(Last Updated On: )
ھئی عمر صغیر نادانی وِچ میتھوں قسماں ڈھول چوائیاں
پابند کر کے کنڈھ کر گیا سوہنڑاں گل پا کے غماں دیاں پھائیاں
وَدھا قسمت نال جھڑینداں جہیڑے تے نئیں سنگدل توڑ نبھایاں
وَس رَس کے بیوسؔ اُجڑ گئیوں سے واہ رب دئیاں بے پروائیاں
ناکام کہانی الفت دی جس وقت لکھینداں رو پونداں
کئیں گذرے وقت دا ہِک لحضہ جاں یاد کرینداں رو پونداں
کِتھے ڈیہنہ اُبھرے کِتھے شام تھئی کیویں ہر چاہت ناکام تھئی
اس سفر دی ہر ہک منزل تے جاں دید پرِینداں رو پونداں
قربان ہاں وسدے یلے توں ڈر لگدا اے وقت کویلے توں
جئیں ویلے شام دِی سرخی دا رنگ سرخ تکینداں رو پونداں
بوہے بند اکھیاں دے کھل ویندن تھئی آس دے دیوے گُھل ویندن
لہو جگر دا کڈھ کے آساں دے جاں دیپ جلینداں رو پوندن
ہتھوں قلم بیمار دے چُھٹ ویندا اے تحریر دا سلسلہ تَررُٹ ویندا اِے
جداں بیوسؔ پیار دے پیاراں دا انجام سچینداں رو پونداں
