس نے پہلی بار اردو میں مغربی طنز و مزاح کے حربوں کو بھی استعمال کیا۔‘‘ (اردو ادب میں طنز و مزاح صفحہ 192)
اس اخبار کے ایڈیٹر منشی سجاد حسین نے سیاسی، معاشی اور معاشرتی مسائل پر بے خوف و خطر طنز و مزاح کے پیرائے میں نکتہ چینی کی اور یہی حال اودھ پنج کے تمام معاونین کا تھا۔ برج نارائن چکبست لکھتے ہیں :
’’ظریفانہ نظم کے میدان میں حضرت اکبر سب سے دس قدم آگے ہیں۔ عموماً سوشل، پولیٹکل اور مذہبی مسائل کے ظرافت آمیز پہلو جس خوبی کے ساتھ اکبر نے نظم کئے ہیں وہ دوسرے کو نصیب نہیں ‘‘
(گلدستۂ پنج صفحہ 14)
سچ بات تو یہ ہے کہ اکبر کے مزاج میں ظرافت اور مزاح کا مادہ بدرجۂ اتم موجود تھا۔ مزاح ان کی طبیعت کا خاصہ تھا اور اسی لئے سرکاری ملازمت کے باوجود وہ اودھ پنج کے لئے لکھتے رہے۔ ان کی فطری شوخی، ظرافت اور قلم کی کاٹ نے جب شعر کی زبان میں سماج، تعلیم، سیاست، معاشرت اور بدلتی اقدار پر چوٹ کی تو فکری سطح پر تیزی سے فروغ پاتی ہوئی بے راہ روی کو ایک رکاوٹ کا سامنا کرنا پڑا۔
ان کی شاعری میں چھپے ہوئے قومی جذبے کا جائزہ لیا جائے تو یہ اندازہ کرنا مشکل نہیں کہ وہ انگریزوں کی استعماریت اور ہندوستانی تہذیب پران کے تسلط کے ہمیشہ شاکی رہے۔ سرکاری ملازمت نے ان کے اظہار کی راہ میں روڑے ضرور اٹکائے لیکن وہ دل سے قومی تحریک اور آزادی وطن کے قائل تھے۔ گاندھی جی کے لئے وہ کہتے ہیں۔
مدخولۂ گورنمنٹ اکبر اگر نہ ہوتا
پاتے اسے بھی اک دن گاندھی کی گوپیوں میں
مغربی تعلیم کے سیلاب سے اکبر بیزار تھے۔ یہ نہیں ہے کہ وہ تعلیم کے خلاف تھے۔ خود اپنے لڑکے عشرت حسین کو انہوں نے اعلیٰ تعلیم کے لیے لندن بھیجا تھا۔ اور جب انہیں محسوس ہوا کی لندن کی فضا ء نے عشرت کو اسیر کر لیا ہے تو وہ مشہور نظم مکمل ہوئی کہ
کھا کے لندن کی ہوا عہد وفا بھول گئے
ان کے نزدیک وطن اور وطن کی تہذیبی اقدار کی بڑی اہمیت تھی۔ وہ مغربی تعلیم کے اس خطرناک پہلو سے قوم کو بچانا چاہتے تھے جس سے ہندوستانیوں کی شناخت ختم ہو سکتی تھی۔
حامدہ چمکی نہ تھی انگلش سے جب بے گانہ تھی
اب ہے شمعِ انجمن پہلے چراغِ خانہ تھی
ہم ایسی کل کتابیں باعث ضبطی سمجھتے ہیں
کہ جن کو پڑھ کے بیٹے باپ کو خبطی سمجھتے ہیں
اے فلک انگلش و جرمن ہو مبارک تجھ کو
ہم کو تو اردو و ہندی میں بسر کرنا ہے
علم مغرب پڑھ کے ہوں گی ایسی خود سر بی بیاں
بی بیاں شوہر بنیں گی اور شوہر بی بیاں
. وہ اس دور کی فیشن پرستی پر وار کرتے ہوئے کہتے ہیں۔
مریدِ دہر ہوئے وضع مغربی کر لی
نئے جنم کی تمنا میں خود کشی کر لی
ایک اور جگہ کہتے ہیں۔
نئی مخمل کی نکٹائی تو گویا طوقِ گردن ہے
