(Last Updated On: )
اپنی سانسوں کے تلاطم کو سنبھالا کیجئے
روز اس سبز دریچے سے نہ جھانکا کیجئے
ذات کے نیلے کنویں میں ہے توقع کمیاب
جسم کے فرش پہ چپ چاپ ہی رینگا کیجئے
لوگ آرام سے بیٹھے ہیں کہ جیسے جنگل
روز الہام کی آواز اُتارا کیجئے
تیز ناخن سے غم لمس کو زخمی کر کے
خون کی بوند ہر اک شام کو چکھا کیجئے
نیند کے جھومتے پیپل سے ٹپکتے پتے
یوں نہ جلتی ہوئی آنکھوں میں چھپایا کیجئے
جانے کس روز اُتر جائے زمیں پر اسلمؔ
ہر تقدس کا ورق شوق سے چوما کیجئے
٭٭٭