(Last Updated On: )
ذرا انصاف کر ماہی محبت پہلے کیں کیتی
اساں ڈوہاں وچوں دل تے حکومت پہلے کیں کیتی
او پہلے پہلے میڈے کول ٹُر کہ توڑ کونڑ آیا
او دل ڈیون دی چن ماہی عنایت پہلے کیں کیتی
ذرا انصاف کر ماہی
گلی سے موڑ وچ ہس کے او میں ڈٹیھیا کہ تیں ڈٹیھیا
ملا کے اکھیاں نال اکھیاں شرارت پہلے کیں کیتی
ذرا انصاف کر ماہی
اے کہہ آکھا جو ہنٹر تیڈے سوا اِک پل وی نہیں لنگدا
روزانہ ملدے راونٹر دی ہدایت پہلے کیں کیتی
ذرا انصاف کر ماہی
ودھا ہنٹر ضد کریندا ایں جو میں تیکوں بھلا ڈیواں
ڈسا عشق و محبت دی تلاوت کیں کیتی
ذرا انصاف کر ماہی
اساں ڈوہاں دا وعدہ ہا جو مرداں تائیں وفا کرسُوں
ڈسا محمودؔ وعدہ وچ خیانت پہلے کیں کیتی