وہی بت خانہ بہتر تھا وہی زنار اچھی تھی
ان کے خیال میں تعلیم کا مقصد یہ نہیں ہے کہ صرف ملازمت حاصل کر لی جائے اور بس۔
ہم کیا کہیں احباب کیا کارِ نمایاں کر گئے
بی اے ہوئے نوکر ہوئے پنشن ملی پھر مر گئے
وہ تجارت کو طرۂ افتخار مانتے ہیں۔ اگرچہ وہ خود ملازم رہے لیکن ملازمت سے نالاں نظر آتے ہیں۔ انہوں نے مغربی اقوام کی سربلندی کا سبب تجارت بتایا ہے۔
پاتی ہیں قومیں تجارت سے عروج
بس یہی ان کے لئے معراج ہے
ہے تجارت واقعی اک سلطنت
ناز یوروپ کو اس کا آج ہے
اکبر کی ابتدائی شاعری میں جو نازک خیالی نظر آتی ہے اس کا پرتو ان کی ظریفانہ شاعری میں نظر نہیں آتا۔ اپنے مخصوص ظریفانہ رنگ میں شعر کہتے ہوئے اکبر نے نازک خیالی کے لبادے کو اتار پھینکا لیکن رعایت لفظی سے فائدہ اٹھانے کی خو نہ گئی۔
پا کر خطاب ناچ کا بھی ذوق ہو گیا
سر ہو گئے تو بال کا بھی شوق ہو گیا
زلف نے پرتوِ دیں نام کو رہنے نہ دیا
آخر اس لام نے اسلام کو رہنے نہ دیا
اکبر نے اردو شاعری کو نئی لفظیات سے روشناس کرایا اور دوسری زبانوں کے الفاظ خصوصاً انگریزی کے الفاظ کا استعمال کر کے مزاج کی ایسی کیفیت پیدا کی جو اہل نظر کے لئے تازیانے کا کام کرتی ہے۔
شیخ آنر کے لئے آتے ہیں میدان کے بیچ
ووٹ ہاتھوں میں ہے اسپیچ قلمدان کے بیچ
کیا کہوں اس کو میں بدبختی نیشن کے سوا
اسکو آتا نہیں اب کچھ امٹیشن کے سوا
ان کے قلم کے نشتر سے کوئی نہ بچ سکا …….سیاسی جماعتیں ، فلاحی ادارے اور ان کے سربراہ، مذہبی علماء سبھی کو اکبر نے نشانہ بنایا ……ایسے لیڈر جنہوں نے اپنے فائدے کے لئے قوم کا نعرہ لگایا، ان کے لئے اکبر کے شعر ایک نشتر کی طرح ہیں۔
گردن ریفا رمر کی اک سمت تن گئی
بگڑی ہو قوم و ملک کی ان کی تو بن گئی
تمام قوم ایڈیٹر بنی ہے یا لیڈر
سبب یہ ہے کہ کوئی اور دل لگی نہ رہی
کیا عذر قوم کو ہے ترقی کی بات میں
رغبت کے ساتھ خود سے وہ لیڈر کے ہات میں
زندگی کو ضرور ہے اک شغل
خیر بالفعل لیڈری ہی سہی
سروس میں میں داخل نہیں ، ہوں کا خادم
چندوں کی فقط آس ہے تنخواہ کہاں ہے
جہاں تک نئی روشنی، مغربی علوم کے حصول اور سائنس اور ٹکنالوجی کی طرف بڑھتے ہوئے رجحان کا تعلق ہے یہ کہا جا سکتا ہے کہ اکبر الٰہ آبادی نے اپنے کان بند کر لئے تھے۔ وہ آنے والے دنوں کی آہٹ محسوس نہیں کر سکے۔ قدامت پرستی نے انہیں نئی روشنی کے خلاف کہنے پر اکسایا تھا۔ مصلحان قوم کے عظیم کارنامے ان کے سامنے ہیچ تھے۔ حصول علم کے بدلتے ہوئے رجحان پر نشانہ بازی کرتے ہوئے انہیں اس بات کا اندازہ نہیں تھا کہ زمانے کی کروٹیں کیا گل کھلانے والی ہیں۔ لیکن اس بات سے بھی انکار نہیں کیا جا سکتا کہ اکبر نے اپنے اشعار میں چھپے ہوئے تیر و نشتر سے ان ناسوروں کو کریدا تھا جو آنے والے زمانے کے لئے تکلیف دہ ثابت ہو سکتے تھے۔ انہوں نے اپنے لفظوں کی کمندوں سے بے راہ روی کی طرف بڑھتی ہوئی قوم کو روک کر اپنی تہذیبی شناخت باقی رکھنے پر زور دیا تھا انہوں نے توازن کی راہ اختیار کرنے کی طرف توجہ دلائی تھی۔ ایک طرف تو اکبر نے اردو شاعری میں طنزو مزاح کے ملے جلے اسلوب کو فروغ دے کر زندگی کی تنقید کا اہم فریضہ انجام دیا تھا تو دوسری طرف آنے والے زمانے کے طنز و مزاح پر مشتمل سرمائے کے لئے ایک مشعل روشن کر گئے اور یہی اکبر کا کارنامہ ہے۔
1.5خلاصہ
اکبر الٰہ آبادی کا پور انام سید اکبر حسین تھا۔ 1857ء میں قصبہ بارا میں پیدا ہوئے۔ معمولی ملازمت سے آغاز کیا اور اپنی تعلیمی قابلیت بڑھاتے رہے۔ 1905ء میں سیشن جج کی حیثیت سے وظیفہ پر سبکدوش ہوئے۔ برطانوی حکومت نے ان کی خدمات کے پیش نظر انھیں خان بہادر کے خطاب سے نوازا۔ 75 برس کی عمر میں 1925ء میں اکبر نے وفات پائی۔ ان کی شاعری کا ابتدائی دور لکھنوی رنگ کا ہے کافی عرصہ تک وہ سنجیدہ شاعری کرتے رہے۔ چونکہ ان کی فطرت میں ظرافت کا مادہ تھا اس لئے وہ ظریفانہ شاعری کی طرف متوجہ ہوئے۔ ان کی طنزیہ و مزاحیہ شاعری میں مسلمانوں کے سیاسی، سماجی و معاشرتی مسائل کا احاطہ کیا گیا ہے۔ وہ اگرچہ سرکاری ملازم تھے لیکن اپنی ظریفانہ طبیعت اور شاعرانہ مزاج کی بدولت سماج اور بدلتی ہوئی قدروں پر چوٹ کرتے رہے۔ وہ آزادی وطن کے قائل تھے اور مغربی تہذیب کی بڑھتی ہوئی یلغار کے مخالف تھے۔ انھوں نے اپنی شاعری میں انگریزی الفاظ کو بھی بڑی خوبی سے پیش کیا۔ ان کے قلم کے نشتر سے کوئی بچ نہ سکا سیاسی جماعتی، فلاحی ادارے ، مذہبی علماء، لیڈر سبھی کو اکبر نے اپنے طنز کا نشانہ بنایا۔ اکبر کو بلاشبہ اردو طنز و مزاح کا سب سے اہم شاعر کہا جا سکتا ہے۔
1.6 نمونہ امتحانی سوالات
1۔ 1857ء کا ہندوستانی معاشرے پر کیا اثر پڑا؟
2 ۔ اکبر الٰہ آبادی کے حالات زندگی مختصراً بیان کیچئے۔
3۔اکبر الٰہ آبادی کی سنجیدہ شاعری کے بارے میں کیا جانتے ہیں ؟
4 ۔ اکبر الٰہ آبادی کی طنزیہ و مزاحیہ شاعری کے بارے میں اپنی مدلل رائے تحریر کیجئے۔
1.7 فرہنگ
استبداد ظلم
کاوش کوشش
بدرجہ اتم بے حد
استعماریت ظالمانہ اقتدار
قدامت پرستی پرانے رواج سے لگاؤ
خبطی پاگل
1.8 سفارش کردہ کتابیں
.1 اردو ادب میں طنزو مزاح ڈاکٹر وزیر آغا
2 . انتخاب اکبر الٰہ آبادی مکتبہ جامعہ دہلی
3 . بزم اکبر قمر الدین احمد بدایونی
4 . کلیات اکبر الٰہ آبادی اکبر الٰہ آبادی
5 . اردو ادب میں طنز و مزاح کی روایت ڈاکٹر خالد محمود
—————————٭٭——————————