دعا یہی ہے کہ بے انتہا جِلا دینا

دعا یہی ہے کہ بے انتہا جِلا دینا
مِرے قلم کو سدا روشنی خدا دینا

وطن کی خاک کا تجھ پہ ہے قرض سُن بیٹا !
کٹانا سر بھی پڑے قرض کو چکا دینا

تجھے ستائے زمانہ تو صبر سے سہنا
بس اپنے رب کو تو ہر حال میں صدا دینا

مِرے بغیر اگر دل لگے تو اچھا ہے
لگے نہ دل تو مجھے جانِ جاں بُلا دینا

ہوس کی آندھی میں ان الفتوں کے راستے میں
چراغ جلتے رہیں ان کو مت بجھا دینا

بتا دے راستہ عاقل بھٹکنے والوں کو
ضمیر مردہ کو اخلاص کی دعا دینا